Jeremie 51 - La Sainte Bible en Langue Yipunu

¹ Bulumbi buFumu abubu rie: Nyugumbisa punga ajiubunga Babylone na bisi musiengi.

² Nyutinda benyi ugubunga, abosila bulongu pavala; boruyila yiari na yiari uguvikana.

³ Barela badupalu betoyi nandi. Abeduari bikutu bibudilu bimagagala balabini! Duyalasa bagora yingeba! Bokisanu dibadi diotsu!

⁴ Abamanemusu boba layini o bulongu buBabylone na boyenafuanganga mu mansila.

⁵ Bulongu buBabylone bumabasu na nsoruru va gusu Nsambi Israel; tumba Nsambi aguvu Fumu Mabadi asamabusa baIsrael na baJuda.

⁶ Rinanu Babylone, mutu mutu akegobula! Dukebungana va mosi na uonyi! Ajina la kabusulu pila jiFumu; ogusaka nana divu diwelimina.

⁷ Babylone umaba va dikaka diFumu nderi kopa jilora ajimalansa bisi butamba buotsu. Bisi malongu bamanu malamu la dibandu bamabila nderi malagu.

⁸ Babylone umasundila urakuga na umapansu! Tsukamanu mu dionyi; rombanu bilongu ugubuga tanguji ubeluga.

⁹ Tumabuga Babylone tumba usamarungula ubeluga. Tugusilianu; tugabuyianu mutu mutu o bulongu buandi. Mbela j imalabana jivu tindi jineni jimamata te no julu!

¹⁰ Fumu amatuvega ndunga. Tʼwendianu o Sion tuyesamunanu adi Fumu Nsambi etu amavaga.

¹¹ Fumu amatsagumusa bakaga baMedie upansa Babylone. Ajina jivu kabusulu pila jiFumu, pila jiNdagu andi. Valanu mbansa gaanganu bangubu!

¹² Matsianu yilimbu o bivaga biBabylone! Warisanu mandagu mabawatsi na viosanu bawatsi muna, rambanu mirambu! Fumu amatabula diambu udugusu edugusi adi amavosa mu diambu dibisi Babylone.

¹³ Ndeʼ Babylone aguitsani va mugula mijamba mineni na aguvu na bungunu buneni disukusulu diagu dimalabana na ndiongulu tsimasuka!

¹⁴ Fumu Mabadi amaleva pesi na diina dijaʼ beni rie: Nyiina, nyugubasa batu aboba nderi makokoku na bogugamuyila migamu mindungulu.

¹⁵ Na mangolu mandi Fumu amasunda butamba na diela diandi amavaga bulongu na dujabu duandi amawalajulu.

¹⁶ Ava mamba majulu megululu diufi diandi megukimi; ematisi mamungi o masuka mabutamba, evedimisi tsiemu na enoyisi mfula vajulu vana epalisi punga mu bilundulu biandi.

¹⁷ Dujabu duandi duikalusi batu botsu biduka Ketijiotsu jilora elabi yisonyi na kosi andi; mu mbari bakosi bandi belabini yika ulabana bagaa na muvumu.

¹⁸ Bagaa na tsongu bavu yisalu yindusulu. Ava Fumu oruyila bobungu.

¹⁹ Agaa nana bakosi beni. Ayu bungunu buIsrael; avu musunditsi ubima biotsu. BaIsrael bavu batu bandi. Diina diandi divu Fumu Mabadi.

Disukusulu diBabylone

²⁰ Ndeʼ Babylone gumaba marto mami nesiyitogulu yidivita. Nyimagusalisa ukakasana dilongu na dilongu, nyimagusalisa ubunga bufumu.

²¹ Nyimagusalisa ukakasana kabala na babeyitsi; nyimagusalisa ukakasana dikalu na jandi agumaba mu dionyi.

²² Nyimagusalisa ukakasana dibaala na mugetu; nyimagusalisa ukakasana yinunu na muana; nyimagusalisa ukakasana mufudu na numba.

