Jeremie 14 - La Sainte Bible en Langue Yipunu

Dungosu dunsala

¹ Mambu ama Fuma amatsingula Jeremie mu temu jidungosu dunsala:

² BaJuda bavu o bukuili, misiengi mimasiala mududu, bamatsana va tsi ulila belili. Migamu miJerusalem mimagulunu o julu.

³ Baneni besindiyi basalitsi uyetega mamba bewendi o matanga na magerasunu na mamba. Bamakambulu tindi ukambulu bamayenagabuga na miogu va julu tsimiuru, na matsuva mapavala.

⁴ Butamba bumarubiga mbamfu; mfula jisamamuenoganga. Bafutsitsi bamakambulu tindi ukambulu.

⁵ Nesi o musiru kabi eburi muana andi na emusili mu mbari bisinga bisatsi.

⁶ Baburu bamusiru bavu o julu tsimikongu, bana yikiba nderi makoju; misu mogu yika timbila ava beyenarombila bisinga.

(Batu)

⁷ Aa Fumu, diuleba mabi metu metukambisi tuwaki kalala mu diambu didiina diagu! Nsimbulu tsietu tsivu tsipuela tsipuela na tumavaga masumu va gusu agu.

⁸ Ndeʼ aguvu tsongu jiIsrael nesi Mugobutsi andi va temu jimunyongu; dibandu yi gubila nderi muenyi mu bulongu? Nderi mulinsi aguivioyi kuasa?

⁹ Dibandu yi gubila nderi dibaala adimasutu? Dibandu yi gubila nderi ngogaga ajigorungula utuwamusa? Aa Fumu tsia ndeʼ guvu netu? Tuvu tindi batu bagu; kokolu guyatubuaga!

¹⁰ Gulu adi Fumu amavosa mu diambu dibatu bebaba rie: Berondi ulinga yiari na yiari, bavu nsumbi nsumbi; la dibandu Fumu agebakipili, agelibini bukongu buogu na ebakilisi.

¹¹ Fumu amansingula rie: Guyasambilila batu bebaba.

¹² Ne pa bobusa uji; ngogulu ndembu tsiogu; pa bovagula pagu tsiunyensa na miensili ngobisinga; nyirondi ubabunga na divita nesi dungosu dunsala nesi yivunga.

¹³ Nyimawagula rie: Aa Fumu, ndeʼ aguvu Fumu! Gulu babiyitsi bebatsinguli rie: Dugolaba divita, dugolaba dungosu dunsala; tumba Nsambi oduvega tindi duvotsu va mbura ejiji.

¹⁴ Fumu amansingularie: Babiyitsi bebiyi mamfurulu mu diina diami; nyisamabasindiga, nyisamabavega musuga, nyisamavosa nogu. Biriariamu bimfurulu na mbigulu tsimfurulu, tsivu ndunsulu tsijogu beni, amana bedubiyili.

¹⁵ La dibandu menu Fumu nyivosili rie: Mu diambu dibabiyitsi abebiyi mu diina diami, diuleba nyisamabasindiga, bevosi rie: Vagoba divita nesi dungosu dunsala mu bulongu buebubu. Babiyitsi beni boboku na divita na dungosu dunsala.

¹⁶ Mbe ka batu aba bobiyila, bamfumbi bogu boba layini mu diambu didungosu dunsala na didivita; vagoba mutu ubatsiga nesi jogu beni nesi bagatsi bogu nesi baana bogu bababaala nesi babagetu; nyubagabusila mbivulu tsiogu.

¹⁷ Batsinguli diambu diedidi rie: Nyangu na mukolu matsanga mepalingi mu misu mami, magekamuyi mu mbari batu bami bamadimbu kuba jineni, bamanemusu pura jineni.

¹⁸ Pa nyivioyi mu musiru nyilabi bamfumbi badivita; pa nyivioyi mu musiengi nyilabi bamfumbi badungosu dunsala. Mubiyitsi na muvagulitsi upagu belingingi mu bulongu tsiri ujaba agu bewendi.

(Batu)

¹⁹ Fumu gumabusa baJuda? Sion uvu nsoruru ombu gagu? Dibandu yi guitudimbili? Dibandu yi tugaa na dubelusu? Tuivivi duvotsu tumba maboti magelabini, tuivivi dubelusu na tuilabi yika goma na goma!

²⁰ Fumu, tuirangimini mabi metu nesi mabi mabataji betu. Tumavaga masumu va gusu agu.

²¹ Mu diambu didiina diagu guyatulensa guyatuliyila nsima, jetu bisi Jerusalem mbura jiyitsiga yiagu yibufumu. Guyabunsa pangini aji gumavangana netu!

²² Va gari bansambi bangana babisi malongu vavu nsambi ajinoyisi mfula? Tsiri ndeʼ aguvu Fumu Nsambi etu? Ndeʼ tuivivi, ndeʼ aguivayi mambu meni motsu.