Jeremie 10 - La Sainte Bible en Langue Yipunu

Nsambi aguvu monyu na bakosi

¹ Jenu baIsrael guluanu bulumbi abu Fumu edutsinguli!

² Fumu evosi rie: Duyagukulila bisi malongu na duyaduma bimaga bijulu diuleba bisi malongu bebidumi.

³ Muyitsa ubatu bamosi ugaa na divindugulu. Bewangi muiri o musiru; keti eguvali kosi.

⁴ Bejibuejisi na lora jivema na lora, bejigomini na batsongu yiri jigokunga.

⁵ Bansambi beni bavu nderi yisama, bagevosi, bebananguli mu mbari bagorungula uwenda. Duyabaduma, bagojaba uvaga dibi na bagorungula uvaga diboti.

⁶ Aa Fumu, ne umosi agebagunu nagu! Ndeʼ guvu muneni na diina diagu divu na diduma na mangolu.

⁷ Anyi agoguduma, ndeʼ aguvu Kaga jimalongu? Ndeʼ aguvu uwelimina udumu. Va gari bango diela botsu bamalongu nesi o bufumu buotsu ne umosi agaa dedi nagu.

⁸ Botsu bavu biduka na biduka. Muyitsa ubakosi uilonsi mambu amagaa na divindugulu.

⁹ Bakosi beni bamabaku lora jivema ajimaruyila o Tarsis, na lora ajimaruyila o Oufaz. Keti jilora ebasalisi. Bebaduisi tsanda tsidumbulu na tsiyinyuru ayivu va gari ubenga na dumbulu. Botsu bavu yisalu yijogu abesali na buketi.

¹⁰ Fumu avu Nsambi jingensa; avu Nsambi jimonyu na kaga jimutubu. Butamba buireyimi ava enyoyili na bisi malongu bagewarili kabu andi jineni.

¹¹ Dukabatsingula rie: Bansambi abasamavaga julu na butamba botsiemuga tindi utsiemuga.

¹² Fumu amawala julu amasunda butamba na mangolu mandi amavaga bulongu na dujabu duandi.

¹³ Ava mamba majulu megululu diufi diandi megukimi; ematisi mamungi o masuka mabutamba evedimisi tsiemu na enoyisi mfula; va julu vana epalisi punga mu bilundulu biandi.

¹⁴ Dujabu duFumu duikalusi batu botsu biduka, keti jiotsu jilora elabi yisonyi na bakosi bandi; mu mbari bakosi bandi belabini yika ulabana, bagaa na muvumu.

¹⁵ Bagaa na tsongu, yisalu yindunsulu. Botsu bana botsiemuga ava Fumu oruyila.

¹⁶ Tsiri nana na Nsambi Israel, agumasunda bima biotsu; baIsrael bavu batu bandi. Diina diandi divu Fumu Mabadi.

Dubungu dusunda ulabana (Jeremie)

¹⁷ Jerusalem, ndeʼ aguvu utsana na munyongu uyenabeganga abiagu.

¹⁸ Fumu evosi rie: Temu ejiji nyutinda bisi bulongu o vala; nyubabamiga yiri bavinitsi bobagaanga.

(Jerusalem)

¹⁹ Jerusalem amagamuga rie: Ka muna maguga ma nyilabi! Nyimatsungulu! Pura ami jivu tindi buali! Tumba nyivosi rie: Vagaa diambu, nyumawarila!

²⁰ Ndagu ami jitsanda jimapansu, mikudu miotsu mimatabuga. Baana bami bamansila, besatsi. Nyisaa na batu umuetangiyila ndagu ami jitsanda, nesi uvakiga matsanda.

(Jeremie)

²¹ Babungulitsi babindombu bamaba biduka, basamaronda Fumu. La dibandu bamakondila na migamba miogu mimapansiganga.

²² Guluanu, matamba mamagulunu; kumfu jineni jimaruyila o yiari yibanda ukalusa misiengi miJuda kumu nesi yisuemunu yimakoju.

Jeremie esambilili batu bandi

²³ Aa Fumu, nyidijabi! Nsila jimutu jigaa jijaʼ beni na mutu uotsu agekewendisa.

²⁴ Aa Fumu, kilisi na dusungugu tumba guyaviosulila ulasa kabu agu mu mbari gukembunga.

²⁵ Witila kabu agu o malongu amagegujabi, nesi ombu batu abageyitsi diina diagu! Bamakinda batu bagu bamabakinda tindi ukinda na bamapansa mbura tsiogu.