Jean 21 - La Sainte Bible en Langue Yipunu

Jesus ulabana elabini na yisambuali yibadukitsi

¹ Mbana Jesus amamuelabana na badukitsi o yiliba yiTiberiade. Guluanu nana dimabila.

² Simon Pierre na Thomas (ajimanengulungu divasa) na Nathanael (muisi Cana o Galilee) na baana baZebedee na babeji basusu bamaba va mosi.

³ Simon Pierre amabatsingula rie: Yika o uvuba nyiwendi. Bamavosa rie: Tuweʼ nagu. Kabogu bamawenda; botsu bamanangama o bota tumba mukolu eni basamadila banyama.

⁴ Wisi unotebuga Jesus amaba va disimu tumba badukitsi basamamujaba.

⁵ Jesus amabawivula rie: Dusakadila? Bamamugabusila rie: Nyiina.

⁶ Amabalonsa rie: Buaganu mbusa o yiari yimabaala mbana dudila. Kabogu banojibuaga basamamuerungula ujiduta mu mbari jimaba jibasa na banyama.

⁷ Mbana mudukitsi agu Jesus amarondanga amatsingula Pierre rie: Nyitasi aguna Fumu! Simon Pierre amasundila uduara yikutu yiandi na munsiyi andi (amaba penyi) mbana amakebuaga mu mamba.

⁸ Abamasiala bamaduga te no disimu na bamaduta mbusa ajimabasa na banyama. Basamaba vala na disimu, yika kama metera.

⁹ Banosabuga bamarasuna muji na banyama na mapa va julu tasi.

¹⁰ Jesus amabatsingula rie: Beganu banyama aba dubanodila.

¹¹ Simon Pierre amanangama o bota na amaduta mbusa ajimaba jibasa na kama na magumaranu na banyama barieru abaneni; ne nana mbusa jisamapasiga.

¹² Jesus amabanengila rie: Ruganu o uji. Ne umosi asamamuwivula rie: Ndeʼ la nyi? Mu mbari bamajaba yiri aji Fumu.

¹³ Jesus amabonga mapa na amabavega; amavaga munongu mosi na banyama.

¹⁴ Yiotsu ayi Jesus amarambuga o dufu adidi la dilabana adimurieru ombu badukitsi bandi.

Jesus na Pierre

¹⁵ Banomana uji Jesus amawivula Simon Pierre rie: Simon muana Jean ndeʼ guitondi uviolila jogu baba? Amamugabusila rie: Nyiina, Fumu guijabi yiri nyigurondi. Jesus amamutsingula rie: Bungula baana babindombu biami.

¹⁶ Mbana amamuemuwivula adimubeji rie: Simon muana Jean, guitondi? Pierre amamugabusila rie: Nyiina, Fumu guijabi yiri nyigurondi. Jesus amamuruma rie: Bungula bindombu biami.

¹⁷ Mbana amamuemuwivula adimurieru rie: Simon muana Jean, guitondi? Amamugabusila rie: Fumu, guijabi mambu motsu, guijabi yiri nyigurondi. Jesus amamuemuruma rie: Bungula bindombu biami.

¹⁸ Nyigutsinguli rie: Dingensa ava mbe gukivu mufudu ndeʼ beni gutsikeduisanga na gutsiwendanga amu gutsirondanga tumba ava gununina guwala miogu na mutu ususu oguduisa na ogubega agu ndeʼ gugerondi uwenda.

¹⁹ (Jesus amavosila nana ulonsa munongu mfuitsi aji Pierre ofuila na nana mfuitsi eni jiuroyisila diduma diNsambi.) Mbana amamuruma rie: Nduki!

Jesus na mudukitsi agu amarondanga

²⁰ Pierre anogeluga amalaba mudukitsi agu Jesus amarondanga, agumaba bebeli na Jesus ava bamalilanga na agumawivula Fumu rie: Anyi ogufunda?

²¹ Pierre anomulaba amawivula Jesus rie: Fumu agugu wandi tsie olabila?

²² Jesus amamuwivula rie: Pa nyirondi yiri agofu te na nyumueruga adina diambu diagu? Tumba ndeʼ nduki!

²³ Badukitsi banogulu nana bamavosa rie: Jandi agofu, via! Tumba Jesus asamatsingula Pierre rie: Agofu, tumba rie: Pa nyirondi yiri agofu te na nyumueruga adina diambu diagu?

²⁴ La mudukitsi eni oyisingisili bumbeji bumambu memama na omamasona. Jetu tuijabi yiri bumbeji buandi buvu bungensa.

Mambu amosita

²⁵ Jesus amamuevaga mambu masusu mapuela tumba tugaa na diweru.