Jeremie 3 - La Sainte Bible en Langue Yipunu

Buvuyisa buIsrael

¹ Fumu amawivula rie: Ava dibaala obokila diwela na mugatsi andi, uba mugatsi udibaala disusu dibaala ditega omuegabuga ombu gandi? Nesi! Adina diubivisa dilongu. Ndeʼ Israel gumakebivisa na maronda mapuela. Fumu ewivuli rie: Ne nana gumuegabuga ombu gami?

² Buaga misu ugengila o julu tsimikongu! Gusamavaga kulini va mbura tsi eni tsiotsu? Gumaba nderi muArab o kumu oyivivi ukinda abevioyi. Ndeʼ wagu gumabivisa bulongu na bumbembu buagu nesi mbivulu tsiagu.

³ La dibandu mfula jisamamuenoganga nesi mfula dijo jisamamuenoganga. Tumba gumawarisa buvuyisa buagu, gumabusa ulaba yisonyi.

⁴ Ne nana guna bukidi undengila rie: Tata ami, tsia tumaleba bambatsi ava bungebi buami?

⁵ Gunyoganga mutubu? Gukelisa kabu agu mutubu? Nyiina, adina guivosi, ne nana gugedundi uvaganga mabi.

Israel mumbini, Juda musoyitsi diela

⁶ Va temu kaga Josias Fumu amakwivula rie: Gumalaba adi mumbini Israel amavaga? Amavaga bumbembu o julu tsimikongu misakama nesi o tsi muiri yika la muiri.

⁷ Nyimavosa rie: Anomana uvaga mambu meni motsu ogabuga ombu gami. Ne nana asamamuegabuga; yibusi yiandi Juda aguvu musoyitsi diela amaba mbeji.

⁸ Diuleba nyimabusa mumbini Israel mu diambu dibumbembu buandi na diuleba nyimamuvega muganda andi uguboka diwela, nyimalaba yiri yibusi yiandi Juda aguvu musoyitsi diela asamalaba goma. Jaʼ wandi amayevaga buvuyisa dedi mosi.

⁹ Israel amabivisa bulongu na buvuyisa nesi na bakosi bamamanyi na bamiri.

¹⁰ Ne nana yibusi yiandi Juda aguvu musoyitsi diela asamagabuga ombu gami na murima uotsu, amabanganga na penda. Menu Fumu oyiditubuli.

¹¹ Fumu amansingula rie: Mumbini Israel elabini nderi mbela andi jivu jigeyi tumba Juda guvu musoyitsi diela ana tindi mbela.

¹² Wenda yesamuna mambu memama o yiari yibanda. Fumu evosi rie: Mumbini Israel, gabuga! Ngogugengila na kabu! Fumu amabuesa rie: Menu nyivu mungo yingeba, ngekelisi kabu ami mutubu.

¹³ Rangimina yika dibi diagu, rangimina yiri gumaba mumbini va gusu Fumu Nsambi agu. Gumayenalinganga yiari na yiari ombu bansambi bangana nesi o tsi miri na gusamagulu diufi diami.

Dugabugu dubaJuda

¹⁴ Fumu amavosa rie: Baana abavu mimbini ruganu; menu nyivu Fumu enu. Nyudubonga umosi o musiengi umosi nesi babeji mu mukuta umosi na nyudubega jenu botsu o Sion.

¹⁵ Nyuduvega babungulitsi aba nyirondi, bodubungula na dujabu na diela.

¹⁶ Fumu amabuesa rie: Dufunanga na duburasananga. Muna yilumbu yieni batu bagomuevosa diambu diyigara yipangini yiFumu. Yigomuerangumunu, bagomueyitasila na bagomuelaba yiri yimatsiemuga na bagomuevaga yisusu.

¹⁷ Vana temu eni boluyila Jerusalem yitsiga yibufumu yiFumu. Bisi malongu motsu bogukama o Jerusalem uyenabengusana, bagomuevaga kanda tsiogu.

¹⁸ Miina bilumbu bieni bisi ndagu Juda bolinga va mosi na baIsrael; borugasana va mosi o yiari yibanda o bulongu abu nyimavega bataji bogu.

Mimbini ugabuga begabuyi ombu Nsambi (Fumu)

¹⁹ Nyimavosa rie: Mbe nyimaronda uguvaga tsomi baana bami. Noguvega dilongi diboti nesi disiala adivu na kembu ajiviolili jimalongu motsu! Nyimatasa rie: Gundengilanga Tata ami, mbana gugomuembusa!

²⁰ Nana mugetu agaa asigama na dironda diandi dedi mosi jenu baIsrael dusamaba dusigama ombu gami. Menu Fumu, oyiditubuli.

²¹ Diufi dimagulunu o julu tsimikongu, dimaba milingi na ndembu tsibaIsrael; bamapembuga nsila, bamandibana menu Nsambi ogu.

²² Baana abavu mimbini gabuganu ombu gami! Nyudutanda mabi menu. Jetutuʼ jogu baʼ, ombu gagu tuigabuyi, ndeʼ Fumu Nsambi etu.

(Batu)

²³ Nyiina, tumadunsu na nduku jimuyitsa ubapayi ajiruyili o bikundubuga nesi o mikongu. Tumba dugobutsu duIsrael duiruyili ombu Fumu Nsambi etu.

²⁴ Ubanda va bungebi buetu muyitsa uBaal umadaga digumba dibataji betu; nesi bindombu nesi bangombi nesi baana bababaala na babagetu.

²⁵ Jetu na bataji betu tumabasa de na yisonyi na tumanyongulu; tumavaga masumu va gusu Fumu Nsambi etu ubandila va bungebi buetu te na namunyi. Tusamadedila diufi diFumu Nsambi etu.