Jeremie 29 - La Sainte Bible en Langue Yipunu

Jeremie usona esonini bakoli

¹ Guluanu mambu ama Jeremie mubiyitsi amasona ombu bansialutsu babivunda abamabegu bakoli nesi bavagulitsi bapagu nesi babiyitsi nesi ombu batu botsu aba Nabucodonosor amabega bakoli o Babylone.

² Umasonu ava ababa bamagusuyila o Jerusalem: kaga Yekonia na kaga jimugetu na mivangu na bivunda biJuda na biJerusalem na basarpati na bavayitsi bamagongi.

³ Amaguwakisa ombu Elassa muana dibaala uChafan na Guemaria muana dibaala uHilquia aba Sedecias kaga jiJuda amasindiga o Babylone ombu Nabucodonosor kaga jiBabylone. Umasonogu rie:

⁴ Fumu Mabadi aguvu Nsambi Israel evosi na bakoli botsu abamabegulu o Jerusalem uwenda o Babylone rie:

⁵ Rungisanu mandagu na matsanininganu; varisanu manungi na janganganu biguji.

⁶ Welanu bagatsi na buranganu baana bababaala na babagetu; welilanu baana benu bababaala bagatsi na veganu baana benu babagetu balumi yiri boburanga baana bababaala na babagetu. Burasananganu va mbura aji duvu, funanganu.

⁷ Rombanu duvotsu dumusiengi agu dumabegu bakoli na sambilanu Fumu mu uonyi mu mbari mu digumba di-uonyi jenu dudilila amenu.

⁸ Fumu Mabadi aguvu Nsambi Israel amabuela rie: Duyadunsu na babiyitsi abetsani nenu nesi baresitsi benu na duyagulu badoritsi benu bamandosi abedurombisi mandosi!

⁹ Jogu bedubiyili mamfurulu mu diina diami. Fumu amavosa rie: Nyisamabasindiga.

¹⁰ Guluanu ama Fumu amavosa rie: Yiotsu ayi magumidusambuali mabilima biusukila o Babylone, mbana nyudurangimina na nyudugusulu mambu mami maboti mu temu eni nyudugabusila va mbura ejiji.

¹¹ Fumu amavosa rie: Nyijabi kanu tsiami mu diambu dienu, kanu tsiduvotsu tsiri tsimaguga yiri ditasa dieni diuduwarisanga o gusu.

¹² Mbana jenu dundengila na dugabuga ombu gami, dunsambila na nyudugulu.

¹³ Jenu dutomba na dundaba ava dutombila na mirima mienu miotsu.

¹⁴ Fumu amavosa rie: Menu Fumu nyivosi rie: Nyudusingisa utasuna, nyudujeyisa o bukoli; nomuedugukiga va mbura mosi jenu adumatsananga yiari na yiari va mbura atsi nyimadupansa. Fumu amamuevosa rie: Nyudugabusa va mbura aji nyimadusingisa ubegu bakoli.

¹⁵ Fumu edutsinguli motsu mana mu mbari duitasi rie: Nsambi amaduvega babiyitsi o Babylone!

¹⁶ Fumu amavosa mu diambu dikaga ajimavinga va yitsiga yibufumu yiDavid nesi mu diambu dibatu botsu abetsani o musiengi egugu nesi mu diambu dibaana bataji benu abasamawenda nenu o bukoli;

¹⁷ Fumu Mabadi amavosa rie: Guluanu nyubatindila divita nesi dungosu dunsala nesi yivunga. Nyubavaga nderi mifiga amimabiva amigomueligu.

¹⁸ Nyubaduka na divita nesi na dungosu dunsala nesi yivunga, nyubavaga yisanunu yibisi malongu motsu. Bolasungu yisonyi, bodesungu na bopejungu na miina mogu mosalusu uwarisa mulogu.

¹⁹ Basamagulu mambu mami diuleba nyimabatindila basalitsi bami babiyitsi. Fumu amamuevosa rie: Nyiina, basamagulu.

²⁰ Kabogu guluanu mambu maFumu; jenu bakoli botsu aba Fumu amarambusa o Jerusalem uwenda o Babylone!

²¹ Fumu Mabadi aguvu Nsambi Israel amavosa mu diambu diAhab muana dibaala uColaya na Sidequia muana dibaala uMaasseya abedubiyili mamfurulu mu diina diami rie: Guluanu nyibawakisa ombu Nabucodonosor kaga jiBabylone; jandi obabokisa va misu menu.

²² Bakoli botsu baJuda abavu o Babylone bosalisa miina mogu uwarisa mulogu, bovosanga rie: Fumu oguvayila dedi mosi na Sidequia nesi Ahab aba kaga jiBabylone amagoka mbisu!

²³ Dionyi diulabana mu mbari jogu bamavaga nsoruru o Israel, bamakevega uvaga bumbembu na bagatsi bangana na bamavosa mamfurulu mu diina diami, diuleba nyisamabaruma. Fumu amamuevosa rie: Nyidijabi, meʼ beni nyivu mbeji jidionyi.

Muganda uChemaya

²⁴ Gukatsingula Chemaya muisi Nehelam rie:

²⁵ Fumu Mabadi aguvu Nsambi Israel jandi rie: Ndeʼ gumatinda muganda mu diina diagu ombu bisi Jerusalem botsu nombu Sefania muana dibaala Maasseya aguvu muvagulitsi upagu nombu bavagulitsi bapagu botsu agumasonugu rie:

²⁶ Fumu amaguvaga muvagulitsi upagu va yivinga yiYoyada muvagulitsi upagu yiri o Ndagu Nsambi guba fumu tsibisalu ugengilanga babaala botsu abavu biduka na bekevaga babiyitsi, yiri gukabakotisa o tsugu nobabindiga bapanga.

²⁷ Kabogu dibandu yi gusamasiembila Jeremie muisi Anatot oyigubiyili mbigulu tsimunongu eni?

²⁸ Jandi agumatusindiga o Babylone uyevosa rie: Bukoli butsinga tindi utsinga, rungisanu mandagu na matsanininganu, varisanu manungi na janganganu biguji!

²⁹ Sefania muvagulitsi upagu amarangila Jeremie muganda eni.

³⁰ Amaruma Jeremie rie:

³¹ Ruma batu utsingula bakoli botsu rie: Fumu amavosa mu diambu diChemaya muisi Nehelam rie: Chemaya edubiyili diuleba nyisamamusindiga na ewarisi yitu yienu yikulini

³² kabogu guluanu adi menu Fumu nyivosi rie: Nyukilisa Chemaya na bategula bandi; ne mutu andi umosi agotsananga va gari batubebaba na agolaba maboti ama nyuvayila batu bami, Fumu amabuela rie: Jandi amasibisa batu uba mimbini miFumu.