Jeremie 18 - La Sainte Bible en Langue Yipunu

Jeremie ombu mubumbitsi

¹ Mambu maFumu mamatsingulu Jeremie rie:

² Retsama wenda o ndagu mubumbitsi; avana nyugutsingulila mambu mami.

³ Nyimawenda o ndagu mubumbitsi, nyimamurasuna ubumba ebumbi yisanga.

⁴ Tumba yisanga ayi amabumba yisamabueji, dilabini na diga temu na temu va dikaka dimubumbitsi; kabogu amabanda yisanga yisusu nana amarondila uyibumba.

⁵ Mbana Fumu amamuepega bulumbi buebubu:

⁶ Jenu baIsrael ngorungula uduvayila dedi mosi nana mubumbitsi evayingi? Fumu amavosa rie: Nana diga divu va dikaka dimubumbitsi anana jenu baIsrael duvu va dikaka diami!

⁷ Diurungula uba yiri nyutabula diambu urakula nesi ubunga nesi ubivisa dilongu vo bufumu.

⁸ Tumba pa bisi dilongu adi nyimavosila dionyi bokalula diela mu mbivulu tsiogu nyuvinsa matasa mu dibi adi nyimatasa ubavayila.

⁹ Diurungula uba temu jisusu nyutabula diambu urunga nesi uroyisa dilongu vo bufumu.

¹⁰ Tumba pa bisi dilongu dieni bovaga amagendasi ubueji na bagegulu diufi diami ngomuebavaga diboti adi nyimatasa ubavayila.

¹¹ Tsingula baJuda na bisi Jerusalem rie: Fumu jandi rie: Guluanu nyudulasa maguga na ukunsa nyikunsi dubungu duenu. Mutu mutu adundi bifu biandi bibi nosungiga nsanunu tsiandi nesi bisalu biandi.

¹² Tumba bamavosa rie: Ka yia! Tuvaga nana tuirondili, mutu mutu odukanga matasa mamurima andi ubi.

BaIsrael bamalibana Fumu ogu

¹³ La dibandu Fumu evosili rie: Wivulanu bisi malongu! Anyi amagulu diambu diedidi na kala? Adi baIsrael bamavaga adivu nsoruru.

¹⁴ Je mfula jivema jiubusa udibiga mamanyi maLiban? Je mijamba miposi amiruyili o mikongu mikamuyi? Nesi!

¹⁵ Tumba batu bami bamandibana bevagulili bansambi bangana bima bimbunga jiboti; bebadukusu mabaku, bebapembusi mansila makala ubagonsa va mugula.

¹⁶ Bamarombisa bulongu buogu usiala mududu te na budesungu mutubu; botsu abevioyi muna bekambulu na bemuangisi miuru.

¹⁷ Nana punga jiyiari ayi wisi epalili jivembulili bima dedi mosi nyubapansila va gusu bavinitsi; nyubaliyila nsima, ngobakipa mu yilumbu yimunyongu ogu.

Fundu jimatungulu Jeremie, dusambu dumubiyitsi

¹⁸ Bamavosa rie: Ruganu tutungilianu Jeremie fundu! Migaga mibavagulitsi bapagu dibandu yi miutsiemuyila? Malongi mabango diela dibandu yi motsiemuyila? Mbigulu tsibabiyitsi dibandu yi tsiutsiemuyila? Tumufuengililianu, tuyaguluanu mambu mandi!

¹⁹ Aa Fumu, kululuati! Guluati nana bavinitsi bami bemfuengilili!

²⁰ Dibi digabusulu mu diambu didiboti? Jogu bamatima dubila umbokila. Guyalibana yiri nyimabasambilila va gusu agu kumbu tsipuela ubasagulila kabu agu.

²¹ La dibandu singisa baana bogu ulaba dungosu dunsala nesi uboku o divita. Bagatsi bogu bayamuebura baana na babi bakuili. Balumi bogu baboku na bivunga; bafudu bogu baboku o divita.

²² Bagamuyi ava bavinitsi bogu bosundila ukota o mandagu mogu! Mu mbari bamatima dubila unsudiga na bamatambila mirambu.

²³ Ndeʼ Fumu guijabi fundu tsiogu tsiotsu atsi berondi umbokila! Guyabatanda dibi diogu. Guyatsindula disumu diogu! Basiengumuyi va gusu agu! Bavayili nana guirondili ulasa kabu agu!