Jeremie 23 - La Sainte Bible en Langue Yipunu

Babungulitsi babi na kaga aguvu mugobutsi

¹ Fumu amavosa rie: Ka muna maguga ma babungulitsi babindombu babi bolaba abebungi nopansa mugamba ami.

² La dibandu Fumu Nsambi Israel evosili mu diambu dibabungulitsi beni rie: Jenu dumatsiemusa bindombu biami na dumabipansa, dusamabikipa; Fumu amavosa rie: Guiuanu nyivosi rie: Nyudukilisa mu diambu dimbivulu tsienu.

³ Nyumuegukisa bansialutsu babindombu biami o malongu motsu ama nyimabipansa na nyubigabusa o mbura tsiogu; biuburanga na biufunanga.

⁴ Nyubisolila babungulitsi babindombu bangensa abobibungulanga; bigomueba na keri vo goma; Fumu amavosa rie: Vagogambu ne yimosi ava biunengululungu.

⁵ Fumu amavosa rie; Guluanu bilumbu biruyi abi nyupalisila David mutegula orumanga na diela na dusungugu na musuga mu bulongu.

⁶ Ava oruminanga Juda ojegusu Israel otsananga sui. Guluanu diina diandi: Fumu avu dusungugu duetu.

⁷ La dibandu Fumu amavosila rie: Bilumbu biuruga abi bagomuevosa rie: Fumu ejabi, jandi agumapalisa baIsrael o bulongu buEgypte!

⁸ Tumba bovosanga rie: Fumu ejabi, jandi agumapalisa baIsrael o bulongu bubanda nesi o malongu motsu ama bamabingusulu! Bomuetsananga o bulongu buogu.

Babiyitsi abagaa bawelimina

⁹ Mu diambu dibabiyitsi: Murima ami umabuliga na uregama nyireyimi; nyivu nderi dibaala adivu na dilangi, adiviosulili unuaganga. Nyigulu motsu mana mu diambu diFumu na mu diambu diNsambi na adi amavosa nami rie:

¹⁰ Bulongu bumabasu na batu abevayi bumbembu; bevayingi mabi, bana mangolu yika uvaga mabi; bulongu buvu mu bukuili mu diambu dimulogu; la dibandu kumu tsigaa na mamba, yika ugumuga tsigumuyi.

¹¹ Babiyitsi na bavagulitsi bapagu bamabiva tindi ubiva. Fumu amavosa rie: Nyimarasuna mbivulu tsiogu ne o Ndagu ami.

¹² Fumu amavosa rie: La dibandunsila ogu jiuba na puelili na pisama, bosindulu na boberuga mu mbari nyubalasa maguga muna yilima ayi nyubakilisila.

Babiyitsi abamabiva uviolila baSamarie

¹³ Nyimalaba buduka bubabiyitsi baSamarie bamabiga na mangolu maBaal, bamatsiemusa batu bami baIsrael.

¹⁴ Nyimalaba nsoruru tsibabiyitsi baJerusalem; bevayingi bumbembu na befuringi; bewarisi batu babi yiri ne umosi agokalula diela. Nyibalabi jogu botsu nderi bisi Sodome na nyilabi bisi Jerusalem nderi bisi Gomorrhe.

¹⁵ La dibandu Fumu Mabadi amavosila mu diambu dibabiyitsi rie: Guluanu nyubanuisa dugundu na nyubanuisa mamba amamalombu. Babiyitsi baJerusalem bamabivisa bulongu buotsu.

Babiyitsi bamfurulu

¹⁶ Fumu Mabadi amavosa rie: Duyagulu mambu ama babiyitsi bedubiyili! Bedusovisi na mambu amagaa na tsongu; bewaluli biriariamu bijoʼ beni; mambu mogu mageruyili ombu gami.

¹⁷ Betsinguli abendensi rie: Fumu jandi rie: Dudila duvotsu. Betsinguli abewarisi matasa majoʼ beni rie: Tugolaba ne dibi dimosi.

¹⁸ Anyi orungula ujaba matasa mami? Anyi amandaba nogulu amami? Anyi amaliga matuji ukulu nesi ukululu?

