Jeremie 32 - La Sainte Bible en Langue Yipunu

Jeremie usumba esumbi nungi

¹ Mambu maFumu mamatsingulu Jeremie mu yilima yimugumi yiSedecias kaga jiJuda. Yimaba yilima yiyigumi na yinana bidurumu duNabucodonosor kaga jiBabylone.

² Dibadi diBabylone dimakanda Jerusalem va temu eni. Mbe ka Jeremie mubiyitsi amabindugu o tsugu ajimaba va dulombili dundagu kaga jiJuda.

³ Sedecias amaruma mutu umubindiga na amamuwivula rie: Dibandu yi guimbiyifi? Dibandu yi guivosili rie: Fumu jandi rie: Guluanu nyiwakisi musiengi egugu ombu kaga jiBabylone; jandi ogubonga.

⁴ Ne Sedecias kaga jiJuda agorina bisi Babylone; nyimatabula diambu umuwakisa ombu kaga jiBabylone. Vengu olabana va gusu Nabucodonosor nowagula amandi.

⁵ Fumu amabuela rie: Kaga jiBabylone ayenabega Sedecias o Babylone, otsana guna te na nyumuemurangimina. Ne pa dumuetoga na bisi Babylone dugolunga.

⁶ Jeremie amavosa rie: Mambu maFumu mamansingulu rie:

⁷ Guluati, Hanameel muana dibaala ukatsi agu Challoum uruga eruyi uyiguwivula rie: Gugosumba nungi ami ajivu o Anatot? Guna musuga uotsu na jionyi.

⁸ Hanameel muana dibaala ukatsi ami amatasuna o dulombili dutsugu na amansingula rie: Sumba nungi ami ajivu o Anatot o bulongu buBenjamin mu mbari ndeʼ guna musuga uotsu ujibialila, jisumbi! Mbana nyimajaba yiri mavu mambu ma Fumu.

⁹ Kabogu nyimasumba nungi jiHanameel ajivu o Anatot; nyimamupitsila lora jivema, tsimaba yigumi na yisambuali yimbongu.

¹⁰ Nyimasona muganda agu nyimanamiga yilimba, nyimabonga bambeji na nyimapitsa lora jivema mu mudodu.

¹¹ Va julu vana nyimabonga muganda udusumbu, agumanamugu yilimba udugusu migaga na agumaba udibulu.

¹² Mbana nyimawakisa muganda udusumbu ombu Baruch muana dibaala uNeria muana dibaala uMaasseya. Va misu maHanameel na va misu mabambeji abamasona miina mogu mu muganda udusumbu na va misu mabaJuda botsu abamaba o dulombili dutsugu

¹³ nyimaruma Baruch rie:

¹⁴ Fumu Mabadi aguvu Nsambi Israel jandi rie: Bonga miganda miemimi: muganda udusumbu na muganda udibulu agumanamugu yilimba; mipoduli o gari yisanga yiri migotsiemuga.

¹⁵ Fumu Mabadi aguvu Nsambi Israel jandi rie: Yilumbu yimosi bomuesumbanga mandagu nesi manungi nesi manungi mamfuga tsirayisan o bulongu buebubu.

Dusambu duJeremie

¹⁶ Nyimawakisa muganda udusumbu ombu Baruch mbana nyimasambila dusambu duedudu rie:

¹⁷ Aa Fumu Nsambi ndeʼ aguvu Fumu, labati ndeʼ gumavaga julu na butamba na mangolu magu motsu. Vagaa diambu adi ndeʼ gugonmgula uvaga.

¹⁸ Ndeʼ guilasi maboti magu te na tosini jikula na guikilisi baana mu diambu dimabi mabataji bogu. Ndeʼ guvu Nsambi aguneni, aguvu na mangolu, agu diina divu Fumu Mabadi.

¹⁹ Kanu tsiagu tsivu tsineni na bisalu biagu bivu na mangolu; ndeʼ guilabi motsu ama botsu bevayi yin gusaka mutu mutu dedi na bisalu biandi nesi na bifu biandi.

²⁰ Ndeʼ gumavaga bimaga na bilimba o bulongu buEgypte, guibivayi te na namunyi nesi o Israel na va gari batu, gumakevega diduma adivu nagu te na namunyi.

²¹ Na bimaga na bilimba na mangolu magu motsu ndeʼ gumapalisabatu bagu baIsrael o bulongu buEgypte.

²² Gumabavega bulongu buebubu abu gumavangana uvega ombu bataji bogu, bulongu buebubu abuvu na digumba dineni.

