Jeremie 34 - La Sainte Bible en Langue Yipunu

Bulumbi ombu Sedecias

¹ Nabucodonosor kaga jiBabylone na dibadi diandi diotsu na bufumu buotsu abumaba o tsi durumu duandi bamatoga divita na Jerusalem na misiengi miJuda. Va temu eni bulumbi buFumu bumatsingulu Jeremie rie:

² Menu Fumu Nsambi Israel nyigurumi rie: Wenda yevosa na Sedecias kaga jiJuda nomutsingula rie: Fumu jandi rie: Nyuwakisa musiengi egugu ombu kaga jiBabylone na ogunyensa.

³ Ndeʼ gugopatuga mu miogu miandi tumba gugaangu nowakusu ombu gandi na ndeʼ beni gulaba kaga jiBabylone na jenu nandi duvosasana na ogubega o Babylone.

⁴ Mbe ka ndeʼ Sedecias kaga jiJuda pa gudedila adi nyivosi gugoboku na dijenga. Menu Fumu oyiditubuli.

⁵ Gufu dutangi; nana bamanyensila bataji bagu bima bimbunga jiboti dedi mosi bogunyensila bionyi na bogulilanga ava bovosila rie: Aa Fumu, ngeba jetua! Kaga amafu! Menu Fumu oyiditubuli.

⁶ Jeremie mubiyitsi amaditsingula Sedecias kaga jiJuda; motsu mana mamalabana o Jerusalem.

⁷ Dibadi dikaga jiBabylone dimatoyisa Jerusalem na misiengi misusu miJuda: Lakich na Azeka.

Baviga bamajegusu mbana bamagabusu ombu bafumu bogu

⁸ Fumu amamuevosa na Jeremie va temu aji kaga Sedecias amavangana na bisi Jerusalem ujeyisa baviga.

⁹ Mutu mutu ajeyisi muviga andi udibaala nesi umugetu abamaba bisi Hebreu na ne mutu mosi agomuekelisa muana taji andi muJuif o buviga.

¹⁰ Barumitsi botsu na batu botsu bamavangana pangini; mutu mutu amavangana ujeyisa muviga andi udibaala nesi umugetu yiri bagomuebakelisa o buviga; bamajidedila, kabogu bamabajeyisa.

¹¹ Tumba va julu vana bamavinsa matasa; bamamuebonga baviga bababaala na babagetu aba bamalejeyisa na bamabatsotsa umueba baviga.

¹² Kabogu Fumu amaruma Jeremie uvosa rie:

¹³ Bulumbi buFumu Nsambi Israel abubu rie: Nyimavangana pangini na bataji benu. Yilumbu ayi nyimabapalisila o buviga o bulongu buEgypte. Nyimabatsingula rie:

¹⁴ Yisambuali yibilima binovioga mutu mutu va gari enu ojeyisa muana taji andi, muisi Hebreu agumadusumbusu; ogusalila bilima bisiamu-nu mbana vengu gumujeyisa. Tumba bataji benu basamakulu na basamaliga matuji.

¹⁵ Jenu duamakalula diela, dumavaga adivu diwelimina nami ava dumatubulila dujegusu dubatu nenu, dumavangana pangini va misu mami o Ndagu ami.

¹⁶ Tumba dumagabuga mansinsima na dumandensa; na dumamuebonga baviga bababaala na babagetu aba dumalejeyisa na dumamuebatsotsa uba baviga benu.

¹⁷ La dibandu Fumu amavosila rie: Dusamandedila uyenatubulila dujegusu dumutu mutu nesi muana taji andi nesi mutu nandi. Fumu amavosa rie: Nyutubula dujegusu dumunongu ususu: nyudurombisa divita na yivunga na dungosu dunsala na nyuduvaga yisanunu yibisi butamba buotsu.

¹⁸ Babaala abamakubula pangini abasamakelisa migaga mipangini aji bamavangana ava bamatabulila muana ngombi bibuku bibeji novioga va gari bionyi;

¹⁹ nesi barumitsi baJuda nesi bivunda biJerusalem nesi mivangu; nesi bavagulitsi bapagu nesi bisi bulongu; botsu abamavioga va gari bibuku bimuana ngombi;

²⁰ nyubawakisa ombu bavinitsi bogu nesi ombu jogu aberondi ubaboka na mfumbi tsiogu tsiudodungu na batsoli na makoju motsijanganga.

²¹ Nyuwakisa Sedecias kaga jiJuda na baana bandi ombu bavinitsi bogu; nyubawakisa ombu dibadi dikaga jiBabylone. Ne pa dibadi dieni diukakana nenu,

²² nyubaruma ugabuga o musiengi egugu; bogutumuna na bogubonga na bogunyensa. Nyuvaga misiengi miJuda nderi mbura ajigaa na mamba nesi batu. Menu Fumu oyiditubuli.