Jeremie 16 - La Sainte Bible en Langue Yipunu

Bupinsa buJeremie

¹ Fumu amansingula rie:

² Gugowela na gugoba na muana dibaala nesi umugetu o bulongu buebubu.

³ Menu Fumu nyivosi diambu dibaana bababaala na babagetu aboburu o bulongu buebubu na dibanguji bogu abobabura nesi dibataji bogu abobabura rie:

⁴ Bofuanganga na maali; bagolilu na bagotsigu; bamfumbi bogu boba layini te na butamba buba nderi budibumbu; boboku na divita na dungosu dunsala; bamfumbi bogu bododungu na batsoli na makoju mobajanganga.

⁵ Fumu jandi rie: Guyakota o ndagu bakuili, guyalila nogu na guyababembiga. Nyimabapatula duvotsu duami nesi maboti mami nesi yingeba yiami.

⁶ Bisina na bijaga bofu mu bulongu buebubu, bagobatsiga na bagobalila vo ukefuga divenda mu diambu diogu.

⁷ Bagobukula mapa va temu munyongu ubembiga mutu mu diambu didufu. Bagogabila dimoyi va temu munyongu ubembiga mutu mu diambu didufu dutaji andi vo dunguji andi.

⁸ Guyakota o mulambu udiwela ujanganga nonuanganga nogu.

⁹ Fumu Mabadi aguvu Nsambi Israel evosi rie: Guluanu va misu menu na mu temu enu nyuvotsa migamu minsangu nobueji va mbura ejiji nesi nyimbu tsimulumi na tsimugatsi.

¹⁰ Ava gutsingulila batu bulumbi bueni, jogu bowivula rie: Dibandu yi Fumu etulasili maguga meni motsu? Dibi yi tumavaga? Disumu yi tumavaga va gusu Nsambi etu?

¹¹ Gukabawagula rie: Fumu jandi rie: Bataji benu bamambusa na bamawenda ombu bansambi bangana, bamabasalila na bamagudama va gusu ogu; jogu bamambusa na basamakelisanga migaga miami.

¹² Mbe ka jenu, duivayi mabi uviolila ne bataji benu; duiwarisi kanda tsienu te na dugekulu.

¹³ La dibandu nyudugusulila o bulongu buebubu nodubega o bulongu abu dugejabi, nesi jenu nesi bataji benu; aguna dusalilanga bansambi bangana nyangu na mukolu, ngomuedulasa maboti.

Ugabuga

¹⁴ Fumu amavosa rie: La dibandu mu bilumbu abiruyi batu bagomueleva pesi rie: Fumu ejabi, jandi agumapalisa baIsrael o bulongu buEgypte!

¹⁵ Tumba bovosanga rie: Fumu ejabi jandi agumapalisa baIsrael o bulongu bubanda nesi o malongu motsu ama bamabingusulu! Nyubagabusa o bulongu buogu abu nyimavega ombu bataji bogu.

Bango mbela

¹⁶ Fumu amavosa rie: Guluanu nyutinda bavubitsi bapuela, bobagaanga na mbusa tsiogu; va julu vana nyutinda barela bapuela uyenababokanga o julu tsimikongu miotsu nesi bikundubuga nesi o gari tsimamanyi.

¹⁷ Misu mami mavu kengili ulaba mogu motsu, ne dimosi digaa disuema va gusu ami na mabi mogu magotsiemuga va gusu ami.

¹⁸ Nyubakilisa temu beji mu diambu dimabi mogu na dimasumu mogu mu mbari bamabivisa bulongu buami na bitsatsu bibakosi bogu na nsoruru tsibansambi bangana.

Nsambi amajabunu na botsu

¹⁹ Fumu guvu mangolu mami na tsiku ami na yisuemunu yiami mu yilumbu yimunyongu! Bisi malongu borambuyila o masuka mabutamba uruga ombu gagu na bogutsingula rie: Bataji betu bamabialila yika mfurulu na banganga abagaa na tsongu.

²⁰ Mutu orungula ukevayila bansambi abagaa bansambi?

²¹ La dibandu temu ejiji ujabisa nyibajabisi na nyubajabisa mangolu mami motsu; na bojaba yiri nyivu Fumu.