²³ Jogu bamakota na bamatsana muna. Tumba basamadedila diufi diagu na basamakelisa migaga miagu na basamavaga motsu ama gumabaruma uvaga. La dibandu namunyi guibalasili purulu tsietsitsi.

²⁴ Labati bikadi bibakanditsi bimamata bibaga bimusiengi ukandu; musiengi umawakusu ombu bisi Babylone abegutumuni. Berombi utubetsa na divita na dungosu dunsala na yivunga abi gumatubula bimalabana na guibilabi.

²⁵ Tumba Fumu ndeʼ aguvu Fumu gumatuma rie: Sumba nungi na lora jivema va gusu bambeji, diuleba musiengi umawakusu ombu bisi Babylone.

Fumu uwagula ewaguli Jeremie

²⁶ Mbana Fumu amakwagula rie:

²⁷ Gulu, menu nyivu Fumu Nsambi jibatu botsu. Je va diambu adi ngorungula uvaga?

²⁸ La dibandu nyivosili rie: Gulu nyuwakisa musiengi egugu ombu bisi Babylone nombu Nabucodonosor kaga jiBabylone; jandi ogubonga.

²⁹ Bisi Babylone abetumuni musiengi egugu bokota, bogutsabiga muji na bogunyensa va mosi na mandagu ama bamavagulila Baal bima bimbunga jiboti va julu tsimiansa nesi ama bamavagulila pagu tsiunu ombu bansambi bangana yiri bonyoyisa.

³⁰ Fumu amavosa rie: BaIsrael na baJuda bamavaganga yika mabi va misu mami ubanda vana bungebi buogu. Nyiina, baIsrael basamaba na disusu yika unyoyisanga nesi na bisalu biogu.

³¹ Musiengi egugu uipupisi kabu ami nesi fuiri ami, ubanda na yilumbu ayi bamagurungila te na namunyi; nyirondi ugutsiemusa va misu mami.

³² Mu diambu dimabi motsu ama baIsrael na baJuda bamavaga yiri bonyoyisa jogu na bakaga bogu na basefu bogu na bavagulitsi bogu bapagu na babiyitsi bogu na baJuda na bisi Jerusalem wandi.

³³ Bamandiyila nsima, basamamuekengila; nyimabalonsa na nyimabalonsanga tumba basamaronda ugulu nesi ulonsu.

³⁴ Bamakotisa nsoruru tsiogu o Ndagu Nsambi na bamajibivisa.

³⁵ Bamarungila Baal mbura tsiduyitsu o yibususu yiHinnom uyevagulila baana bogu bababaala na babagetu ombu Molek; nyisamabaruma dionyi; na nyisamatasa yiri bovaga nsoruru tsimunongu eni urombisa baJuda uvaga masumu.

³⁶ Mbana menu Fumu Nsambi Israel nyivosi mu diambu dimusiengi agu jenu duivosili rie: Musiengi egugu umawakusu ombn kaga jiBabylone na berondi utubetsa na divita nesi dungosu dunsala nesi yivunga.

³⁷ Guluanu nyumuegukiga batu bami o malongu motsu ama nyimababinga na kabu ami na fuiri ami na yifutsu yiami; nyubagabusa va mbura ejiji, nyubatsanisanga vana sui.

³⁸ Jogu bomueba batu bami, menu nyuba Nsambi ogu.

³⁹ Nyubavega murima umosi na nsila jimosi yiri bokitsanga notsananga na buranga na bategula bogu wandi.

⁴⁰ Nyuvangana pangini jimutubu nogu ngomuebaliyiia nsima, nyubavaganga maboti na nyudetsa mirima miogu yiri bondumanga na bagomuekakana nami.

⁴¹ Nyulaba ubueji ubavaganga maboti, nyubawarisa mu bulongu buebubu, nyudivaga na murima umosi.

⁴² Fumu amavosa rie: Nana nyimalasila baJuda maguga maneni anana nyubalasila maboti ama nyivangini nogu.

⁴³ Bomuesumbanga manungi mu bulongu buebubu abu jenu duivosi rie: Buvu mbura ajigaa na mamba nesi batu nesi bibulu bagetsani muna na bumawakusu ombu bisi Babylone.

⁴⁴ Fumu amavosa rie: Bomuesumbanga manungi na lora jivema, bosona miganda midusumbu na bominamiga bilimba va misu mabambeji o bulongu buBenjamin no biari biJerusalem nesi o misiengi miJuda nesi o misiengi amivu o mikongu nesi o misiengi mikumu nesi o misiengi amivu o tandu. Fumu amabuela rie: Nyubagabusa o bulongu buogu.