Jean 20 - La Sainte Bible en Langue Yipunu( Matt 28.1-8 ; Marc 16.1-8 ; Luc 24.1-12 ) 1 Muna kedi yilumbu yitsona pisama mbe jikivu mu tsi Marie muisi Magdala amagabuga o ngila, amalaba yiri dimanyi dimagusulu va ngila. 2 Amawenda mbangu ombu Simon Pierre nombu mudukitsi ususu agu Jesus amarondanga. Amabatsingula rie: Bamagusula mfumbi o ngila na tugejabi agunyi batsijisunsa. 3 Pierre na mudukitsi ususu banopala o ndagu bamagabuga o ngila. 4 Jogu botsu babeji bamawenda mambangu va mosi tumba mudukitsi ususu amawenda mbangu uviolila Pierre na amamureyila o ngila. 5 Anobandama amalaba matsanda amamaba va tsi tumba asamakota. 6 Mbana Simon Pierre anotola amasundila ukota o ngila. Amalaba yika matsanda na matsanda amamaba va tsi. 7 Tsanda ajimapietu mu muru Jesus jisamaba va mosi na matsanda masusu. 8 Mudukitsi ususu agumareyila o ngila amakota na amalaba dingensa mfumbi jigatsi. 9 (Te na temu eni mbe basakatsiyisa Bisonu abimasonugu rie: Jesus orambuga o dufu.) 10 Mbana badukitsi botsu bamayenagabuga. Jesus ulabana elabini na Marie jimuisi Magdala ( Matt 28.9-10 ; Marc 16.9-11 ) 11 Marie amatsana va mugula ngila na amalilanga. Ava amalililanga amabandama ugengila o ngila. 12 Amalaba biansa bibeji abimaduara biduaru bivema bitsana va mbura ajimaba mfumbi; yimosi o yiari ayimaba muru na yisusu o yiari ayimaba makulu. 13 Biansa bimamuwivula rie: Mugetu dibandu yi guililili? Jandi amabigabusila rie: Mu mbari batsigusula Fumu ami na ngejabi ava batsimusunsila. 14 Ava amavosilanga nana amageluga na amalaba Jesus tumba asamamujaba. 15 Jesus amamuwivula rie: Mugetu dibandu yi guililili? Anyi guirombi? Jandi amamufuiyisa na muvaritsi nungi la dibandu amavosa rie: Pa ndeʼ gutsimugusula, ndonsi ava gutsimusunsila, nyirondi umukelisa. 16 Jesus amamunengila rie: Marie! Jandi amageluga na amamunengila mu Hebreu rie: Rabbouni! (Divindugulu rie: Mulonsi!) 17 Jesus amavosa nandi rie: Guyandama mu mbari nyisakamata ombu Tata. Tumba wenda ombu baana bataji bami nobatsingula rie: Nyiwendi ombu Tata ami nombu Tata enu, ombu Nsambi ami nombu Nsambi enu. 18 Kabogu Marie muisi Magdala amawenda ombu badukitsi na amavosa rie: Nyimalaba Fumu mbana amabatsingula motsu amamalabana. Jesus ulabana elabini ombu badukitsi bandi ( Matt 28.16-20 ; Marc 16.14-18 ; Luc 24.36-49 ) 19 Mukolu tsona badukitsi bamaba va mosi o ndagu jibindama mu mbari bamalaba baJuif goma. Jesus amasundila ukota na amavosa rie: Sunsanu mirima. 20 Ava amavosila badukitsi bamalabila Fumu, bamalaba nsangu jineni. 21 Jesus amamuebatsingula rie: Sunsanu mirima. Nana Taji amansindiyila, menu wami nyidusindiyi. 22 Anomana uvosa mambu meni amabagabila miula; amabatsingula rie: Dilanu Yinyunyi yiNsambi. 23 Batu aba dutanda botandu na aba dugotanda bagotandu. Jesus na Thomas 24 Mudukitsi umosi Thomas (ajinengulungu divasa) asamaba ava Jesus amalabinina nogu. 25 Kabogu bamamutsingula rie: Tutsilaba Fumu. Tumba Thomas amawaka rie: Pa nyimalaba mivedi mibatsongu mu makaka mandi nomibemba na mulembu ami nokotisa dikaka diami ava dubansi duandi mbana nyusinga yiri dumamulaba. 26 T sona mosi jimavioga na badukitsi baJesus bamamueba o ndagu na Thomas amaba nogu. Ndagu jimaba jibindama tumba Jesus amasundila ukota na amavosa rie: Sunsanu mirima! 27 Mbana amanengila Thomas rie: Ruga yibembisa mulembu agu va mivedi miami! Gengila makaka mami! Kotisa dikaka va dubansi duami. Guyamuetumuna pagu, payili yitu. 28 Thomas amamugabusila rie: Fumu ami na Nsambi ami! 29 Jesus amamuwivula rie: Gumapayila yitu mu mbari gumandaba? Ka muna ubueji gu ombu jogu abepayili yitu ne basakandaba! Dibandu dimuganda egugu 30 Jesus amamuelasa badukitsi bandi bimaga bisusu abisamasonu mu dibuku diedidi. 31 Mambu memama mamasonu udulasa yiri Jesus aji Christ na aji Muana Nsambi; pa duimuvayili yitu dudila monyu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon