Jean 5 - La Sainte Bible en Langue Yipunu

Jesus ubelusa ebelusi yimbolutu

¹ Amana manovioga baJuif bamavaga feta na Jesus amawenda o Jerusalem.

² Kabogu o Jerusalem va mugula udikotulu diBindombu vamaba yiduna yimamba ayimanengulungu Bethzatha mu Hebreu na ayimaba na piasu yiranu.

³ Mu piasu tsieni mumaba bibedu bipuela abimasilama vana; bidunga na bitsondu na bimboiutu. [Bamavivanga temu mamba mefunduyili.

⁴ Diwendi rie: yiansa yiFumu yimasunduganga uyefundula mamba. Yibedu yitega ayimasunduga o mamba ava mamafunduyilanga yimabeluga.]

⁵ Avana vamaba dibaala adimabeianga yitsingu yineni, diwendi rie: magumariem na yinana yibilima.

⁶ Jesus anomulaba asilama na anojaba yiri amaba nobela yitsingu yineni amamuwivula rie: Ndeʼ guirondi ubeluga?

⁷ Yibedu amamugabusila rie: Mulonsi ngaa na mutu uputiga mu mamba ava mefunduyili na ava nyiwendili ususu eteyili usunduga.

⁸ Jesus amamutsingula rie: Relama, bonga tangi agu na wendanga.

⁹ Dibaala dieni amabeluga vana vana. Amabonga tangi andi na amayenawenda. Dionyi dimavagu mu yilumbu yitsona.

¹⁰ Kabogu baJuif bamavosa nandi rie: Namunyi yivu yilumbu yitsona; gugaa na musuga ubega tangi agu.

¹¹ Amabagabusila rie: Jandi otsimbelusa atsinsingula rie: Bonga tangi agu na wendanga.

¹² Bamamuwivula rie: Anyi atsigutsingula rie: Bonga tangi agu na wendanga?

¹³ Tumba agumabelusu asamajaba mutu eni mu mbari Jesus amatsiemuga va gari yinombu ayimaba va mbura eni.

¹⁴ Ava tsisiga Jesus amamurasuna o Ndagu Nsambi na amamutsingula rie: Labati gumabelusu. Guyamuevaga masumu yiri gugolaba disusu adiviolila uroga.

¹⁵ Dibaala dieni amayenawenda na amatubulila baJuif rie: Agumambelusa la Jesus.

¹⁶ Kabogu baJuif bamabanda ukuana Jesus mu mbari amabelusa mutu mu yilumbu yitsona.

¹⁷ Tumba Jesus amabagabusila rie: Taji ami esalingi na menu wami nyisalingi.

¹⁸ BaJuif banodigulu bamamuerombanga umuboka. Bamajaba yiri amasumuna mugaga mu diambu ditsona mbana va julu vana evosi yiri Nsambi aji tindi Taji andi na aji dedi nandi.

Musuga uMuana Mutu

¹⁹ Kabogu Jesus amavosa nogu rie: Dingensa nyidutsinguli rie: Muana agorungula usala yisalu jaʼ beni; esali yika ayi Taji esali. Biotsu abi Taji esali Muana ebisali munongu mosi.

²⁰ Taji erondi Muana na emulonsi biotsu abi jandi esali na jandi omulonsa bisalu abiviolila bibi te na dukambulu.

²¹ Mu mbari nana Taji erambusili bamfumbi nobavega monyu anana Muana wandi eveyili monyu ombu agu erondi umuvega.

²² Taji agetabulili mutu bunsonsi tumba amavega bunsonsi buotsu ombu Muana

²³ yiri botsu boyitsa Muana nana beyitsili Taji. Uotsu agugeyitsi Muana ageyitsi Taji omamusindiga.

²⁴ Dingensa nyidutsinguli rie: Oyigulu mambu mami na evayili omansindiga yitu, jandi ana monyu umutubu na agovegu mbela tumba amagusuga o dufu na amavioga o monyu.

²⁵ Dingensa nyidutsinguli rie: Diweru diruyi na dimaruga kala adi bamfumbi bogululu diufi diMuana Nsambi na bodila monyu.

²⁶ Mu mbari Taji jaʼ beni ana monyu kabogu amavega Muana musuga ugaba monyu.

²⁷ Amamuvega musuga utabula bunsonsi mu mbari jandi aji Muana Mutu.

²⁸ Duyakambulu mu dionyi mu mbari diweru diuruga adi botsu abavu mu mangila bogululu diufi diandi

²⁹ na bopala. Jogu abamavaga maboti borambuga na ndunga tumba jogu abamavaga mabi borambuga na mbela.

Bilimba bimusuga uJesus

³⁰ Ngorungula usala yisalu meʼ beni; yika nana nyigululu anana nyitabulili burisonsi na bunsonsi buami buvu busungama mu mbari ngerondi duganu duami tumba duganu dujandi omansindiga.

³¹ Pa nyikesingisila bumbeji, bumbeji buami bugaa yilimba yiwelimina.

³² Va mutu ususu aguinsingisili bumbeji na nyijabi yiri bumbeji abu ensingisili buvu bungensa.

³³ Dumasindiga bilumbi ombu Jean na amasingisila bumbeji bungensa.

³⁴ Digewendi rie: Bumbeji buami buvu na tsongu mu mbari bumasingusulu na mutu; nyivosi motsu mana yiri dugobulu.

³⁵ Jean amaba nderi lambi ajimabangusu na ajimadumonitsa; dumalaba ubueji na yijalala yiandi.

³⁶ Tumba nyina bumbeji abuiviolili abu Jean uroga; bisalu abi nyisali Tata amabipega, bisalu bieni bilasi yiri Tata amansindiga.

³⁷ Taji omansihdiga jaʼ beni amasingisila bumbeji mu diambu diami.

³⁸ Dusakagulu diufi diandi na dusakamulaba; mambu mandi magetsani nenu mu mbari dugevayili agu jandi amasindiga yitu.

³⁹ Duikeluli Bisonu mu mbari duitasi anana dudilila monyu umutubu; dingensa bionyi bisingisili bumbeji buami.

⁴⁰ Tumba dugerondi uruga ombu gami udila monyu aguvu ngensa.

⁴¹ Ngerondi ukakusu na batu.

⁴² Tumba nyidujabi na nyijabi yiri dugaa na durondu duNsambi.

⁴³ Nyimaruga na musuga uTaji ami na dusamandila; ava mutu ususu oruyila na musuga ujaʼ beni nyijabi dumudila.

⁴⁴ Duirondi dikakisa dijenu beni na jenu beni tumba dugerondi dikakisa adiruyili ombu Nsambi kabogu tsie durungulila uvaga yitu?

⁴⁵ Duyatasa yiri menu nyudufuengilila va gusu Taji. Jandi oyidufuengilila la Moise o jenu duitasili.

⁴⁶ Pa ngensa dumavayila Moise yitu mbe dupayila yitu wandi mu mbari amatubula mambumami.

⁴⁷ Tumba pa dugevayili Bisonu biandi yitu tsie duvayila mambu mami yitu?