Jean 4 - La Sainte Bible en Langue Yipunu

Jesus na mugetu muisi Samarie

¹ Jesus amajaba yiri baJuif abamaba baPharisie bamagulu yiri amavaganga badukitsi nobatisanga bapuela ne uviolila Jean.

² (Tsiri ngensa mu mbari Jesus jaʼ beni asamabatisa batu yika badukitsi bandi abamabatisanga.)

³ Mbana Jesus amagusuga o Judee na amagabusila o Galilee.

⁴ Kabogu dimaba yiri vengu ovioyila o yiari yiSamarie.

⁵ Amatola o musiengi umosi uSamarie, diina dimusiengi eni Sychar agumaba bebeli na musiru agu Jacob amavega ombu muana andi Joseph.

⁶ Avana vamaba yileka yiJacob. Jesus anotogulu mu diambu dimuendu amaba atsana va mugula yileka yieni. Dimaba bebeli na diweru dimuangulu.

⁷ Mugetu muisi Samarie amaruga uyitega mamba. Jesus amamuvonda rie: Peyi mamba monu.

⁸ (Yiotsu yina badukitsi baJesus bamawenda o musiengi uyesumba biguji.)

⁹ Mugetu muisi Samarie amawivula Jesus rie: Mu mbari yi ndeʼ aguvu muJuif guipondili mamba? Gugejabi yiri nyiji muisi Samarie? (BaJuif bagaa na yipoti na bisi Samarie.)

¹⁰ Jesus amamugabusila rie: Mbe ndeʼ guijabi pegulu Nsambi na jandi oyivosi nagu rie: Peyi mamba! Ndeʼ beni mbe gumuvonda mamba na mbe oguvega mamba mamonyu.

¹¹ Mugetu amavosa nandi rie: Mulonsi, gugaa na yima uteyila mamba na yileka yivu yidonga kabogu agunyi gudilila mamba mamonyu?

¹² Taji etu Jacob amatuvega yileka yieyiyi. Jaʼ beni na baana bandi nesi migamba miandi, botsu bamanuanganga mamba meni. Ndeʼ guiviolili Jacob buneni?

¹³ Jesus amamugabusila rie: Uotsu aguinu mamba memama omuegulu puila;

¹⁴ tumba jandi ogunu mamba ama nyumuvega agomuegulu puila, via! Mu mbari mamba ama nyumuveganga moba ombu gandi nderi yileka ayivuvingi mamba mamonyu amovega monyu umutubu.

¹⁵ Mugetu amamuvonda rie: Fumu peyi mamba meni yiri ngomuegulu puila mbana ngomueruga uyitega mamba.

¹⁶ Jesus amamutsingula rie: Wenda noyenengila mulumi agu, dukatasuna vava.

¹⁷ Mugetu amamugabusila rie: Ngaa na mulumi. Jesus amamutsingula rie: Ndeʼ guna ndunga uvosa rie: Ngaa na mulumi.

¹⁸ Mu mbari gumaleba na balumi baranu na aguna aguvu nagu namunyi agaa mulumi agu. Mu dionyi gutsivosa buranga.

¹⁹ Mugetu amavosa rie: Mulonsi, nyilabi yiri guji mubiyitsi.

²⁰ Bataji betu bamasambililanga Nsambi o julu mukongu egugu tumba jenu baJuif duivosi yiri mbura jiusambilila Nsambi jivu o Jerusalem.

²¹ Jesus amamutsingula rie: Mugetu, payili yitu mu mbari diweru diuruga adi bagomuesambilila Nsambi nesi va julu mukongu egugu nesi o Jemsalem.

²² Jenu bisi Samarie duisambili agu dugejabi jetu baJuif tuisambili agu tuijabi; dugobutsu dumaruyila ombu baJuif.

²³ Tumba di weru diruyi na dimamga kala adi basambilitsi bangensa bosambililanga Taji na murima na ngensa mu mbari abana bavu basambilitsi aba Taji erondi.

²⁴ Nsambi Yinyunyi avu na jogu abemusambili bamusambilingi na murima uotsu na ngensa.

²⁵ Mugetu amamutsingula rie: Nyijabi Messie oruga (diwendi rie: Christ); ava oruyila otuvindiyila mambu motsu.

²⁶ Jesus amamutsingula rie: La menu anyivosi nagu.

