Jeremie 44 - La Sainte Bible en Langue Yipunu

Bulumbi ombu baJuda abamasuema o Egypte

¹ Fumu amatsingula Jeremie bulumbi mu diambu dibaJuif botsu abamatsananga o bulongu buEgypte o misiengi miMigdol nesi o Tapanes nesi o Memphis nesi o yiari yiPatros rie:

² Fumu Mabadi aguvu Nsambi Israel jandi rie: Dumalaba maguga motsu ama nyimalasa bisi Jerusalem nesi o misiengi miotsu miJuda. Namunyi yika bivongu bivu na batu basatsi.

³ Dimalabana mu diambu dimbivulu tsiogu ava bamanyoyisila uvagula bima bimbunga jiboti nosalila bansambi bangana. Diuleba basamajaba bansambi beni ne jenu ne bataji benu.

⁴ Nyimadutindila basalitsi bami botsu na babiyitsi na nyimabatindanga udutsingula rie: Duyavaga nsoruru tsieni atsi nyivini.

⁵ Tumba dusamagulu na dusamaliga matuji, dusamadunda mbivulu tsienu na dusamadunda uvagula bima bimbunga jiboti ombu bansambi bangana.

⁶ Kabu ami na fuiri ami bimanyava na bimasielasana misiengi miJuda na mansila maJerusalem amavu yika bivongu na bivongu nana milabini namunyi.

⁷ Jeremie amabuesa rie: Namunyi Fumu Mabadi aguvu Nsambi Israel jandi rie: Dibandu yi duikevayila dibi dineni? Dibandu yi duibokisi babaala na bagetu na baana na abavu va tulu? Dugerondi yiri duba na bansialutsu?

⁸ Dibandu yi duinyoyisi na bisalu bienu ava duivagulili bima bimbunga jiboti ombu bansambi bangana babulongu buEgypte abu dumayisuemina. Je duirondi ubokusu nolasu mulogu nesi ulasu yisonyi va gari bisi malongu motsu?

⁹ Dumalibana mabi mabataji benu nesi mabi mabakaga baJuda nesi mabi mabataji bogu nesi mabi menu nesi mabi mabagatsi benu ama bamavaga o bulongu buJuda nesi mu mansila maJerusalem?

¹⁰ Basamakesunsa te na namunyi; basamalaba goma; basamaduka migaga miami na maruma mami abi nyimasunsa va gusu enu nesi va gusu bataji benu.

¹¹ Mbana Jeremie amabuela rie: La dibandu Fumu Mabadi aguvu Nsambi Israel amavosila rie: Nyimadutungila dusisi uduvayila dibi nobokisa baJuda botsu.

¹² Nyubonga bansialutsu baJuda abamageluga uwenda o bulongu buEgypte uyesuema; jogu botsu bosiegalana. Avana bofuila; bamosi boboku na divita na basusu na dungosu dunsala ubanda na tindi ngebi te na tindi yivunda; nyiina, anana bobokusulu; na miina mogu mosalusu uwarisa mulogu nesi ubalasa yisonyi.

¹³ Nyukilisa jogu abetsani o Egypte dedi mosi nana nyimakilisila bisi Jerusalem na divita na dungosu dunsala na yivunga.

¹⁴ Ne mutu mosi agorina ne mutu mosi agodila monyu va gari bansialutsu baJuda abamaruga uyetsana o Egypte. Abamaronda ugabuga o Juda umueyetsana; bagomuegabuga yika mua binsialutsu.

Pagu atsimavagululu Astarte

¹⁵ Mbana babaala botsu abamajaba yiri bagatsi bogu bamavagulila bansambi bangana bima bimbunga jiboti va mosi na bagetu bapuela abamaba vana na batu botsu abamatsananga o yiari yiPatros o bulongu buEgypte bamawaka Jeremie rie:

¹⁶ Tugogudedila ne mu diambu dimosi mu motsu ama gumatutsingula mu diina diFumu.

¹⁷ Tumba tuvaga nana tumavanginina: uvagulila Astarte bima bimbunga jiboti nesi pagu tsiunu nana tumavayilanga; jetu na bataji betu na bakaga betu na basalitsi bakaga o misiengi miJuda nesi o mansila maJerusalem. Va temu eni tumabanganga na mapa mawelimina ugukuru na tumalabanga nsangu na tusamalabanga maguga.

¹⁸ Yiotsu ayi tugemuevagulila Astarte bima bimbunga jiboti nesi pagu tsiunu, biotsu bimatugambu na tumasielusunu na divita na dungosu dunsala.

¹⁹ Bagetu bamabuela rie: Ava tumavagulila Astarte bima bimbunga jiboti nesi pagu tsisusu, je tusamadivaganga na musuga ubalumi betu? Basamajaba ava tumamuvagulila mapa nesi pagu tsiunu?

²⁰ Jeremie amawaka batu botsu nesi babaala nesi bagetu nesi abamamuwagula rie:

²¹ Je Fumu asamarangimina nesi utasa bima bimbunga jiboti abi dumavagula o misiengi miJuda nesi o mansila maJerusalem jenu na bataji benu na bakaga benu na basalitsi bakaga na bisi bulongu buotsu?

²² Fumu asamarungula umueduwarila mu diambu dimbivulu tsienu na mu diambu dinsoruru atsi dumavaganga; na bulongu buenu bumakaluga diguki dibivongu na bivongu na bumalogu nana builabini namunyi.

²³ Dumavagulila bansambi bangana bima bimbunga jiboti na dumavaga masumu va gusu Fumu na dusamagululu diufi diFumu nesi ukelisa migaga miandi na maruma mandi na bingitsi biandi la dibandu duilabili maguga memama namunyi.

²⁴ Jeremie amamuetsingula batu botsu nesi babaala nesi bagetu rie: Jenu baJuda botsu aduvu o bulongu buEgypte guluanu mambu maFumu!

²⁵ Fumu Mabadi aguvu Nsambi Israel jandi rie: Jenu na bagatsi benu dumalevosa rie: Tuirondi udugusu pangini atsi tumavangana: uvagulila Astarte bima bimbunga jiboti nesi pagu tsiunu. Vaganganu nana dumavanginina, dingensa vaganganu.

²⁶ Jenu baJuda botsu aduitsani o Egypte guluanu mambu maFumu! Fumu amavosa rie: Guluanu, nyilevi pesi na diina diami dineni rie: Diina diami digomueyitsu na baJuda ne umosi. O bulongu buotsu buEgypte ne mutu mosi agomueleva pesi rie: Fumu aguvu Fumu ejabi!

²⁷ Guluanu nyubagengila yisuisu ubavaga dibi tsiri diboti na baJuda botsu abavu o bulongu buEgypte bosielusunu na divita nesi dungosu dunsala.

²⁸ Mua dutalu dugeyi dujogu abagoboku na divita o bulongu buEgypte bogabuga o bulongu buJuda. Tumba bansialutsu botsu baJuda na botsu abamaruyila o bulongu buEgypte uyesuema guna bojaba mambu manyi mamadugusu; amami vo amenu.

²⁹ Fumu amavosa rie: Guluanu nyudulasa diambu adiudujabisa yiri nyudukilisa va mbura ejiji. Mbana dujaba yiri mambu mami modugusu udulasa maguga. Diambu adidi rie:

³⁰ Fumu amavosa rie: Nyuwakisa Pharaon Hofra kaga jiEgypte ombu bavinitsi bandi aberondi umuboka, dedi mosi nana nyimawakisila Sedecias kaga jiJuda ombu Nabucodonosor kaga jiBabylone agumaba muvinitsi andi agumaronda umuboka.