²³ Nyimagusalisa ukakasana mubungulitsi ubindombu na mugamba andi; nyimagusalisa ukakasana mufutsitsi na bangombi bandi; nyimagusalisa ukakasana bivunda bibulongu na barumitsi.

²⁴ Fumu evosi rie: Va misu menu nyugabusila Babylone na bisi musiengi mabi motsu ama bamavayila Sion.

²⁵ Fumu evosi rie: Nyina kueru nagu ndeʼ mubungitsi, ndeʼ agumabunganga butamba buotsu! Nyimagusamba dikaka na nyugubungasana ojulu tsimamanyi! Nyugunyensa tindi unyensa,

²⁶ te na mamanyi magomuelabana: ne mamanyi mayitungu ne mamanyi mayibuga. Fumu evosi rie: Gubungu mutubu.

²⁷ Matisanu yilimbu o bulongu! Siyisanu mumbanda o malongu! Malongu, kunsamanu utoga na Babylone. Nengilanu bisi bufumu buArarat nesi buMinni nesi buAchekenaz utoga na Babylone! Rombanu bivunda bibagora! Rombanu bakabala abobanganga bapuela nderi makokoku.

²⁸ Malongu, kunsamanu utoga na Babylone sinsa viri jenu bakaga baMedie na bivunda na barumitsi bamalongu motsu!

²⁹ Butamba bumasisana na bumaregama. Duganu duFumu udugusu duidugusulu Babylone. Okalusa bulongu buBabylone mbura ajigaa na mamba ajigetsanini batu.

³⁰ Bagora baBabylone bamadunda utoga bavu o gari tsibivaga; mangolu mogu mamasuka bavu nderi bagetir. Bamanyensa mandagu na bamapansa magongi.

³¹ Bagora bamabenguna, bilumbi bimaviagana uyetsingula kaga jiBabylone rie: Babylone umabongu!

³² Maviogulu mamadiba mandagu masakama mamanyenga na bagora bamabakama mirima.

³³ Fumu Mabadi aguvu Nsambi Israel jandi rie: Babylone uvu nderi mbura aji besayili tsangu. Temu dutsonsugu jika bebeli.

Nsambi ugabusa egabusili batu bandi pila (Jerusalem)

³⁴ Nabucodonosor, kaga jiBabylone, amatusielasana na amatutsungula. Amatuvaga nderi yisanga yipavala; amatumina nderi mukuimbi nyoga; amagukuru na biboti bietu na amatubinga vala.

³⁵ Bisi Sion bevosi rie: Dikasi adi tumalasu na mapura ama tumanemusu bibi va julu miuru mibisi Babylone! Jerusalem evosi rie: Malungu metu mabi va julu miuru mibisi Babylone!

³⁶ Bulumbi buFumu mu diambu diJerusalem abubu rie: Nyugutabulila bunsonsi, nyugugabusila pila! Nyukamusa mijamba nesi bileka.

³⁷ Babylone uba diguki dibivongu nesi yisuemunu yimakoju, upansu nolasu yisonyi, usiala mududu.

³⁸ Mua pesu temu bisi Babylone ugumba begumbi nderi bimbungu ugamuga begamuyi nderi baana babimbungu.

³⁹ Fumu evosi rie: Ava bogululu yiusila nyubanuisa, nyubalansa yiri bolabanga nsangu mbana bowenda yilu yimutubu na bagomuerambuga.

⁴⁰ Nyubabega nderi bindombu abimabegu o uboku, nesi balumi babindombu na binsabi.

Mbigulu mu diambu diBabylone

⁴¹ Ka muna diambu di! Musiengi uChechak umabongu! Agumayitsu na bisi butamba botsu umabetsu! Ka muna diambu di! Babylone umapansu va gari malongu!

⁴² Mubu umabudiamisa, umaviku na mibiji mipuela.

⁴³ Misiengi amibambini mimapansu! Butamba bumakaluga mbura ajigaa na mamba; buvu bulongu abumasiala mududu ne mutu mosi agomuesikama muna.

⁴⁴ Nyukilisa Bel nsambi jiBabylone, nyumupatula abi amamina, bisi malongu bagomuemuyitsanga. Yivaga yiBabylone yimarakuga!