²⁷ Vana temu eni badukitsi baJesus bamaruga, banolaba Jesus uvosa evosi na mugetu eni bamakambulu. Tumba ne mutu mosi asamawivula mugetu rie: Yi guirondi? Vo rie: Diambu yi guivosili nandi?

²⁸ Mbana mugetu amasila tsuva andi na amayenawenda o musiengi; amatsingula batu rie:

²⁹ Ruganu ulaba dibaala aditsinsingula motsu ama nyimavaganga; jandi agoba Christ?

³⁰ Bamarambuyila o musiengi na bamawenda ombu Jesus.

³¹ Mu temu eni badukitsi bamagomanga Jesus uji novosa rie: Mulonsi, ji mua biguji.

³² Tumba amabatsingula rie: Nyina biguji biuji abi jenu dugejabi.

³³ Kabogu badukitsi bamawivusana rie: Mutu atsimubeyila biguji?

³⁴ Jesus amabatsingula rie: Biguji biami la uvaga duganu dujandi omansindiga nodugusu yisalu yiandi.

³⁵ Jenu duivosi rie: Vakivu tsungi jina mbana tutsonsiga tumba nyidutsinguli rie: Labatianu manungi: biguji bimabueji, diweru diutsonsiga dimatola.

³⁶ Jandi oyitsonsiyi amakedilila futa andi mu mbari egukiyi dutsonsugu dumutubu. Diwendi rie: Jandi oyivari na jandi oyitsonsiyi bolaba nsangu va mosi.

³⁷ Kabogu Bisonu bivu ngensa abisonugu rie: Umosi evari na ususu etsonsiyi

³⁸ Nyimadusindiga utsonsiga abi jenu dusamasala; basusu bamasala na jenu dumakusuyila mu yisalu yiogu.

³⁹ Bisi Samarie bapuela abamatsana o musiengi eni bamavayila Jesus yitu mu mbari mugetu amavosa rie: Jandi atsinsingula motsu ama nyimavaganga.

⁴⁰ Ava bisi Samarie bamamurasunina bamamuwivula utsana nogu. Amatsana nogu bilumbu bibeji.

⁴¹ Va julu vana basusu bapuela bamamuvayila yitu ava bamagululu ama jaʼ beni amavosanga.

⁴² Bamavosa na mugetu rie: Tusamamuvayila yitu yika mu mbari gumavosa misamu miandi tumba tumamuvayila yitu mu mbari tumagulu mambu mandi na tuijabi yiri ngensa aji Mugobutsi ubisi bulongu.

Jesus ubelusa ebelusi muana uyivunda yibagora

⁴³ Bilumbu bieni bibeji binovioga Jesus amagusuga vana uwenda o Galilee.

⁴⁴ Amavosa rie: Mubiyitsi agegobusu o bulongu buandi.

⁴⁵ Ava amatolila o Galilee bisi Galilee bamamudila na buranga mu mbari ava bamabila o Jerusalem ukelisa feta Paque bamalaba motsu ama amavaga.

⁴⁶ Kabogu amagabusila o Cana o Galilee aguna amakalusila mamba malamu. Va Capernaum vamaba yivunda yibagora bakaga, muana andi amabelanga.

⁴⁷ Anogulu yiri Jesus amaruga o Judee o yiari yiGalilee amawenda ombu gandi na amamuwivula ugabuga o Capernaum uyebelusa muana andi agumaba bebcli nofu.

⁴⁸ Jesus amamuwivula rie: Gugorungula upayila yitu pa gugolaba bimaga na bilimba?

⁴⁹ Yivunda yibagora bakaga amamunengila rie: Mulonsi, ruga muana ami akekefuila.

⁵⁰ Jesus amamutsingula rie: Wenda, muana agu amabeluga. Kabogu amavayila diambu adi Jesus amamutsingula yitu na amayenawenda.

⁵¹ Ava amawendilanga basalitsi bandi bamaruga umubengusana na bamamubeyila musamu egugu rie: Muana amabeluga.

⁵² Amabawivula diweru dieni adi muana amabeluyila na bamamugabusila rie: Masiga ava murekumunu dibagu ditsisaguyila.

⁵³ Taji amajaba la diweru dieni adi Jesus amamutsingulila rie: Muana agu amabeluga. Jandi amavaga yitu va mosi na bisi ndagu andi botsu.

⁵⁴ Yimaga yieyiyi yimaba ayimubeji yiotsu ayi Jesus amaruyila o Judee o yiari yiGalilee.