Jeremie 46 - La Sainte Bible en Langue Yipunu

¹ Mambu maFumu amamatsingula Jeremie mubiyitsi mu diambu dimalongu.

Ubetsu ubisi Egypte o Kerkemich

² Diambu diEgypte na dibadi diPharaon Neco kaga jiEgypte. Amatsana bebeli na mujamba uEuphrate o Karkemich ava Nabucodonosor kaga jiBabylone amamubetsila. Dimalabana mu yilima yimuina yiJoaquim muana dibaala uJosias agumaba kaga jiJuda.

³ Bagora begamuyi rie: Kunsanu ngubu tsigeyi nesi tsineni wendanu uyetoga.

⁴ Duisanu bakabala, babeyitsi babakabala nangamanu! Duaranu bisiemba bienu, liomisanu makongu menu, duaranu bikutu bimadilu!

⁵ Yi nyilabi? Gomajivu nogu! Ugabuga begabuyi mansinsima; bagora bogu abavu na mangolu bamabetsu; urina berini, begengili o nsima. Fumu amavosa rie: Dunsiensi duneni duvu yiari na yiari.

⁶ Abewendi wa mbangu bagokegobula! Ngogaga agorina, via! O yiari yibanda mu masimu maNil besietuyi na beberuyi.

⁷ Anyi ebagunu na Nil nesi mujamba agumabasa nyidu?

⁸ La Egypte! Evosi rie: Nana Nil umabasa nyidu, nesi ufunduganga, meʼ wami nyubasa butamba, nyubunga misiengi na botsu abetsani muna.

⁹ Bakabala, matanu! Makalu, lensanu! Bangogaga lensanu, bisi Kouch na bisi Pout, duaranu bangubu! Bisi Loud, salisanu bapita!

¹⁰ Yilumbu yieyiyi yivu yiFumu aguvu Fumu Mabadi; yivu yilumbu yikabusulu pila ayi egabusili bavinitsi bandi pila. Dijenga divu nderi mukuimbi nyoga aguigukuru dikura diandi, aguilangi malungu mogu. Ka muna dubungu du duvu na Fumu Mabadi o bulongu ubandila o banda te no masimu maEuphrate!

¹¹ Egypte wenda o Galaad uyeromba bilongu! Kulini guibirombili, dugomuebeluga.

¹² Bisi malongu bamalaba yisonyi yienu. Migamu mienu mimabasa bulongu; bagora besindisini ava besietuyili, botsu babeji beberuyi va mosi.

Ubetsu ubisi Egypte

¹³ Fumu amatsingula Jeremie mubiyitsi ava durugu duNabucodonosor kaga jiBabylone agumaronda utumuna Egypte mambu memama rie:

¹⁴ Disamunianu o Egypte, nesi ditubulianu o Migdol, ditubulianu wandi o Memphis nesi o Tapanes! Vosanu rie: Retsamanu na kunsamanu, divita usielasana disielisini abebambini nenu.

¹⁵ Diambu yi? Je bangogaga bagu bamagudusu? Bagewari, Fumu amababetsa.

¹⁶ Amasietula bapuela bapuela na uberuga beberuyi bamosi va julu basusu. Bevosi rie: Tʼwendianu, tugabuyianu ombu batu betu o bulongu buetu, vala na dijenga dimubungitsi!

¹⁷ Avana begamuyi rie: Pharaon kaga jiEgypte avu yika nduku jikulini; amakeviosila temu.

¹⁸ Kaga, agu diina diandi divu Fumu Mabadi amavosa rie: Nyijabi! Nana mukongu uTabor na nana mukongu uCarmel uvu va mugula mubu anana muvinitsi eruyili wandi.

¹⁹ Bisi Egypte kunsanu mifuna uyenawendanga o bukoli! Musiengi uMemphis umasiala mududu.

²⁰ Egypte buvu nderi muana ngombi. Pegu uruga jiruyi o yiari yibanda.

²¹ Basalitsi bandi wandi bavu nderi baana bangombi. Jogu wogu bamageluga na bamarina tsiri utsikadana. Maguga mogu mamabatsogumunu, ukilusu bekilusu.

²² Mifumba miogu megulunu nderi minyoga, bavinitsi uruga beruyi; dibadi adivu na mumbi uyitoga, nderi bariabitsi bamikansu.

²³ Uwanga bewangi musiru andi diuleba yiri ugekotu; jogu bavu bapuela bapuela ne uviolia makokoku bagorungula utalu.

²⁴ Egypte yisonyi elabi, amawakusu ombu bisi banda.

²⁵ Fumu Mabadi aguvu Nsambi Israel jandi rie: Guluanu nyukilisa Amon, nsambi jiThebes nesi Pharaon muisi Egypte na bansambi bandi na bakaga bandi.

²⁶ Nyubawakisa ombu jogu aberondi ubaboka nesi ombu Nabucodonosor kaga jiBabylone na bagora bandi. Adina dinovioga Egypte omuebanganga nana va kala. Menu Fumu agumaditubula.

Israel amawaku kalala

²⁷ Ndeʼ Israel musalitsi ami guyalaba keri; Ndeʼ Jacob guyaregama! Mu mbari nyuguwaka kalala o bulongu buvala, nyuwaka bategula bagu kalala o bulongu abu bavu bakoli; Israel gugabuga, guba sui novumanga na vagoba mutu ugupupisa.

²⁸ Fumu amavosa rie: Ndeʼ Jacob musalitsi ami guyalaba keri! Mu mbari nyiji nagu. Nyubunga malongu motsu ama nyimagupansila, tumba ngogubunga; nyugusiemba na dusungugu, ngorungula utsimisa misu nderi gugaa na diambu.