Jeremie 1 - La Sainte Bible en Langue Yipunu

¹ Dibuku diedidi la mambu maJeremie muana dibaala uHilkia umosi va gari bavagulitsi bapagu baAnatot o bulongu buBenjamin.

² Fumu amamutsingula bulumbi buebubu va temu Josias muana dibaala uAmon agumaba kaga jiJuda mu yilima yiyigumi na birieru bidurumu duandi.

³ Amamuevosa nandi va temu Joaquim muana dibaala uJosias amabila kaga jiJuda mu yilima yidigumi na yimosi biSedecias muana dibaala ususu uJosias agumaba kaga jiJuda wandi na mu temu aji bisi Jerusalem bamabegu o buviga mu tsungi jimuranu.

Nsambi unengila enengili Jeremie uba mubiyitsi andi

⁴ Mambu maFumu mamansingulu rie:

⁵ Nyimagujaba ne ngagusunda o moji nguji agu, nyimagusola musalitsi ami, ne gukaburu nyimagusola mubiyitsi ombu batu.

⁶ Nyimawagula rie: Aa Fumu! Labati nyisakajaba uvosa, nyikivu ngebi.

⁷ Fumu amawaka rie: Guyavosa rie: Nyivu ngebi Mu mbari vengu guwenda ombu botsu aba nyugusindiga; guvosa motsu ama nyuguruma.

⁸ Guyabaduma; nyuba nagu uguwaka kalala. Motsu mana Fumu amansingula.

⁹ Mbana Fumu amasamba dikaka diandi na amabemba munu ami na amavosa rie: Ndeʼ guvosanga mambu mami.

¹⁰ Namunyi nyiguveyi musuga uotsu mu malongu motsu nesi mu bufumu buotsu, urubula nesi uberusa, ubunga nesi upansa umuerungulila nomuevara.

Yitayi yimumandi na mbiji ajifunduyi

¹¹ Kabogu Fumu amakwivula rie: Jeremie yi guilabi? Nyimawaka rie: Nyilabi yitayi yimumandi.

¹² Fumu amansingula rie: Gutsilaba buranga, menu nyukipa udugusu diambu adi nyimatabula.

¹³ Fumu amamuekwivula rie: Yi guilabi? Nyimawaka rie: Nyilabi mbiji ajifunduyi o yiari yibanda.

¹⁴ Kabogu Fumu amansingula rie: O yiari yibanda purulu jiunyavila ombu bisi bulongu botsu.

¹⁵ Nyunengila batu botsu babufumu buyiari yibanda. Boruga uyesunsa bitsiga bibufumu va miunu mindagu miJerusalem uyetsiengila bivaga botumuna misiengi miotsu miJuda.

¹⁶ Nyubatabulila bunsonsi buami mu diambu dimbivulu tsiogu mu mbari bamambusa na bamavagulila bansambi banganga bima bimbunga jiboti na bamagudimina bansambi aba jogu beni bamasala uyitsa!

¹⁷ Ndeʼ Jeremie warisa tsanda agu relama nobatsingula motsu ama nyigurumi. Guyaregama, vo nyugureyimisa va gusu ogu.

¹⁸ Namunyi nyigusili va gari bisi bulongu buotsu uba nderi musiengi ukandu, nesi dikutu dibudilu nesi yivaga yikunga ugaga bakaga baJuda nesi barumitsi basusu nesi bavagulitsi bapagu nesi bisi bulongu.

¹⁹ Botoga divita nagu tumba bagogubetsa mu mbari nyiji nagu ugukelisa Menu Fumu oyimatubuli.