⁴⁵ Batu bami gusuganu muna; mutu mutu akegobula norina kabu jineni jiFumu!

⁴⁶ Duyalaba keri na duyalaba goma mu diambu dinduku ajiunyava mu bulongu; yilima yieyiyi kumfu jiuba jineni, yilima ayiduki yiuba na kumfu jisusu na dikasi diuruma bulongu, murUmitsi otoga na murumitsi ususu.

⁴⁷ La dibandu bilumbu uruga biruyi abi nyukilisila bakosi baBabylone na bulongu buotsu bubasa yisonyi na yisonyi; bamfumbi boba layini va dulombili.

⁴⁸ Migamu mijulu na mibutamba na biotsu abivu muna miugulunu o Babylone. Fumu evosi rie: Babungitsi uruga beruyi o banda ububunga.

(Mubiyitsi)

⁴⁹ Nana Babylone amarombisila baIsrael uboku dedi mosi jaʼ wandi obokulu.

⁵⁰ Jenu adusamaboku nandi yenawendanu, duyatsikadana. Nesi o bulongu buvala, duyalibana Fumu na rangiminanu Jerusalem.

(Batu baNsambi)

⁵¹ Tumalaba yisonyi ava tumagululu bisiengu; tumaba tsokudu na yisonyi ava benyi bamakotila o Mbura Nsambi.

(Fumu)

⁵² Fumu evosi rie: La dibandu bilumbu uruga biruyi abi nyukilisila bakosi baBabylone na mu bulongu buotsu abamanemusu bonyonganga.

⁵³ Ne pa Babylone omata te no julu ne pa osakiga bivaga nyusingisa babungitsi ububunga. Menu Fumu oyiditubuli.

(Mubiyitsi)

⁵⁴ Bibimu bimagulunu oBabylone na migamu midubungu duneni mimagulunu o bulongu buotsu.

⁵⁵ Fumu ubunga ebungi Babylone, amavotsa nduku jineni ajimagulunu guna. Nduku jineni jibabungitsi jimagulunu nderi nduku jimibiji mimubu;

⁵⁶ nyiina, niubungitsi uruga eruyi o Babylone; bagora baBabylone bamagaangu na bapita bogu bamabogulu. Fumu Nsambi aguisaki mutu mutu dedi nana amasalila; aguigabusili mutu mutu pila.

⁵⁷ Kaga agu diina diandi divu Fumu Mabadi jandi rie: Nyulansa basalitsi bandi na bango diela nesi barumitsi babulongu nesi bivunda nesi batoyitsi bamavita; bowenda bilu bimutubu na bagomuerambuga.

⁵⁸ Fumu Mabadi ebuesi rie: Bivaga bineni biBabylone biurakuga; biabutsu bisakama biunyensu; kulini, batu bamasalila, muji umasielasana malongu.

Bulumbi bumabuagu mu mujamba Euphrate

⁵⁹ Jeremie mubiyitsi amavega Seraya muana dibaala uNeria mutegula uMaasseya diruma ava amawendila o Babylone va mosi na Sedecias kaga jiJuda. Dimalabana mu yilima yimuina bidurumu duSedecias. Kabogu Seraya amaba yivunda yibagora.

⁶⁰ Jeremie amasona maguga motsu amolabana o Babylone na mambu motsu amamavosu mu diambu diBabylone.

⁶¹ Amatsingula Seraya rie: Ava gutolila o Babylone gukaranga mambu meni motsu na buranga na diufi o julu.

⁶² Gukavosa rie: Fumu ndeʼ gumatubula yiri mbura ejiji jiubungu na jigomuetsanunu na batu nesi bibulu na jiuba mbura ajigaa na mamba mutubu.

⁶³ Ava gumanina uranga muganda, gukagutunga dimanyi; gukagubuaga mu Euphrate,

⁶⁴ na gukavosa rie: Anana Babylone udiamusulu na ugomuetsanduga mu mbari Fumu ogulasa maguga. Botsu boba volongu: Disukusulu dimambu maJeremie.