Jean 2 - La Sainte Bible en Langue Yipunu

Diwela o Cana

¹ Bilumbu bibeji binovioga bamavaga mulambu o Cana o yiari yiGalilee. Nguji Jesus amaba vana

² na Jesus na badukitsi bandi bamanengulu o mulambu wandi.

³ Malamu manosuka, nguji Jesus amamutsingula rie: Besaa na malamu.

⁴ Jesus amamuwivula rie: Mugetu diambu yi divu va gari jetu nagu? Diweru diami disakatola.

⁵ Nguji andi amatsingula basalitsi rie: Duvaga adi odutsingula.

⁶ Avana vamaba bisanga bisiamunu abi baJuif bamasalisa udugusu migaga miogu. Yisanga yisanga yimaba na magumidunana vo kama na magumabeji mambuta.

⁷ Jesus amabatsingula rie: Basanu bisanga mamba. Bamabibasa levilevi.

⁸ Mbana Jesus amabaruma rie: Mateyianu na mabeyianu ombu fumu mulambu. Bamadivaga.

⁹ Ava fumu mulambu amanuina mamba amamakaluga malamu asamajaba agunyi malamu meni mamarugasana (tumba basalitsi abamayetega mamba bamajaba). Amanengila yiwela-mugetu,

¹⁰ amamutsingula rie: Mutu uotsu olegaba malamu maboti mbana pa abamanengulu bamanu puela obagabila amagaa maboti. Tumba ndeʼ gutsisueganga malamu maboti te na diweru diedidi!

¹¹ Anana Jesus amavayila yimaga yitega o Cana o yiari yiGalilee. Amalasa bundumba buandi na badukitsi bandi bamamuvayila yitu.

¹² Adina dinovioga Jesus amagabuga o Capernaum. Nguji andi na baana banguji bandi na badukitsi bandi bamayetsana yika mua bilumbu guna.

Jesus ukota ekoti o Ndagu Nsambi

¹³ Diweru difeta aji baJuif benengili Paque dimatola na Jesus amawenda o Jerusalem.

¹⁴ Amakota o Ndagu Nsambi na amarasuna basumbisitsi babangombi na babindombu na bamabembi na basansitsi bambongu batsana va batavula bogu.

¹⁵ Anovaga mukasa uminsiyi amababinga jogu botsu o Ndagu Nsambi na bindombu na bangombi wandi. Amapansa mbongu tsibasansitsi na amagudiga batavula.

¹⁶ Mbana amatsingula basumbisitsi bamabembi rie: Magusulianu vava, duyavaga Ndagu Taji ami ndagu muteti!

¹⁷ Badukitsi bandi bamarangimina yiri dimasonugu rie: Aa, Nsambi duyitsu duNdagu agu duvu nderi muji o gari murima ami.

¹⁸ BaJuif bamamuwivula rie: Tulasi yilimba ayiutujabisa yiri guna musuga uvaga nana guivayili.

¹⁹ Jesus amabagabusila rie: Pansanu Ndagu ejiji na yiotsu ayi bilumbu birieru biusukila nyumuejirunga.

²⁰ BaJuif bamavosa rie: Jetu tumamana magumana na bilima bisiamunu urunga Ndagu ejiji na ndeʼ gumuejirunga mu bilumbu birieru buandi?

²¹ Tumba Ndagu Nsambi aji Jesus amavosila jimaba jidunyuru duandi.

²² La dibandu ava amarambuyila o dufu badukitsi bandi bamarangimina yiri amadivosa na bamavayila Bisonu na mambu maJesus yitu.

²³ Ava Jesus amabila o Jerusalem o feta Paque batu banolaba bimaga bipuela abi amavaga bamamuvayila yitu.

²⁴ Ne nana Jesus asamabasunsila murima mu mbari amajabanga botsu.

²⁵ Asamaba na nsala yiri bomutubulila bifu bibatu mu mbari jaʼ beni amajabanga mirima miogu.