Jean 7 - La Sainte Bible en Langue Yipunu

Baana banguji baJesus basamamuvayila yitu

¹ Amana manovioga Jesus amalinganga o yiari yiGalilee mu mbari baJuif baJudee bamarombanga umuboka.

² Kabogu feta jibaJuif, diwendi rie: feta jimasamba, jimaba bebeli.

³ Baana banguji baJesus bamamutsingula rie: Gusuga vava wenda o Judee yiri badukitsi bagu bolaba bisalu abi guisali.

⁴ Mutu aguirondi ujabunu agesueyi bisalu biandi. Kabogu ndeʼ aguisali bisalu bineni kelasa ombu batu.

⁵ (Diwendi rie: baana banguji bandi basamamuvayila yitu.)

⁶ Jesus amabatsingula rie: Diweru diami disakatola tumba ombu genu diweru la diweru.

⁷ Batu bageduvini tumba bepini mu mbari nyivosingi yiri mambu mogu magaa maboti.

⁸ Jenu wendanu o feta eni menu ngowenda mu mbari diweru diami disakatola.

⁹ Anomana ubatsingula nana jandi amasiala o Galilee.

Jesus uwenda ewendi o feta

¹⁰ Baana banguji baJesus banowenda o feta Jesus amabaduka o musuega.

¹¹ BaJuif bamamurombanga mu temu feta na bamawivulanga rie: Jandi aka?

¹² Bamamuvosilanga puela mambu. Bamosi rie: Muvayitsi maboti. Basusu rie: Nesi, mudunsitsi avu.

¹³ Tumba bamavosa motsu o musuega mu mbari bamalabila baJuif goma.

¹⁴ Ava gari feta Jesus amakota o Ndagu Nsambina amabanda ulonsa.

¹⁵ BaJuif bamakambulu na bamawivula rie: Tsie ejabili Bisonu, jandi agusamakota o yikola?

¹⁶ Jesus amabagabusila rie: Malongi mami mageruyili ombu meʼ beni tumba ombu Nsambi omansindiga.

¹⁷ Mutu uotsu oyivayi duganu duNsambi ejabi yeri malongi mami meruyili ombu Nsambi vo mavu amami.

¹⁸ Jandi oyivosi amandi erombi bundumba buandi. Jandi oyirombi bundumba bujandi omamusindiga jandi guna evosi ngensa na ndunsulu tsigaa nandi.

¹⁹ Moise asamaduvega migaga? Dibandu yi dugemikelisili? Dibandu yi duirondili umboka?

²⁰ Bamawagula rie: Ndeʼ guna yinyunyi yibi. Anyi erondi uguboka?

²¹ Jesus amabagabusila rie: Nyimasala mua yisalu yimosi na jenu botsu dumakambulu.

²² Moise amadulonsa durebu (adugeruyili ombu Moise tumba ombu bivunda bienu) na jenu duirebi dibaala yilumbu yitsona.

²³ Pa dibaala amarebu yilumbu yitsona yiri mugaga uMoise udugusu dibandu yi jenu duinyoyili mu mbari nyimabelusa mutu yilumbu yitsona?

²⁴ Duyatabula bunsonsi te na dumalegulu motsu, diwendi rie: tabulanu bunsonsi buwelimina.

Je Jesus la Christ?

²⁵ Bisi Jerusalem bamosi bamawivulanga rie: Tsia jandi guna berondi uboka, mbeyianu?

²⁶ Labatianu evosi na bagemugandisi! Tanguji bivunda betasi yiri jandi la Christ, mbeyianu?

²⁷ Ava Christ oruyila jetu tugojaba mbura aji orugasana tumba jandi gugu jetu tugejabi muisi yi avu?

²⁸ Jesus amawaka ava amalonsila o Ndagu Nsambi rie: Jenu duinjabi? Duijabi muisi yi nyivu? Nyimasindugu na jandi omansindiga avu ngensa, jenu dugemujabi.

²⁹ Menu nyimujabi mu mbari nyimarugasana ombu gandi la jandi omansindiga.

³⁰ Kabogu jogu mbe bamugaanga tumba basamarungula mu mbari diweru diandi mbe disakatola.

³¹ Bapuela bamamuvayila yitu na bamawivulanga rie: Ava Christ oruyila jandi ovaga bimaga uviolila abi jandi gugu evayi?

Bagora bamasindugu uyegaanga Jesus

³² BaJuif abamaba baPharisie banogulu bevosi nana bamasindiga bagora umugaanga.

³³ Jesus amavosa rie: Nyikivu nenu mua pesu temu mbana nyuwenda ombu jandi omansindiga.

³⁴ Jenu dutomba na dugondaba, via! Dugorungula uruga ombu gami.

³⁵ Mu dionyi baJuif bamawivusana rie: Jandi agunyi owendasana yiri tugomuemulaba? Owenda ombu baGrec uyebalonsa?

³⁶ Dibandu yi evosili rie: Dutomba na dugorungula uruga ombu gami?

Mamba mamonyu

³⁷ Yilumbu yiusita yimaba yilumbu yineni yifeta. Muna yilumbu yieni Jesus amavosa rie: Pa mutu egulu puila aruyi ombu gami uyinu.

³⁸ Bisonu bisonugu rie: Jandi oyipayili yitu mamba mamonyu movuvanga o gari andi.

³⁹ (Amavosa nana mu diambu diYinyunyi yiNsambi ayiuvegu ombu jogu abomuvayila yitu; Yinyunyi yieni mbe asakavegu mu mbari Jesus mbe asakamatusu.)

Batu bamakegaba mu diambu diJesus

⁴⁰ Banogulu mambu meni bamavosa rie: Dingensa dibaala diedidi divu mubiyitsi!

⁴¹ Basusu bamavosanga rie: Jandi la Christ na basusu bamawivula rie: Je Christ opalila o yiari yiGalilee?

⁴² Bisonu bisonugu rie: Mutegula uDavid na mu musiengi uBethleem amu David amatsaninanga amu Christ opalila, mbeyianu?

⁴³ Kabogu va gari ogu vamaba dugabu.

⁴⁴ Bamosi bamaronda umugaanga tumba basamarungula.

Mirima migala mibivunda bibaJuif

⁴⁵ Bagora bamagabuga miogu na miogu ombu bivunda bibavagulitsi bapagu nombu baJuif abamaba baPharisie. Bamabawivula rie: Mu mbari yi dugaamubeyila?

⁴⁶ Bagora bamabagabusila rie: Mutu asakavosa nana dibaala dieni evosili.

⁴⁷ BaPharisie bamabawivula rie: Je jenu wenu dumadunsu?

⁴⁸ Va bivunda vo baPharisie abomuvayila yitu?

⁴⁹ Tumba abana bagejabi migaga, bavu abalogu!

⁵⁰ Nicodeme agumaruga mukolu ombu Jesus na omaba nogu amawivula rie:

⁵¹ Tuna musuga uvega mutu mbela pa tusakagulu adi amavaga?

⁵² Bamamuwivula rie: Ndeʼ wagu guji muisi Galilee? Kelula buranga na gulaba yiri babiyitsi bagepalili o yiari yiGalilee. [

⁵³ Mutu mutu amagabuga o ndagu andi.