Jeremie 21 - La Sainte Bible en Langue Yipunu

Kabusulu ombu Kaga Sedecias

¹ Mambu maFumu mamatsingulu Jeremie ava kaga Sedecias amasindiyila Pachehour muana dibaala uMalkia na Sefania muana dibaala uMaasseya agumaba muvagulitsi upagu uyewivula Fumu rie:

² Kokolu tuwivulili Fumu mu mbari Nabucodonosor kaga jiBabylone utoyisa etutoyisi. Tanguji Fumu otuvayila bimaga biandi yiri jogu bokakana netu.

³ Jeremie amabawaka rie: Dukatsingula Sedecias rie:

⁴ Fumu Nsambi Israel jandi rie: Utoga duitoyi na bagora bakaga jiBabylone, abedukandi. Nyutsotsa bagora abetoyi o gusu kana yivaga uyinguga nokota o gari musiengi.

⁵ Mbana meʼ beni nyutoga nenu na tindi mangolu mami na nyudunyoyila tindi kabu jineni.

⁶ Nyudimba bisi musiengi egugu nesi babaala nesi bibulu; jogu boboku na yivunga yineni.

⁷ Fumu amavosa rie: Va julu vana Sedecias kaga jiJuda na basalitsi bandi na batu bandi na bisi musiengi egugu boboku: bamosi na yivunga basusu na divita na basusu na dungosu dunsala; abosiala nyubawakisa ombu Nabucodonosor kaga jiBabylone nombu bavinitsi bogu nombu jogu aberondi ubaboka; Nabucodonosor obabokisa, agobalasa yingeba via.

⁸ Ndeʼ Jeremie gukatsingula batu bebaba rie: Fumu jandi rie: Guluanu duvu va mabaga, nsila jimonyu na nsila jidufu.

⁹ Jandi agusiala o musiengi egugu oboku na divita nesi dungosu dunsala nesi yivunga. Tumba agupala ukevega ombu bisi Babylone abedukandi, agofu.

¹⁰ Fumu amavosa rie: Nyina ditasa utsiemusa musiengi egugu, tsiri uguwaka kalala, uwakusu ombu kaga jiBabylone agugunyensa.

Bulumbi ombu mukuta ukaga

¹¹ Gukaisingula mukuta ukaga jiJuda rie: Guluanu mambu maFumu!

¹² Jenu bisi ndagu David, lasanu dusungugu kedi na kedi, wamusanu abamakambusu na bakuanitsi mu mbari kabu ami jikevendumuga nana muji agugotsimusu mu diambu dimbivulu tsienu.

¹³ Fumu amavosa rie: Nyina kueru nenu, jenu aduitsani o musiengi aguvu o yibususu nesi o kumu ajiivu na mamanyi; jenu aduivosi rie: Anyi oyitoga netu? Anyi obula mandagu metu?

¹⁴ Fumu amavosa rie: Nyudukilisa dedi na bifu bienu, nyuny ensa jnusiru enu te na biari biotsu biusiegalana.