Jeremie 28 - La Sainte Bible en Langue Yipunu

Jeremie na Hanania mubiyitsi

¹ Muna yilima yieni yidibandu didurumu duSedecias kaga jiJuda, yilumbu yimosi yitsungi jimuranu jiyilima yimuina Hanania muana dibaala uAzour agumaba mubiyitsi uGabaon amalabana o Ndagu Nsambi va gusu bavagulitsi bapagu na batu botsu na amansingula rie:

² Fumu Mabadi aguvu Nsambi Israel jandi rie: Nyimabogula yilala yikaga jiBabylone!

³ Yiotsu ayi bilima bibeji bimavioga nyumuegabusa bisalulu biotsu biNdagu Nsambi abi Nabucodonosor kaga jiBabylone amagusula va mbura ejiji na amabibega o Babylone.

⁴ Fumu amavosa rie: Nyugabusa Yekonia muana dibaala uJoaquim kaga jiJuda na bakoli botsu baJuda abamabegu o Babylone va mbura ejiji. Nyiina, nyubogula yilala yikaga jiBabylone.

⁵ Jeremie mubiyitsi amawaka Hanania mubiyitsi va gusu bavagulitsi bapagu na batu botsu abamaba o Ndagu Nsambi rie:

⁶ Nyiina! Fumu adivayi! Fumu adugusu mbigulu atsi gutsibiga na agabusi bisalulu biNdagu Nsambi na bakoli botsu va mbura ejiji.

⁷ Ne nana guluanu mambu ama nyuvosa nenu, ndeʼ na botsu rie:

⁸ Kala kala vamaba babiyitsi abamaturela, jetu nagu. Bamabiyila malongu maneni na bufumu buneni rie: Dubanganga na mavita na maguga na bivunga.

⁹ Tumba pa mubiyitsi obiga duvotsu tsie diujabununu yiri mubiyitsi eni amasindugu na Fumu? Diujabunu yika pa mbigulu tsiandi tsimadugusu.

¹⁰ Mbana Hanania mubiyitsi amagusula yilala ayi Jeremie mubiyitsi amanangula na amayibogula.

¹¹ Hanania amavosa va gusu batu botsu rie: Fumu jandi rie: Yiotsu ayi bilima bibeji biuvioga nyubogulila yilala ayi Nabucodonosor kaga jiBabylone amanangusa malongu motsu. Mbana Jeremie mubiyitsi amayenawenda.

¹² Hanania mubiyitsi anobogula yilala ayi Jeremie mubiyitsi amanangula, Fumu amaruma Jeremie rie:

¹³ Wenda yetsingula Hanania rie: Fumu jandi rie: Ndeʼ gumabogula yilala yimuiri tumba guyivinsa na yilala yibudilu.

¹⁴ Jeremie amabuela rie: Fumu Mabadi, aguvu Nsambi Israel amavosa rie: Nyunangusa bisi malongu motsu yilala yibudilu yiri boba o tsi durumu duNabucodonosor kaga jiBabylone na jogu bomusalila, nyumuwakisa nesi bibulu bimusiru wandi.

¹⁵ Mbana Jeremie mubiyitsi amatsingula Hanania mubiyitsi rie: Guluati, Hanania Fumu asamagusindiga, yika udunsa guidunsi batu bebaba.

¹⁶ La dibandu Fumu evosili rie: Guluati nyimagubusa, yilima yieyiyi gufu. Posulu tsiagu tsimarombisa batu uba mimbini miFumu.

¹⁷ Hanania mubiyitsi amafu muna yilima yieni mu tsungi jimusambuali.