Jeremie 33 - La Sainte Bible en Langue Yipunu

Pangini tsigona mu diambu diJerusalem

¹ Jeremie mbe akivu abindugu o dulombili dutsugu ava Fumu amamuemutindila bulumbi,

² Fumu agumasunda butamba, Fumu agumabuwarisa nobubumba agu diina diandi divu Fumu jandi evosi rie:

³ Nsambili na nyuguwagula; nyugutsingula mambu maneni amamasuegu ama ndeʼ gugejabi.

⁴ Fumu Nsambi Israel evosi mu diambu dimandagu mamusiengi egugu na mandagu makaga jiJuda amopansu na bitogulu na majenga,

⁵ ava bobambinina utoyisa bisi Babylone bobasa mandagu memama na bamfumbi babatu aba nyuboka na kabu na fuiri; mu diambu dikanda tsibisi musiengi egugu nyubasuega yinsi yiami.

⁶ Nyubabuga na boba na polu; nyubabelusa na nyubaveganga duvotsu; nyubajabisa nsanunu ajivu tindi yiboti.

⁷ Nyugabusa baJuda na baIsrael na bomuetsananga nana na kala.

⁸ Nyubaliomisa mu mabi motsu ama bamapayilanga, nyubatandila mabi motsu ama bamandasila maguga amamabarombisa uba mimbini miami.

⁹ Musiengi egugu undasanga nsangu na duyitsu na bundumba, malongu motsu amogulu maboti ama nyubavayila mokambulu na mosutu mu diambu dimaboti motsu na digumba diotsu adi nyubaveganga.

¹⁰ Fumu amavosa rie: Bomuegulu va mbura ejiji aji duivosi rie: Jivu mbura ajigaa na mamba nesi batu nesi bibulu bagetsani muna; duivosi dedi mosi na misiengi miJuda na mansila maJerusalem rie: Mimasiala mududu, migaa na batu na migaa na bibulu,

¹¹ bomuegulu migamu minsangu nobueji na nyimbu tsimulumi na tsimugatsi na mufi majogu abevosi rie: Yitsanu Fumu Mabadi, Fumu avu muboti; Yingeba yiandi yiubanganga mutubu! Mufi majogu abevaguli pagu tsiunyensa na tsikabusulu tsimaboti mogulunu o Ndagu Nsambi. Nyugabusa bakoli na bomuetsananga nana na kala.

¹² Fumu Mabadi jandi rie: Va mbura ejiji ajigaa na mamba nesi batu nesi bibulu va misiengi mieni miotsu vomuelabana mandagu mababungulitsi babindombu abekelisi migamba miogu.

¹³ Fumu amavosa rie: O misiengi amivu o mikongu nesi amivu o kumu nesi amivu o tandu nesi amivu o bulongu buBenjamin nesi o yiari yiJerusalem no misiengi miJuda migamba miumuetalu.

Nsambi agopatula abi amavangana

¹⁴ Fumu amamuevosa rie: Namapapa nyududusulu mambu maboti ama nyimavosa mu diambu dibaIsrael nesi dibaJuda.

¹⁵ Va temu eni nyupalisila David tindi mutegula; olasanga dusungugu na musuga mu bulongu.

¹⁶ Muna bilumbu bieni Juda ojegusu, Jerusalem otsananga buranga; guluanu diina diandi: Fumu avu dusungugu duetu.

¹⁷ Fumu amavosa rie: David agogambu na yivinga yibufumu yibaIsrael.

¹⁸ Bavagulitsi bapagu na bategula baLevi bagogambu na yivinga, via; uvagulanga pagu tsiunyensa nesi unyensa bima bimbunga jiboti va mosi na pagu tsitsangu yilumbu na yilumbu.

¹⁹ Fumu amamuetsingula Jeremie rie:

²⁰ Menu Fumu nyivosi rie: Je gurungula ukubula pangini tsiami jinyangu na jimukolu va temu tsiwelimina? Tsatsabi!

²¹ Dedi mosi pangini ami jigokubuga na musalitsi ami David. Vobanganga baana bandi bababaala aborumanga va yitsiga yiandi yibufumu na bategula baLevi abavu bavagulitsi bapagu bosalanga yisalu yiami.

²² Nana bagorungulila utala bambuelili nesi uwetsiga yisieyi yimubu dedi mosi nyufunisila bategula bamusalitsi ami David na bategula baLevi abosalanga yisalu yiami.

²³ Fumu amamuetsingula Jeremie rie:

²⁴ Gugegulu ama batu bebaba bevosi? Bevosi yiri nyimabusa baIsrael na baJuda; mikuta mibeji ami nyimasola. Anana belensili batu bami na bagekipi yiri bavu dilongu.

²⁵ Guluanu nyivosi rie: Mbe nyisamavangana pangini ami na jinyangu na jimukolu na mbe nyisamavaga mandilu majulu na mabutamba,

²⁶ je nyurungula ubusa bategula baJacob na bamusalitsi ami David? Je ngomuebonga bategula bandi urumanga bategula baAbraham na balsaac na baJacob. Tsatsabi! Nyibarondi tindi uronda nyubagabusa o bulongu.