Jeremie 43 - La Sainte Bible en Langue Yipunu

Jeremie amatsotsu uwenda o Egypte

¹ Ava Jeremie amamanina utsingula batu botsu mambu motsu maFumu Nsambi ogu, mambu meni motsu ama Fumu Nsambi ogu amamuruma ubatsingula,

² Azaria muana dibaala uHochaya na Yohanan muana dibaala uCarea na bango dunangu botsu bamatsingula Jeremie rie: Ufura guifuri; Fumu Nsambi etu agaguruma ututsingula rie: Duyawenda o Egypte uyesuema.

³ Tumba Baruch muana dibaala uNeria egusibisi utuwakisa ombu bisi Babylone yiri botubokisa nesi utubega bakoli o Babylone.

⁴ Johanan muana dibaala uCarea na bivunda biotsu bibagora na batu botsu bamabusa ugulu diufi diFumu agumabaruma utsana o bulongu buJuda.

⁵ Johanan na bivunda biotsu bibagora bamabonga bansialutsu baJuda, abamalepansiga o malongu motsu umuegabuga utsana o bulongu buJuda

⁶ ababa: babaala na bagetu na baana babagetu bakaga na batu botsu aba Nebouzaradan yivunda yibakelisi bamakotulu amasila na Guedalia muana dibaala uAhicam na mutegula uChafan na Jeremie mubiyitsi na Baruch muana dibaala uNeria.

⁷ Bamawenda o bulongu buEgypte, diuleba Fumu amabagandisa; bamatola o Tapanes.

Jeremie utubula etubuli amolabana

⁸ Mambu maFumu mamatsingulu Jeremie o Tapanes rie:

⁹ Va gusu baJuda bonga mua mamanyi maneni na masueyi va dikotulu dindagu Pharaon ajivu o Tapanes.

¹⁰ Gukabatsingula rie: Fumu Mabadi aguvu Nsambi Israel jandi rie: Nyusindiga mutu uyenengila musalitsi ami Nabucodonosor kaga jiBabylone. Nyumusingisa ukunsa yitsiga yiandi yibufumu va julu mamanyi memama amamasuegu vava. Va mbura ejiji orangiyila ndagu andi jibukaga.

¹¹ Ava oruyila odimbisa bisi Egypte. Bamosi bofu, basusu bobegu bakoli na basusu bobokusu!

¹² Nyusingisa mandagu mabansambi baEgypte unyensu; Nabucodonosor omanyensa nesi bakosi bamosi na basusu obabega nandi. Oliomisa bulongu buEgypte dedi mosi nana mubungulitsi ubindombu eliomisili yikutu yiandi ayimabasa na migenyi; mbana oyenawenda na polu.

¹³ Obula bitumba biHeliopolis o bulongu buEgypte na onyensa mandagu mabansambi baEgypte.