Jeremie 13 - La Sainte Bible en Langue Yipunu

¹ Fumu amansindiga rie: Wenda yesumba beleeti ajimavagu na tsanda jilina na jiduari tumba guyajisusa.

² Nyimasumba beleeti nana Fumu amatumina na nyimajiduara.

³ Mambu maFumu mamansingulu temu ajimubeji rie:

⁴ Bonga beleeti aji gumasumba aji gumaduara, retsama nowenda o yiari yiEuphrate avana gukajisuega o gari mamanyi.

⁵ Nyimawenda na nyimajisuega va disimu diEuphrate nana Fumu amatumina.

⁶ Bilumbu bipuela binovioga Fumu amatuma rie: Relama, wenda o Euphrate, gukayebonga beleeti aji nyimaguruma uyesuega.

⁷ Nyimawenda o Euphrate, nyimatima na nyimapalisa beleeti va mbura aji nyimajisueyila; laba beleeti jimabiva; jisamamueba na yisalu.

⁸ Mambu maFumu mamansingulu rie:

⁹ Fumu amavosa rie: Anana nyudiamisila dunangu dubaJuda na dubisi Jerusalem wandi.

¹⁰ Bavu batu babi abebusi ugulu mambu mami, abewarisi kanda tsiogu na bedukingi bansambi bangana nobasalila nesi ugudama va gusu ogu. Bakaluyi nderi beleeti ejiji ajigomueba na yisalu!

¹¹ Fumu amavosa rie: Nana betungili dibaala beleeti anana wandi nyimatungila dinonga na baIsrael botsu na baJuda yiri babi batu bami aboroyisa diina diami nesi duyitsu duami nesi bundumba buami; tumba basamagaru.

Malamu na kabu Nsambi

¹² Gukabatsingula mambu memama rie: Fumu Nsambi Israel jandi rie: Bisanga biotsu biubasu malamu. Jogu boguwivula rie: Tugejabi yiri bisanga biotsu biubasa malamu?

¹³ Mbana gukabatsingula rie: Fumu jandi rie: Gulu, nyubasa bisi bulongu buebubu malangi; nesi bakaga abavu batsana va yitsiga yiDavid, nesi bavagulitsi bapagu nesi babiyitsi na bisi Jerusalem botsu!

¹⁴ Fumu amavosa rie: Nyubagubasana bamosi na basusu nesi bataji na baana. Ngobawamusa na ngobakelisa na ngobalasa yingeba; vagaa diambu adiukubitsa ubabunga.

Leguluanu temu jikekevioyila

¹⁵ Guluanu, na liganu matuji! Duyaba na dunangu! Fumu uvosa evosi.

¹⁶ Yitsanu Fumu aguvu Nsambi enu mbe asakasundusa pisama na mbe dusakaduku mabaku o mikongu amivu o tsi bimbombori. Duviva yijalala tumba oyivaga pisama na yiukaluga pisama jipinda fio!

¹⁷ Pa dugegulu dilubu diedidi nyulilanga yika ulila dunangu duenu; misu mami mobasa na matsanga mu mbari mugamba uFumu ubegu o buviga.

Bulumbi buNsambi ombu mukuta ukaga

¹⁸ Tsingula kaga na kaga jimugetu rie: Kesunsanu! Dugaba dukembu enu dumabonduga.

¹⁹ Misiengi amivu o yiari yitandu mimadibugu; vagaa mutu umidibula; baJuda botsu bamabegu baviga, usamasiala ne umosi.

Jerusalem umalensu

²⁰ Jerusalem, buaga misu nogengila bavinitsi aberuyili o banda. Mugamba agumaguvegu uka? Tsiri mugamba eni agumalasa bundumba buagu?

²¹ Yi guvosa ava bogukilisila? Ndeʼ beni gumabalonsa uba bafumu. Buali bugogugaanga dedi mosi nana mugetu aguiburi egaangulu na misongu?

²² Je gukewivula rie: Dibandu yi nyilabili mambu memama? Bilinga biagu bimasielu na bisonganyi biagu bimalabana mu diambu dimabi magu mapuela mapuela.

²³ Munombi uEthiopie orungula ukaluga yibamba? Je magena morungula uvinsa matona mandi? Nesi! Munongu mosi jenu adumaguku uvaganga mabi dugorungula uvaga maboti.

²⁴ Kabogu nyudupansa dedi mosi na biriri abivembulu na punga o kumu.

²⁵ Fumu amavosa rie: Jerusalem adina la dikabu diagu adi nyimagusueyila. Gumandibana; gumavayila mamfurulu yitu.

²⁶ Nyuguvula yilinga; bolaba yisonyi yiagu.

²⁷ Nyimalaba bumbembu buagu na banyungilitsi bagu na nsoruru tsiagu tsineni va julu tsimikongu nesi o kumu; nyiina, tindi nsoruru tsiagu. Ka muna maguga ma gulaba Jerusalem! Te na temu yi gubanganga na muinsi?