Jeremie 12 - La Sainte Bible en Langue Yipunu

¹ Aa Fumu, ndeʼ guvu tindi usungama, ngorungula utumuna paga nagu, tumba nyirondi uvosa nagu mu diambu dibunsonsi buagu: Dibandu yi batu babi belabingi ubueji? Dibandu yi basoyitsi badiela botsu bavu na duvotsu?

² Ndeʼ gumabavara na bamabendisa ngansi, beneyi na beburi milunda; diina diagu divosungu nogu tumba mirima miogu mivu vala nagu.

³ Aa Fumu, ndeʼ guinjabi na guindabi ndeʼ guiweliyi murima ami nana nyigutasili. Mbe ka jogu; babeyi nana bindombu abibegu o uboku babi bakunsama uboku.

⁴ Te na temu yi dilongu diuba o bukuili? Te na temu yi bisinga biunyengilanga? Mu diambu dimbivulu tsibisi bulongu bibulu na batsoli befuangingi. Batu bevosi rie: Nsambi agelabi adituivayingi.

⁵ Pa guivovini na jogu abewendi na makulu na begutogusu yika tsie guvovinina na bakabala? Pa gurina o bulongu abuvu sui yi guvaga ava gutolila o Jourdain agumabasa nyidu?

⁶ Baana bataji bagu na bisi ndagu taji agu begufundi; beyenagamuga va nsima agu na mufi maneni. Guyabavayila yitu nesi ava bo-guvosila mambu maboti.

Nsambi amabusa Ndagu andi nabatu bandi

⁷ Nyimabusa Ndagu ami na nyimasila batu bami, nyimabawakisa ombu bavinitsi bogu.

⁸ Abami bamakaluga nderi yimbungu ayimakumbila o musiru na bukanyi, la dibandu ngebarondili.

⁹ Je abami bamakaluga tsoli ajikumbu na batsoli aberuyili yiari na yiari? Binengili yinombu yiyibulu yimusiru! Bawendi biotsu o mulambu!

¹⁰ Babungulitsi babindombu bapuela bebungi mfuga tsirayisan; betsiarili nungi ami; bamakalusa nungi ami yika mbura jigumuga.

¹¹ Nyiina, bamajikalusa mbura jigumuga, jimasundila ulabana yika difutu; bulongu buotsu bumabungu ne mutu mosi ageburondi.

¹² O biari biotsu bikumu babungitsi betolingi. Dijenga diFumu disielisini bulongu ubandila o yiari yimosi te no yiari yisusu; ne mutu mosi agaa na duvotsu.

¹³ Dumavara ble na dumatsonsiga yika matsiendi; dumaketsoyisa tsiri udila yima. Ka muna yisonyi yi dulaba na dutsonsugu duenu! Fumu amadulasa yionyi na kabu andi jineni.

Fumu na abebambini na baIsrael

¹⁴ Guluanu adi Fumu evosi mu diambu dibatu babi abebambini na batu bami abebembi disiala adi nyimavega ombu batu bami baIsrael. Nyubapatula bulongu buogu na nyubapatula baJuda wandi.

¹⁵ Nyinodivaga, nyumuebalasa yingeba na nyumuebagabusa mutu mutu o disiala diandi na mutu mutu o bulongu buandi.

¹⁶ Fumu evosi rie: Diuleba bamalonsa batu bami uleva pesi na diina diBaal pa bowiji bifu bibatu bami na pa boleva pesi na diina diami rie: Fumu ejabi! Mbana bolaba ubueji va mosi na batu bami.

¹⁷ Tumba pa bagedikipi nyubabunga na nyubatsiemusa.