Jeremie 41 - La Sainte Bible en Langue Yipunu

¹ Mu tsungi jimusambuali Ismael muana dibaala uNetania muana dibaala uElchama muisi ndagu kaga amawenda na baneni bakaga na yigumi yibabaala ombu Guedalia o Mispa. Avana bamaji va mosi.

² Mbana Ismael amaretsama na yigumi yibabaala abamaba nandi na bamadimba Guedalia na dijenga; anana bamabokila jandi agu kaga jiBabylone amavaga murumitsi ubulongu.

³ Mbana Ismael amaboka baJuif botsu abamaba na Guedalia o Mispa na bagora baBabylone abamaba vana.

Ismael amaboka magumidunana mabalinsi

⁴ Mu yilumbu yimubeji banovuna Guedalia batu mbe basakadijaba.

⁵ Magumidunana mababaala bamaruyila o yiari yiSichem no yiari yiSilo no yiari yiSamarie abamafuga biedu na abamapasa biduaru na abamakenemisa; bamabega pagu na bima bimbunga jiboti ubiwakisa o Ndagu Nsambi.

⁶ Ismael amareyila upala o Mispa; amayenawendanga noiila. Anobenguna nogu amabanengila rie: Tʼwendianu ombu Guedalia.

⁷ Ava bamatolila o musiengi, Ismael na batu abamaba nandi bamabatabula miuru na bamababuaga o yiduna yimamba.

⁸ Tumba va gari ogu vamaba yigumi yibabaala abamalenda Ismael rie: Guyatubokisa, tuna biguji abimasuegu o musiru: ble na orsa na matsi na buji. Kabogu asamababoka va mosi na baana bataji bogu.

⁹ Yiduna yimamba ayi Ismael amabuaga bamfumbi botsu yimaba ayi Kaga Asa amatimisa ava amatoyila Bacha kaga jiIsrael. Ismael amayibasa bamfumbi.

¹⁰ Ismael amakotisa botsu abamasiala o Mispa o tsugu ne baana babagetu bakaga nesi batu botsu abamatsananga guna aba Nebouzaradan yivunda yibakelisi badikotulu amawakisa ombu Guedalia; Ismael amababega bakoli uyesabuga o yiari yibaAmmon.

Bakoli baIsmael bamawaku kalala

¹¹ Johanan muana dibaala uCarea na bivunda biotsu bibagora abimaba nandi bamagulu dibi adi Ismael amavaga.

¹² Kabogu bamagunga babaala botsu na bamawenda uyetoga na Ismael. Bamamurasuna va mugula matanga maneni maGabaon.

¹³ Ava bakoli botsu abamaba na Ismael bamalabila Yohanan na bivunda biotsu bibagora abamaba nandi, bamalaba tindi nsangu.

¹⁴ Batu botsu aba Ismael amabeyila o Mispa bamayenayinguga na bamayefubana na Yohanan.

¹⁵ Tumba Ismael amarina na yinana yibabaala o gusu Yohanan na amagabuga o yiari yibaAmmon.

¹⁶ Yohanan na bivunda biotsu bibagora abimaba nandi bamabega bansialutsu botsu aba bamawaka kalala ombu Ismael aba amabeyila o Mispa yiotsu ayi Guedalia amafu; diwendi rie: bagora na bagetu na baana na mivangu botsu bana Yohanan amabeyila o Gabaon.

¹⁷ Bamayenawenda na bamalesikama va ndagu benyi jiKimeham bebeli na Bethleem muna nsila utola o Egypte,

¹⁸ vala na bisi Babylone aba jogu bamadumanga mu mbari Ismael amaboka Guedalia agu kaga jiBabylone amavaga murumitsi ubulongu.