Jeremie 27 - La Sainte Bible en Langue Yipunu

Jeremie ubega ebeyi yilala

¹ Va dibandu didurumu duSedecias muana dibaala uJosias kaga jiJuda mambu memama mamatsingululu Jeremie mu diina diFumu rie: Fumu amansingula rie:

² Vaga yilala na yinanguli mu masambaka magu.

³ Yitindi ombu kaga jiEdom nombu kaga jiMoab nesi ombu kaga jibaAmmon nombu kaga jiTyr na jiSidon na bilumbi abimarugasana o Jerusalem abi Sedecias kaga jiJuda amatinda.

⁴ Gukabavega maruma mami uyetsingula bafumu bogu rie: Fumu Mabadi aguvu Nsambi Israel jandi rie: Guluanu ama duyetsingula bafumu benu:

⁵ Menu agumasunda butamba na batu na bibulu abivu va butamba na mangolu mami motsu; nyubuvega ombu jandi agu nyirondi ubuvega.

⁶ Mbana nyimavega malongu memama motsu ombu Nabucodonosor kaga jiBabylone aguvu musalitsi ami; nyimamuvega nesi bibulu bimusiru.

⁷ Malongu motsu moba o tsi durumu duandi, ombu gandi nesi ombu muana andi udibaala nesi ombu baana bababaala bamuana andi te na temu jidilongu diandi diuba o tsi durumu dumalongu amavu na mangolu na bakaga bamonyi.

⁸ Fumu amavosa rie: Pa dilongu nesi bufumu bugokesunsa o tsi Nabucodonosor kaga jiBabylone na pa bagonangula yilala yikaga jiBabylone nyukilisa dilongu dieni na divita nesi dungosu dunsala nesi yivunga te na nyumusingisa ubabunga.

⁹ Duyagululu babiyitsi benu nesi beresitsi benu nesi badoritsi benu bamandosi nesi nganga tsienu atsiresi na bambuelili na bavanditsi benu abedutsinguli rie: Dugosalila kaga jiBabylone.

¹⁰ Ama bedubiyili mavu mamfurulu; pa dubagululu dukakana vala na bulongu buenu; nyudubinga na dubungana.

¹¹ Fumu amavosa rie: Tumba dilongu adiusinga yilala yikaga jiBabylone nesi uba o tsi durumu duandi, batu badilongu dieni bovaranga manungi notsananga muna.

¹² Dedi mosi nyimavosa na Sedecias kaga jiJuda rie: Singanu yilala yikaga jiBabylone, kesunsanu o tsi durumu duandi na dedilanu batu bandi mbana dudila monyu.

¹³ Dibandu yi dubokusulu jenu na batu bagu nesi na divita nesi na dungosu dunsala nesi na yivunga? Adina Fumu amavosa mu diambu didilongu adigokesunsa o tsi durumu dukaga jiBabylone.

¹⁴ Duyagulu mbigulu tsibabiyitsi abedubiyili rie: Jenu dugoba o tsi durumu dukaga jiBabylone! Jogu bedubiyili mamfurulu, duyabagulu.

¹⁵ Fumu amavosa rie: Nyisamabasindiga. Bebiyi mamfurulu mu diina diami yiri nyudubinga na jenu nogu dubungana.

¹⁶ Nyimatsingula bavagulitsi bapagu na batu bebaba rie: Fumu jandi rie: Duyagulu mbigulu tsibabiyitsi benu abedubiyili rie: Namapapa bisalulu biNdagu Nsambi biugabusu o Babylone; ama bedubiyili mavu mfurulu.

¹⁷ Duyabagulu, kesunsanu o tsi durumu dukaga jiBabylone mbana dudila monyu. Dibandu yi musiengi egugu usialila mududu?

¹⁸ Jeremie amabuela rie: Pa jogu bavu babiyitsi na pa mambu maFumu mavu nogu basambili Fumu Mabadi yiri bisalulu biNdagu Nsambi nesi bindagu kaga jiJuda biyawenda o Babylone.

¹⁹ Fumu Mabadi ana diambu uvosa mu diambu dimakutu makunga nesi nsienga jikunga nesi bisunsulu bikunga nesi bisalulu bisusu abimasiala o musiengi egugu.

²⁰ Nabucodonosor kaga jiBabylone asamabigusula ava amagaangila Yekonia muana uJoaquim kaga jiJuda na baneni botsu baJuda na bisi Jerusalem abamabegu bakoli o Babylone.

²¹ Fumu Mabadi aguvu Nsambi Israel amavosa mu diambu dibisalulu abimasiala o Ndagu Nsambi nesi o Jerusalem rie:

²² Biubegu o Babylone, biuba guna te na yilumbu ayi nyutabula diambu mbana nyubigabusa nobisunsa mu mbura tsiogu.