Jean 3 - La Sainte Bible en Langue Yipunu

Jesus na Nicodeme

¹ Vamaba mutu va gari baJuif abamaba baPharisie, diina diandi Nicodeme,

² amaba yivunda yimosi va gari ogu. Amawenda mukolu mosi ombu Jesus na amamutsingula rie: Mulonsi jetu tuijabi yiri ndeʼ gumaruyila ombu Nsambi mu mbari ne mutu mosi agorungula uvaga bimaga abi ndeʼ guivayi pa Nsambi agaa nandi.

³ Jesus amamugabusila rie: Dingensa nyigutsinguli viri pa mutu agoburu duburu dugona agorungula ujaba Durumu duNsambi.

⁴ Nicodeme amamuwivula rie: Tsie mutu omueburulu pa aka yinunu? Omuekota o moji nguji andi nomueburu?

⁵ Jesus amamugabusila rie: Dingensa nyigutsinguli yiri pa mutu agoburu na mamba na Yinyunyi yiNsambi agorungula ujaba Durumu duNsambi.

⁶ Mutu eburi muana tumba yinyunyi yimutu yiburu na Yinyunyi yiNsambi.

⁷ Guyakambulu mu adi nsigutsingula rie: Vengu gumueburu duburu dugona.

⁸ Punga jivepi agu jirondi na guigulu nduku tumba gugejabi agunyi jiruyisini vo agunyi jiwendisini. Divu munongu mosi na mutu agumaburu na Yinyunyi yiNsambi.

⁹ Nicodeme amamuwivula rie: Dionyi tsie diubila?

¹⁰ Jesus amamugabusila rie: Ndeʼ guji mulonsi uIsrael na gugejabi mambu meni?

¹¹ Dingensa nyigutsinguli yiri tuivosi ama tuijabi na tuisingisili bumbeji mu ama tumalaba na dugesingi bumbeji buetu.

¹² Pa dugevayi yitu ava nyivosili mambu mabutamba nenu tsie duvayila yitu ava nyudutsingulila mambu majulu?

¹³ Mutu asakamata o julu yika Muana Mutu agumasunduyila o julu.

¹⁴ Nana Moise amanangulila nyoga o kumu munongu mosi Muana Mutu vengu omatusu

¹⁵ yiri uotsu agumuvayila yitu odila monyu umutubu.

¹⁶ Nsambi amaronda bisi bulongu puela la dibandu amaveyila Muana andi divingu yiri uotsu oyimuvayili yitu akebungana tumba abi na monyu umutubu.

¹⁷ Nsambi asamasindiga Muana andi o bulongu uyevega batu mbela tumba yiri batu bogobulu mu diina diandi.

¹⁸ Oyimuvayili yitu agovegu mbela tumba ogemuvayili yitu amavegu mbela kala mu mbari agaavayila diina diMuana divingu diNsambi yitu.

¹⁹ Mbela agunyi jiruyisini? Diwendi rie: Yijalala yinoruga o bulongu batu bamaronda pisama uviolila yijalala mu mbari bevayingi mabi.

²⁰ Mu mbari oyiduki mabi evini yijalala na agerondi umonutsu mu mbari bisalu biandi bibi bikejabunu.

²¹ Tumba oyiduki ngensa erondi yijalala, diwendi rie: ededili Nsambi na bisalu biandi biujabunu.

Jesus na Jean

²² Amana manovioga Jesus amawenda na badukitsi bandi o yiari yiJudee; jandi amatsananga nogu guna na amabatisanga.

²³ Jean wandi amabatisanga o Enon bebeli na Salim mu mbari aguna umaba mamba mapuela na batu bamawendanga uyebatusu nandi.

²⁴ (Jean mbe asakakotusu o tsugu.)

²⁵ Kabogu badukitsi baJean bamatsunda na muJuif mu diambu dimuyitsa ogu nana beliomusulu.

²⁶ Bamawenda ombu Jean na bamamutsingula rie: Mulonsi, jandi omaleba nagu o disimu diJourdain agu ndeʼ gumavosila bumbeji, laba ebatisi na botsu bewendi ombu gandi.

²⁷ Jean amagabusila rie: Mutu orungula udila yika ayimamuvegu na Nsambi.

²⁸ Jenu beni duji bambeji bami yiri nyimavosa rie: Menu ngaa Christ tumba nyimasindugu o gusu andi.

²⁹ Jandi odila mugetu la yiwela-mugetu tumba mbatsi yiwela-mugetu ojivu vana na oyimukelisi elabi nsangu jineni ava egululu diufi diyiwela-mugetu. Nsangu eni jivu ajiami wandi na jivu jidugu.

³⁰ Vengu diduma diandi diunyava na adiami diudiama.

Jandi oyiruyili o julu

³¹ Jandi oyiruyili o julu aji va julu biotsu; jandi ojivu muisi butamba aji agu butamba na jandi evosi nana muisi butamba. Jandi oyimyili o julu aji va julu biotsu;

³² na esingisili bumbeji mu ama jandi amalaba nogulu tumba ne mutu mosi agesingi bumbeji buandi.

³³ Jandi agumasinga bumbeji buandi ejabi yiri Nsambi evosi ngensa.

³⁴ Jandi agu Nsambi amasindiga evosi mambu maNsambi mu mbari Nsambi amamubasa de na Yinyunyi yiandi.

³⁵ Taji erondi Muana na amamuvega musuga uotsu.

³⁶ Jandi oyivayili Muana yitu ana monyu umutubu; jandi oyilensi Muana agodila monyu mu mbari Nsambi ana kabu nandi.