Jeremie 22 - La Sainte Bible en Langue Yipunu

¹ Fumu amaruma Jeremie rie: Wenda o ndagu jikaga jiJuda, avana guvosila mambu memama.

² Gukavosa rie: Kaga jiJuda gulu mambu maFumu, ndeʼ aguvu utsana va yitsiga yibufumu yiDavid, jenu na basalitsi bagu na batu bagu: jenu botsu aduikotingi o ndagu ejiji.

³ Fumu jandi rie: Tabulanu mambu menu nadusungugu, wamusanu abamakambusu na bakinditsi. Duyakuana muenyi nesi yisiana nesi mukuili; duyabalasa dikasi. Duyawitila malungu ma-abagaa na mbela va mbura ejiji.

⁴ Tumba pa duivayingi motsu mana mbana bakaga benu botsananga va yitsiga yibufumu yiDavid; kaga jaʼ beni na basalitsi bandi na batu bandi bokotanga o ndagu ejiji; bobanganga na makalu na bakabala.

⁵ Pa dugegulu motsu mana, Menu Nsambi nyilevi pesi na diina dimeʼ beni rie: Ndagu ejiji jiusiala mududu.

⁶ Fumu amavosa mu diambu dindagu kaga jiJuda rie: Diuleba guvu ombu gami nderi misiru miGalaad nesi mikongu miLiban; tumba dingensa nyuguvaga nderi kumu vo musiengi agumasiala mududu.

⁷ Ukunsa nyigukunsili babungitsi, mubungitsi mubungitsi na bitogulu biandi; bowanga misedera miagu miboti na bomibuaga o muji.

⁸ Bisi malongu mapuela bovioyilanga va mugula musiengi egugu na bowivusananga rie: Dibandu yi Fumu amavayila musiengi egugu diambu diedidi?

⁹ Bowagulasana rie: Mu mbari bamabunsa pangini jiFumu Nsambi ogu na bamagudama va gusu bansambi bangana na bamabasalila.

Mu diambu diChalloum, yivinga yiJosias

¹⁰ Jenu baJuda duyalila kaga Josias na duyamunyonga. Lilanu, lilanu Challoum oyiwendi mu mbari agomuegabuga agomuelaba bulongu abu amaburulu.

¹¹ Fumu amavosa mu diambu diChalloum agumavinga taji andi Josias uba kaga jiJuda agumarambuyila va musiengi egugu rie: Agomuegabuga via!

¹² Tumba ofuila o bulongu abu bamamubega koli na agomuelaba bulongu buebubu.

Joaquim amasiembu

¹³ Ka muna maguga ma guilabi Joaquim ndeʼ aguirungi ndagu agu tsiri ukipa migaga. Ayilibini dusungugu ava egabili bakilingu; aguisalisi mutu nandi tsiri umufuta na bisalu biandi.

¹⁴ Aguivosi rie: Nyukerungila ndagu ajivu na bakilingu na bibuku abivu vumbila na bafenetera bapuela na nyujinamiga tsimbi tsisedera notsibensa.

¹⁵ Je guji kaga mu mbari guirungi ndagu na tsimbi tsisedera? Taji agu asamajanganga, asamanuanganga? Amarunga na dusungugu na amatsananga na nsangu.

¹⁶ Amatabulila yijaga na agumakambulu bunsonsi na dusungugu mbana bamatsana na nsangu. Fumu amavosa rie: Tsiri amana amamandasa yiri amanjaba?

¹⁷ Tumba ndeʼ, guirumi na ditasa uyenadionganga noyenawitilanga malungu ma-jogu abagaa na mbela va julu vana uyenakuananga nolasanga dikasi

¹⁸ La dibandu Fumu evosili mu diambu diJoaquim muana dibaala uJosias kaga jiJuda rie: Bagolila rie: Ngeba jetua, muana taji etu udibaala! ngeba jetua yibusi yietu! Bolila rie: Ngeba jetua, fumu etu! Ngeba jetua, bundumba buetu!

¹⁹ Otsigu nana betsiyili buru, odutu nopalusu va gusu kana umusiengi uJerusalem.

Yisonyi na dilensa diJerusalem

²⁰ Ndeʼ Jerusalem, mata o mukongu uLiban nolilanga! Lila o mikongu miBachan lila o julu tsimikongu mi Abarim, mu mbari botsu abamagurondanga bamaboku!

²¹ Nyimagulubusa ava gumabila na digumba; gumavosa rie: Ngekipi. Anana gumapayila va bungebi buagu; gusamagulu diufi diami.

²² Punga jiuvembula babungulitsi babindombu na jogu abegurondi bobegu bakoli, mbana gulaba tindi yisonyi na mbivulu tsiagu tsiotsu.

²³ Ndeʼ aguitsanini o Liban, agumarunga diuva diagu o misedera, ka muna munyongu gu gunyonga ava gulabila maguga, maguga amebagunu na misongu mimugetu ava eburili!

Mu diambu diKonia muana dibaala uJoaquim

²⁴ Fumu evosi na Konia muana dibaala uJoaquim kaga jiJuda rie: Ne pa guvu nderi moru mu dikaka diami dimabaala ne nana nyugubuaga. Nyilevi pesi na diina dimeʼ beni rie:

²⁵ Nyuguwakisa ombu jogu aberondi uguboka nesi ombu jogu abegulasi goma, diwendi rie: ombu Nabucodonosor kaga jiBabylone na bagora bandi.

²⁶ Nyudubinga jenu na nguji agu o bulongu bususu abu dusamaburulu na aguna dufuila.

²⁷ Duba na nsala ugabuga o bulongu abu duirondi tumba dugomuebulaba.

²⁸ Bowivula rie: Je Konia avu nderi yisanga ayimavinu na yimabulu? Je avu nderi mbiji ajigaa na tsongu? Dibandu yi amabingulu jogu na baana bandi? Dibandu yi bamabuagulu o dilongu adi bagejabi?

²⁹ Aa bulongu, bulongu buami, gulu mambu maFumu!

³⁰ Fumu jandi rie: Sonanu dibaala diedidi va mosi na jogu abagaa na baana. Amakonda tindi ukonda mu mbari ne mutegula umosi agovinga va yitsiga yibufumu yiDavid, nesi uruma o bulongu buJuda.