Jeremie 39 - La Sainte Bible en Langue Yipunu

¹ Mu yilima yimufu bidurumu duSedecias kaga jiJuda mu tsungi jimugumi, Nabucodonosor kaga jiBabylone amaruga na dibadi diandi diotsu ukanda Jerusalem.

² Mu yilima yiyigumi na yimosi mu yilumbu yimufu bitsungi jimuina bamatoba diviogulu o musiengi.

³ Basalitsi botsu bakaga jiBabylone bamakweka na bamatsana va dikotulu adi gari. Abamatsana vana ababa: Nergal-Saresser agumaba yivunda yibatu badiela na Samgar-Nebo na Sar-Sikim na Nergal-Saresser na basalitsi basusu abamaba batu baneni o ndagu kaga jiBabylone.

⁴ Dinojabunu yiri baji vana Sedecias kaga jiJuda na bagora botsu bamabarina; bamagusuga mukolu o musiengi, bamavioyila o nsila jijnungi kaga va dikotulu adivu va gari bibaga bibeji, mbana bamavioyila o nsila jikumu.

⁵ Tumba bagora baBabylone bamabaduka na bamarasuna Sedecias o kumu tsiJericho. Bamamugaanga na bamamubega ombu Nabucodonosor kaga jiBabylone o Ribla o bulongu buHamat; avana Nabucodonosor amamutabulila bunsonsi.

⁶ Kaga jiBabylone amatabusa baana bababaala baSedecias miuru va misu mandi mbana amatabusa na baneni botsu baJuda miuru.

⁷ Mbana amatobisa misu maSedecias na amamutungisa na bapanga bakunga umubega o Babylone.

⁸ Bisi Babylone bamanyensa ndagu jikaga na mandagu masusu na bamarakula bivaga biJerusalem.

⁹ Nebouzaradan yivunda yibakelisi bamakotulu amabega abamatsananga o musiengi bakoli va mosi na abamakumuga.

¹⁰ Tumba amasila mua bamosi abamaba bijaga diwendi rie: abasamaba na mangolu; kabogu amabavega nungi tsimfuga tsirayisan na manungi.

Jeremie amajegusu

¹¹ Nabucodonosor kaga jiBabylone amavega diruma ombu Nebouzaradan yivunda yibakelisi bamakotulu mu diambu diJeremie rie:

¹² Mubongi na mukelisi buranga guyamuvaga dibi diotsu; tumba muvayili nana ogutsingulanga.

¹³ Nebouzaradan yivunda yibakelisi bamakotulu na Nebouchazban yivunda yimivangu na Nergal-Saresser yivunda yibatu badiela na basalitsi botsu bakaga jiBabylone,

¹⁴ bamasindiga mutu o dulombili dutsugu uyenengila Jeremie na bamamuwakisa ombu Guedalia muana dibaala uAhicam mutegula uChafan. Amamugabusa o ndagu andi; amamuetsana va gari batu bandi.

Bulumbi ombu Ebed-Melek

¹⁵ Mambu maFumu mamatsingulu Jeremie ava amabiia abindugu o dulombili dutsugu rie:

¹⁶ Wenda yetsingula Ebed-Melek muisi Ethiopie rie: Fumu Mabadi aguvu Nsambi Israel jandi rie: Nyudugusu mambu ama nyimavosila musiengi egugu; mambu mabiʼ ama nyimavosa tsiri maboti, molabana na bilumbu biebibi va misu magu.

¹⁷ Fumu amavosa rie: Tumba muna bilumbu bieni nyuguwaka kalala na gugowakusu ombu batu aba guidumi.

¹⁸ Fumu amavosa rie: Nyugugobula na gugoboku; gugofu mu mbari gumapayila yitu.