Jeremie 4 - La Sainte Bible en Langue Yipunu

(Fumu)

¹ Fumu amavosa rie: Israel pa gugabuga pa gugabuga ombu gami pa gugusula nsoruru tsibakosi bagu va gusu ami gugomueba yilayilayi.

² Pa guvu usigama na pa guwenda sungingi na amami ava gulevila pesi na diina diami rie; Fumu ejabi! Mbana malongu mabapayi mokwivula ubagabila miula na bokitsa wandi.

³ Fumu amavosa na baJuda na baJerusalem rie: Futsanu nungi jigona duyamuevara va gari matsiendi.

⁴ Keliomisanu ukitsa rebulilanu mirima mienu, jenu babaala baJuda na bisi Jerusalem. Pa tsiri nana mbivulu tsienu tsiurombisa kabu ami usunda ubanga nderi muji agu mutu agorungula utsimisa.

Mugamu umagulunu o Juda

⁵ Gamuganu o Juda notsingula o Jerusalem rie: Siyisanu mumbanda! Gamuganu na diufi o julu rie: Gukamanu na tʼwendianu o misiengi mikandu!

⁶ Religanu yilimbu o Sion, rinanu, duyasikama! Fumu obeyila diguga nesi dubungu duneni o banda.

⁷ Yimbungu yimapalila o yisuemunu yiandi, mubungitsi umalongu amarelama amagusuga o mbura andi uyenabivisa bulongu buagu; misiengi mienu miubungu, miusiala yika mududu.

⁸ Duaranu basiela, lilanu na tsukamanu; mu mbari kabu jineni jiFumu jigosaguga, jiutudukanga.

⁹ Fumu amavosa rie: Muna yilumbu yieni kaga na barumitsi bagomueba na mangolu, bavagulitsi bapagu bokambulu, na babiyitsi bosutusu.

¹⁰ Bovosa rie: Fumu ndeʼ aguvu Fumu kabogu gumadunsa batu bebaba nesi bisi Jerusalem. Gumavosa rie: Dubanganga na duvotsu! Labati uboku tuiboku, dibaga divu va kingu!

Benyi bavu yiari na yiari

¹¹ Vana temu eni, Fumu ovosa na bisi Jerusalem rie: Mungudi uneni uigumbili mu julu tsimikongu, uigumbili batu bami; tsiri mua punga jigeyi usayila ble.

¹² Uvu mungudi uneni aguiruyili guna na musuga ami. Utabula nyitabulili batu bami bunsonsi.

(Batu)

¹³ Labatianu, mubungitsi uruga eruyi nderi mamungi mamungudi; makalu mandi mavu nderi yimbongila, bakabala bewendi mbangu ne uviolila bambira. Ka muna maguga ma! Tumabungu!

(Fumu)

¹⁴ Jerusalem, pa guirondi uwaku kalala, gusula mabi motsu mu murima agu. Te na temu yi gukelisilanga tasulu tsiagu tsikulini o gari murima agu?

¹⁵ Gulu diufi adiruyili o yiari yiDan nesi misamu mipurulu amiruyili o mukongu uEfraim.

¹⁶ Lubusanu batu botsu, tsingulanu bisi Jerusalem rie: Bavinitsi uruga beruyi, beruyili o malongu mavala; ugamuga begamuyi migamu midivita utumuna misiengi miJuda.

¹⁷ Utsiengila betsiengili Jerusalem nderi jogu abekelisi nungi. Fumu evosi rie: Motsu mana mavu mu mbari bamambusa.

¹⁸ Aa Jerusalem, bifu biagu bimagurombisa motsu mana; ayina la yisaku yimbivulu tsiagu. Nyiina, purulu tsiugunyongisa tindi ugunyongisa.

Jeremie ubela ebeli

¹⁹ Ngeba menua! Ngeba menua! Nyiji mu diguga; murima ami yika buali, ngorungula uvola sui! Nyimagulu diufi dimumbanda na migamu midivita.

²⁰ Bamatubula dubungu va julu dubungu; bulongu buotsu bumabungu. Mandagu metu mamatsanda mamasundila uberuga bisuemunu bietu bimasundila ubungu.

²¹ Te na temu yi nyulabila yilimbu yidivita? Te na temu yi nyugulungu diufi dimumbanda?

²² Dingensa batu bami bavu biduka, na bagenjabi. Bavu baana abagaa na diela nesi dujabu; bamaguku uyenavaganga mabi tumba bagejabi uvaganga maboti.

²³ Nyimagengila butamba, bumaba vumbila na pavala; julu jimatsiemusa bijalala.

²⁴ Nyimagengila mikongu, labatianu mimakungusu na bikundubuga biotsu bimapupusu.

²⁵ Nyimagengila, batu basatsi nesi batsoli botsu bamapurumuga.

²⁶ Nyimagengila, labatianu butamba bunyega bumakaluga kumu; misiengi miotsu mimabungu na kabu jineni jiFumu.

²⁷ Fumu amavosa rie: Bulongu buotsu buba yika dukanga na dukanga tumba ngobunga biotsu.

²⁸ La dibandu bulongu buvu mu yifuila, na julu jimapindusu; nyimadivosa na nyimaditabula ngovinsa kingu nogabuga mansinsima, via!

Sion na bikongu

²⁹ Bisi misiengi botsu bamarina ava bamagululu nduku tsibakabala nesi tsibarela badupalu; bamakota o musiru na bamamata o julu tsimamanyi; misiengi miotsu mimasiala mududu, batu basatsi.

³⁰ Ndeʼ Jerusalem gumabungu, Yi guvaga? Diuleba guiduari matsanda mabenga nesi kembu tsilora nesi uroyisa misu, kulini guivayi motsu mana; maronda magu begulensi, berondi uguboka.

³¹ Nyimagulu migamu nderi mimugetu aguibuki na misongu, migamu mimaguga miduburu dutega. Mivu migamu miSion; utsukama etsukimi, usamba esambi makaka nogamuga rie: Ka muna maguga ma nyilabi! Utabuga nyitabuyi nyambu va gusu bikongu!