Jeremie 37 - La Sainte Bible en Langue Yipunu

Kaga Sedecias unengila enengili Jeremie

¹ Sedecias muana dibaala uJosias amaruma va yivinga yiKonia muana dibaala uJoaquim; Nabucodonosor kaga jiBabylone amamuvaga kaga o Juda.

² Ne jandi ne basalitsi ne bisi bulongu basamagulu mambu maFumu ama Jeremie amamuvosila.

³ Kaga Sedecias amasindiga Youkal muana dibaala uChelemia na Sefania muana dibaala uMaasseya agumaba muvagulitsi upagu ombu Jeremie mubiyitsi uyemutsingula rie: Tusambilili Fumu Nsambi etu.

⁴ Kabogu Jeremie amalebanga va gari ogu mbe basakamukotisa o tsugu.

⁵ Mbana dibadi diPharaon dimagusuga o Egypte. Bisi Babylone bamakanda Jerusalem na banogulu musamu eni bamagusuga vana.

⁶ Mbana Fumu amatsingula Jeremie mubiyitsi rie:

⁷ Fumu Nsambi Israel jandi rie: Gukatsingula kaga jiJuda agumagusindiga ombu gami uyiromba diela rie: Guluati dibadi diPharaon adibetsi muna nsila uyiduwamusa, ugabuga digabuyi o bulongu buogu o Egypte.

⁸ Bisi Babylone bomuegabuga uyitumuna musiengi egugu, bogubonga na bogunyensa.

⁹ Menu Fumu nyidutsinguh rie: Duyakedunsa novosa rie: Bisi Babylone boturina vala! Bagorina.

¹⁰ Ne pa dudunbisa dibadi diotsu diBabylone adiudutoyisa, diurungula uba yiri va gari ogu voba yika abamanemusu ne nana mutu mutu oretsama o ndagu andi jitsanda na bonyensa musiengi egugu.

Jeremie amakotusu o tsugu

¹¹ Ava dibadi diBabylone dimakakinina na Jerusalem ugonga dibadi diPharaon,

¹² Jeremie amaronda ugusuga o Jerusalem uwenda o bulongu buBenjamin uyedila dikabu diandi va gari batu beni.

¹³ Ava amatolila va dikotulu diBenjamin, yivunda yibagora abamadikelisanga diina diandi Iria muana dibaala uChelemia mutegula uHanania amaba vana. Iria amagaanga Jeremie mubiyitsi na amavosa rie: Kabogu ombu bisi Babylone guiweʼ!

¹⁴ Jeremie amawaka rie: Ufura! Ngewendi ombu bisi Babylone. Tumba Iria asamadisinga via; amagaanga Jeremie na amamubega ombu basefu bandi;

¹⁵ bamanyoyila Jeremie na bamamudimba; bamamukotisa o tsugu o ndagu Yonatan agumaba musonitsi; kabogu ndagu andi jimaba tsugu.

¹⁶ Anana Jeremie amakotusulu o tsugu o yiduna ayimaba o tsi ndagu. Anotsinga guna,

¹⁷ Kaga Sedecias amasindiga mutu uyemunengila na amamuwivula bivu o musuega o gari ndagu. Amamuwivula rie: Guna mambu maFumu? Jeremie amawaguia rie: Nyiina. Mbana amabuela rie: Ndeʼ guwakusu ombu kaga jiBabylone.

¹⁸ Jeremie amawivula kaga Sedecias rie: Dibi yi nyimaduvayila jenu na basalitsi bagu na batu bagu adi dumakotisila o tsugu?

¹⁹ Babiyitsi benu agu bavu? Jogu abedubiyili rie: Kaga jiBabylone agoruga uyitoga nenu nesi na bulongu buebubu?

²⁰ Jeremie amabuela rie: Aa kaga, tsie leguluati, singa tindi usinga ndembu tsiami! Guyakabusa o ndagu Jonatan aguvu musonitsi mu mbari ngeyefu guna!

²¹ Kaga Sedecias amaruma batu ukelisa Jeremie va dulombili dutsugu na amaruma umuveganga dipa dimosi yilumbu na yilumbu te na mapa motsu mamasuka o musiengi. Anana Jeremie amatsaninanga va dulombili dutsugu.