Jeremie 40 - La Sainte Bible en Langue Yipunu

Jeremie utsana etsani o Mispa

¹ Fumu amamuetsingula Jeremie mambu ava Nebouzaradan yivunda yibakelisi badikotulu amamusingisa uweʼ o Rama. Jeremie amaba atungu bapanga va gari bakoli botsu baJemsalem na baJuda abamabegu o Babylone; avana yivunda yibakelisi bamakotulu amamubongila.

² Amasindiga mutu uyenengila Jeremie nomutsingula rie: Fumu Nsambi agu amatubulila musiengi egugu maguga memama.

³ Fumu amadugusu ama amabiga na dumamalaba mu mbari dumavayila Fumu dibi na dusamagulu diufi diandi.

⁴ Kabogu namunyi nyigunyanguli bapanga; pa guirondi uwenda nami o Babylone, tʼwendi nyugukelisa buranga; pa gugelabi diwelimina uwenda nami o Babylone ka tsana; bulongu buotsu abuagu. Gurungula uwenda o mbura aji guirondi uwenda.

⁵ Jeremie anotsikadana uwagula amabuela rie: Gabuga ombu Guedalia muana dibaala uAhicam mutegula uChafan agu kaga jiBabylone amavaga murumitsi umisiengi miJuda, tsana nandi na batu beni vo wenda mbura yika la mbura aji gulaba jiwelimina uwenda. Yivunda yibakelisi bamakotulu amamuvega biguji nesi badoli na amamuganina.

⁶ Jeremie amawenda o Mispa ombu Guedalia na amatsana nandi va mosi na batu abamasiala o dilongu.

BaJuda ugukama begukimi ombu Guedalia

⁷ Ava bivunda biotsu bibagora abimaba o kumu bamagululu yiri kaga jiBabylone amavaga Guedalia muana dibaala uAhicam murumitsi ubulongu na amamuwakisa babaala nesi bagetu na baana na bijaga abasamabegu bakoli o Babylone.

⁸ Bivunda bibagora beni bamarasuna Guedalia o Mispa, abamawenda ababa: Ismael muana dibaala uNetania na Yohanan na Yonatan baana bababaala baCarea na Seraya muana dibaala uTanehoumet na baana bababaala baEfai muisi Netofa na Yezania muana dibaala uMaaka.

⁹ Guedalia amavangana nogu rie: Duyaduma usalila bisi Babylone, tsananu mu bulongu nokesunsa o tsi durumu dukaga jiBabylone. Nyivangini nenu, dugoba na diambu.

¹⁰ Guluanu utsana nyitsani va Mispa uba yikambi ombu bisi Babylone aberuyi ombu getu. Jenu dukagukiga malamu na milunda miyitsubi na matsi; dukabisuega mu bisuegulu bienu na tsananu o misiengi mienu.

¹¹ BaJuda botsu abamaba o bulongu buMoab nesi ombu baAmmon nesi o bulongu buEdom nesi malongu motsu masusu, bamagulu yiri kaga jiBabylone amasila bansialutsu o Juda na amabavega Guedalia uba murumitsi ogu.

¹² Kabogu baJuda botsu bamaruyila o biari biotsu abi bamapansiyila na bamagabuga o Juda ombu Guedalia o Mispa na bamagukiga digumba dineni dimalamu na milunda miyitsubi.

Mubokitsi uGuedalia

¹³ Yohanan muana dibaala uCarea na bivunda biotsu bibagora abimaba o kumu bamawenda ombu Guedalia o Mispa.

¹⁴ Bamamuwivula rie: Guijabi yiri Baalis kaga jibaAmmon amaruma Ismael muana dibaala uNetania uguboka? Tumba Guedalia asamadivayila yitu.

¹⁵ Yohanan amawivula Guedalia o museuga o Mispa rie: Guirondi yiri nyuwenda uyeboka Ismael? Mutu agodijaba. Dibandu yi ogubokisa? Dibandu yi baJuda botsu abamagukama ombu gagu bomuepansiyila? Dibandu yi bansialutsu baJuda bomuepansiyila?

¹⁶ Guedalia amawaka Yohanan rie: Guyadivaga; gumatsimbu mu diambu diIsmael.