Jeremie 20 - La Sainte Bible en Langue Yipunu

Jeremie amakotusu o tsugu

¹ Pachehour muana dibaala ulmmer agumaba muvagulitsi upagu nesi yivunda yiNdagu Nsambi amagulu Jeremie ubiga ebiyi mambu maFumu.

² Pachehour amadimba Jeremie agumaba mubiyitsi na amamukotisa o tsugu ajimaba bebeli na dikotulu dineni diBenjamin o Ndagu Nsambi.

³ Tumba ava kedi Pachehour amapalisa Jeremie o tsugu. Jeremie amamutsingula rie: Fumu agegunengili Pachehour egunengili Dunsiensi aduvu yiari na yiari.

⁴ Mu mbari Fumu amavosa rie: Dunsiensi dudugaanga, jenu na bambatsi bagu botsu, bavinitsi bogu bobaboka, ndeʼ beni gudilaba. Va julu vana nyuwakisa bisi Juda botsu ombu kaga Babylone, jandi obega bamosi bakoli o Babylone nobokisa basusu.

⁵ Nyuwakisa busina buotsu bumusiengi egugu nesi biotsu abimasalulungu nesi biotsu abivu na dufunu duneni abivu muna na nyuwakisa bilundulu na biotsu bibakaga baJuda ombu bavinitsi bogu, jogu bobikinda bobibonga na boyenabibega o Babylone.

⁶ Ndeʼ Pachehour na botsu abetsani o ndagu agu dubegu bakoli; duwenda o Babylone na avana dufiula na avana dutsigulu, jenu na bambatsi bagu aba gumabiyila mamfurulu.

Jeremie utatila etatili Nsambi

⁷ Aa Fumu gumandunsa na nyimasinga udunsu; gumakaanga na nyimasinga ubetsu. Nyidesungu bilumbu biotsu, batu botsu betekingi.

⁸ Temu tsiotsu atsi nyivosingi yika usiemba nyisiembingi. Nyitubuli dikasi na dubungu! Mambu maFumu metombisi ulaba yisonyi nesi urekungu yilumbu na yilumbu.

⁹ Pa nyuvosa rie: Ngomuerangimina Fumu na ngomuevosa mambu mandi murima ami yika ubakama te na bivisi biami yika buali na buali. Na pa nyuweliga uwarisa murima ngorungula.

¹⁰ Nyigulu posulu tsikulini tsibatu bapuela, bendengili rie: Dunsiensi aduvu yiari na yiari. Mufuengililianu, jetu wetu tumufuengilila! Botsu ababetsi na duvotsu nami ugengila begengili ulaba yeri nyuduku dibaku. Jogu rie: Tanguji odunsu mbana tumugaanga na tumugabusila pila.

¹¹ Tumba Fumu guvu na mangolu guitoyili; bakuanitsi bami beduku mabaku na bagolunga; bobasa na yisonyi mu mbari bamabetsu. Yisonyi yieni yiuba mutubu na yigolibunu, via!

¹² Ndeʼ Fumu Mabadi guijabi yeri mutu avu usungama na guijabi matasa mandi amamasuegu. Nyulaba ava gugabusila bavinitsi bami pila mu mbari nyimawakisa diambu diami ombu gagu.

¹³ Wimbililanu Fumu! Yitsanu Fumu! Mu mbari ewaki agumakambulu kalala ombu mutu mubi.

¹⁴ Ka muna mulogu gu uvu na yilumbu ayi nyimaburulu! Yilumbu ayi nguji ami amamburila yiyarangunu!

¹⁵ Ka muna mulogu gu uvu na dibaala adimayetsingula taji ami musamu unsangu rie: Gumaburulu muana dibaala!

¹⁶ Dibaala dieni abi nderi misiengi ami Fumu amabunga tsiri umilasa yingeba! Kedi agulu bibimu va muangulu agulu migamu midivita.

¹⁷ Dibandu yi nyisamabokulu nesi o moji nguji ami? Dibandu yi moji andi usamabila ngila ami? Dibandu yi moji andi usamakelisa mutubu?

¹⁸ Dibandu yi nyimaburulu? Je nyulabanga maguga na purulu nomanisila bilumbu biami ria yisonyi?