Jeremie 5 - La Sainte Bible en Langue Yipunu

Musiengi agumabiva tindi ubiva (Fumu)

¹ Vioganu mu mansila maJerusalem; gengilanu na wivulanu, rombanu mu milebi labanu pa vavu mutu, pa vavu umosi aguiduki dusungugu oyirombi uba musinganyi. Pa gulaba ne umosi muna, nyutanda Jerusalem masumu mogu.

(Jeremie)

² Ne pa belevi pesi rie: Fumuejabi! kulini belevi pesi.

³ Aa Fumu, tsia guirondi businganyi? Guibadimbi tumba bagegulu buali; guibakilisi ne nana bebusi ukalula diela.

⁴ Nyimavosa rie: Jogu bavu bangebi; bevayi mambu mabuduka mu mbari bagejabi duganu duFumu, nesi migaga miNsambi ogu.

⁵ Nyuwenda ombu bivunda na nyuvosa nogu; mu mbari bejabi duganu duFumu nesi migaga miNsambi ogu. Tumba jogu botsu bamabogula yilala na bamatabula mikudu miNsambi.

⁶ La dibandu yimbungu eruyili o musiru uyibaboka na minsi eruyili o kumu uyibabunga, magena ulega ebaleyi va gusu misiengi miogu; botsu abopala bovopulu; mu mbari bumbini buogu buvu buneni na mabi mogu mamafuna.

(Fumu)

⁷ Fumu amavosa rie: Jerusalem, dibandu yi nyugutandila? Baana bagu bababaala bamambusa na belevi mapesi na miina mabansambi bamfurulu. Nyimabadugusu maboti ne nana bevayingi bumbembu; bewendi yinombu o mandagu makulini.

⁸ Dedi mosi na bakabala abamalisulu buranga noyenalinganga yiari na yiari, uyenabebanga jogu wogu beduki bagatsi bangana.

⁹ Fumu amawivula rie: Ngokilisa batu mu mambu mamunongu eni? Ngogabusila bisi dilongu dieni pila?

¹⁰ Matanu mu bibaga; tabulanu bitayi; tumba duyabibunga tindi ubunga. Gusulanu bitayi birayisan; bigaa biFumu!

¹¹ Fumu amavosa rie: Jenu baIsrael na baJuda dusamaba basigama bami.

Purulu tsi-agumabusu

¹² BaJuda bamagala Fumu, bevosi rie: Agaa Fumu! Purulu tsigoturasuna, tugolaba divita nesi dungosu dunsala.

¹³ Babiyitsi bavu nderi punga ne mutu mosi va gari ogu evosi mambu maNsambi; posulu tsiogu tsibi va julu tsimiuru miogu.

¹⁴ La dibandu Fumu aguvu Fumu Mabadi evosili rie: Mu mbari bamavosa nana, kabogu ndeʼ Jeremie weʼ na bulumbi buami abuba nderi muji mu munu agu na batu bebaba boba nderi mikansu ami muji uyenasielasana.

¹⁵ Fumu amavosa rie: Mbe ka jenu baIsrael, nyuruma dilongu adiurambuyila vala uyitoga nenu, dilongu dieni diuba na mangolu na mbembu ajigojabunu; dugogulu mambu mogu.

¹⁶ Palu tsiogu tsivu nderi ngila ajivu jalala jogu botsu boba bangogaga.

¹⁷ Bomanisila digumba dienu nesi biguji bienu nesi baana benu bababaala na babagetu nesi bangombi benu nesi rayisan tsienu nesi figa tsienu; bobunga misiengi mienu mikandu ami dumavayila yitu.

¹⁸ Fumu amavosa rie: Muna bilumbu bieni ngodubunga jenu botsu.

¹⁹ Pa bowivula rie: Dibandu yi Fumu aguvu Nsambi etu etuvayili motsu mana? Ndeʼ Jeremie gukabawagula rie: Mu mbari dumambusa na dumasalila bansambi bangana o dilongu dienu, dedi mosi dusalila benyi o dilongu adigaa dienu.

Musuga uNsambi umabusu

²⁰ Basamuni bulumbu buebubu ombu bategula baJacob, babunyavisi ombu baJuda na vosanu rie:

²¹ Guluanu adidi! Jenu biduka na adugaa na dujabu. Jenu aduvu na misu tumba dugelabi, jenu aduvu na matuji tumba dugegulu.

²² Fumu amawivula rie: Jenu dugonduma? Dugoteyimina? La menu agumavega mubu mandilu mayisieyi, mandilu ama ugolobuga; mibiji mifunduyi tumba migolobuga mandilu.

²³ Jenu duvu na kanda na duvu mimbini; dumapembuga na dumayenawendanga.

²⁴ Dugevosi rie: Tudumianu Fumu Nsambi etu oyinoyisi mfula va temu jiwelimina nesi mfula jitega nesi mfula jiusita, oyitukunsili bilumbu bidutsonsugu.

²⁵ Mabi menu mamadutsiemusa maboti meni, masumu menu mamadupatula monyi.

²⁶ Va gari batu bami vavu batu abagekipi yitu nesi migaga. Bavu nderi barela babatsoli ulega beleyi, berambi mirambu na bewakusulu batu.

²⁷ Nana dikuba divu dibasa na batsoli, mandagu mogu mamabasa na ndunsulu; anana bedilili mangolu nesi busina.

²⁸ Bevongi na beputi tindi uputa, beviosulili uvaganga mabi. Bagewamusi batu, nesi bisiana. Bagekipi dusungugu dubijaga.

²⁹ Fumu amawivula rie: Ngokilisa batu mu mambu mamunogu eni? Ngogabusila bisi dilongu dieni pila?

³⁰ Mambu mamuinsi nesi mansoruru mevagungu mu bulongu buebubu:

³¹ babiyitsi bebiyi mfurulu. Bavagulitsi bapagu berumi nana berondili, batu bami belabi ubueji na motsu mana. Yi duvaga va disukusulu?