(Jeremie)

¹⁹ Labanu mungudi uFumu, fuiri andi jimaranga, yimbongila utsiengila yitsiengili, yivu va julu muru ubatu babi.

²⁰ Kabu Fumu jigosaguga te na odugusu nesi umanisila amandi motsu. Yilumbu yimosi duditsiyisa.

(Fumu)

²¹ Nyisamasindiga babiyitsi bebaba ne nana bamawenda mambangu; nyisamavosa nogu ne nana bamabiga.

²² Mbe bamaruga ombu gami mbe bamatsingula mambu mami ombu batu bami. Mbe bamabagabusa mirima nsima, nesi ubagandisa mbivulu tsiogu.

Fumu avu mu mbura tsiotsu

²³ Fumu amawivula rie: Nyivu Nsambi yika pa nyiji bebeli, ngaa Nsambi pa nyiji vala?

²⁴ Fumu amawivula rie: Mutu orungula usuema va mbura aji ngomulaba? Gugejabi yiri menu agumabasa julu na butamba?

Guyafuiyisa bipupu na uresi

²⁵ Nyimagulu ama babiyitsi bamavosa, bamabiga mfurulu mu diina diami ava bamavosila rie: Nyimadora ndosi! Nyimalaba yiriariamu!

²⁶ Te na temu yi babiyitsi bebaba bobiyilanga mamfurulu? Te na temu yi bobiganga ndunsulu tsijogu beni?

²⁷ Mutu mutu ewalulili mutu nandi mandosi, bana ditasa urombisa batu bami undibana. Anana bataji bogu bamandibinina uyitsa Baal.

²⁸ Mubiyitsi agumadora ndosi ajiwaluli, tumba jandi agumagulu mambu mami amatubuli ngensa. Fumu amawivula rie: Dibandu yi duifuiyisili bipupu na uresi?

²⁹ Mambu mami magaa nana muji nesi nana marto ajibuli mamanyi?

³⁰ La dibandu Fumu evosili rie: Nyina kueru nababiyitsi abetubuli mbigulu tsingana.

³¹ Fumu evosi rie: Nyiina, nyina kueru na babiyitsi abebiyili batu mambu mogu tumba bevosi rie: Fumu evosi mambu memama.

³² Fumu ebuesi rie: Nyina tindi kueru na jogu abetubuli biriariamu abipembusi batu bami na mamfurulu mogu nesi mapopopu mogu. Menu Fumu nyisamabasindiga na nyisamabaruma ne diruma dimosi. Bagewamusi batu bebaba ne pesu.

Bulumbi bubi buFumu

³³ Pa batu bebaba nesi mubiyitsi nesi muvagulitsi upagu boguwivula rie: Bulumbi bubi yi Fumu otutindila? Gukabawaka rie: Bulumbi bubi yi? Fumu amavosa rie: Nyudubusa.

³⁴ Mubiyitsi, nesi muvagulitsi upagu nesi batu abovosa rie: Bulumbi bubi buFumu abubu rie: nyubakilisa, jogu na bisi ndagu ogu.

³⁵ Mutu mutu akawivula mutu nandi na mutu mutu akawivula muana taji andi rie: Yi Fumu atsiwagula? Dibandu yi Fumu atsivosila nana?

³⁶ Duyamuevosa rie: Bulumbi bubi buFumu. Je mambu maFumu mavu bulumbi ombu mutu? Tsatsabi! Ava duidivosili duivinsi mambu kingu diwendi rie: Mambu maNsambi aguvu monyu nesi maFumu Mabadi aguvu Nsambi etu.

³⁷ Gukawivula mubiyitsi rie: Diambu yi Fumu atsiguwagula? Diambu yi Fumu atsivosa?

³⁸ Pa dumuevosa rie: Bulumbi buFumu, diuleba nyimadugandisa, menu Fumu nyuduwagula.

³⁹ Nyudulibana na nyudubusa, jenu na musiengi agu nyimaduvega jenu na bataji be-nu, nyudubuaga vala nami;

⁴⁰ nyudulasa yisonyi mutubu, yisonyi ayigolibunu, via!