Jean 19 - La Sainte Bible en Langue Yipunu

¹ Mbana Pilate amaruma rie: Beganu Jesus na mudimbianu.

² Bagora bamavasa dugaba dumatsiendi, bamamuduisa duonyi na bamamuduisa yijungi yibenga wandi.

³ Mbana bamabambana nandi na bamamudesanga rie: Labatianu kaga jibaJuif! Bamamudimbanga mambata.

⁴ Pilate amamuepala na amatsingula baJuif rie: Labanu nyimupalisi o gusu kana yiri dujaba rie: Ngelabi yiri ana diambu diwelimina na mbela dufu.

⁵ Kabogu Jesus amapala aduara dugaba dumatsiendi na yijungi yibenga. Pilate amavosa nogu rie: Mutu enu, jandi guna.

⁶ Ava bivunda bibavagulitsi bapagu na bagora bamamulabiia bamagamuga rie: Mugomini va kurusu! Mugomini va kurusu! Pilate amabagabusila rie: Mubongianu jenu beni na pa duirondi mugominianu va kurusu mu mbari ngelabi yiri ana diambu diwelimina na mbela dufu.

⁷ BaJuif bamamutsingula rie: Jetu tuna mugaga aguivosi yiri afu mu mbari evosi yiri aji Muana Nsambi.

⁸ Ava Pilate amagululu diambu dieni amagaangu na goma jineni.

⁹ Amakota o mulebi na amawivula Jesus rie: Ndeju muisi yiari yi? Tumba Jesus amabusa uwagula.

¹⁰ Pilate amamuwivula rie: Je ndeʼ gugerondi uvosa nami? Gugejabi yiri nyina musuga ugugomina va kurusu? Gugejabi yiri nyina musuga wandi ugupalisa?

¹¹ Jesus amagabusila rie: Ndeʼ gugaa na musuga ombu gami pa usamaguvegu na Nsambi. La dibandu jandi oyikwakisi ombu gagu ana mbela jiviolila jiagu.

¹² Pilate anogulu nana amaronda umupalisa tumba baJuif bamawaka rie: Pa gumupalisa, kabogu gugaa mbatsi kaga! Uotsu oyivosi yiri aji kaga aji muvinitsi ukaga.

¹³ Pilate anogulu mambu meni amabega Jesus va gusu kana va mbura aji betabulili bunsonsi ajimanengulungu rie: dulombili dudalage ajimanengulungu mu Hebreu rie: Gabbatha.

¹⁴ Motsu mana mamaba diweru dimuangulu yilumbu ayi betsonsiyili Paque. Pilate amavosa na baJuif rie: Labanu kaga enu.

¹⁵ Tumbajogu bamawakarie: Afu! Afu! Mugomini va kurusu! Pilate amabawivula rie: Nyugomina kaga enu va kurusu? Bivunda bibavagulitsi bapagu bamavosa rie: Tugaa na kaga jisusu!

¹⁶ Kabogu Pilate amawakisa Jesus ombu gogu yiri bomugomina va kurusu. Kabogu bamagaanga Jesus.

Jesus amagomunu va kurusu

¹⁷ Jesus amapala na amayenakebeyilanga kurusu andi te na amatola va mbura dubengili, (ajinengulungu mu Hebreu rie: Golgotha).

¹⁸ Avana bagora bamagominina Jesus va kurusu na basusu babeji umosi yiari na ususu yiari, Jesus va gari.

¹⁹ Pilate amarenda mirendu amimagomunu va kurusu. Amarenda rie: Jesus muisi Nazareth Kaga jibaJuif.

²⁰ BaJuif bapuela bamaranga mirendu mieni mu mbari mbura aji Jesus amaba jimaba bebeli na musiengi: mimarendu mu Hebreu na mu Grec na mu Latin.

²¹ Bivunda bibavagulitsi bapagu bamatsingula Pilate rie: Guyarenda rie: Kaga jibaJuif. Renda yiri amavosa rie: Menu nyiji kaga jibaJuif.

²² Pilate amagabusila rie: Ama nsirenda nyimakerendila.

²³ Bagora banomana ugomina Jesus va kurusu bamabonga biduaru biandi na bamabigabana makabu mana; mutu mutu dikabu diandi. Bamabonga yilinga yiandi wandi ayimaba tsanda mosi buandi.

²⁴ Bamavosasana rie: Tuyayipasanu tumba tubuayianu mbanda; dionyi dimalabana udugusu Bisonu abimasonugu rie: Bamagabana biduaru biami na bamabuayila yilinga yiami mbanda. Anana bagora bamavayila.

²⁵ Banguji baJesus na Marie mugatsi Clopas na Marie muisi Magdala bamaba vana.

²⁶ Jesus anolaba nguji andi na mudukitsi agu amarondanga amavosa na nguji andi rie: Mugetu laba muana agu.

²⁷ Amabuesa ombu mudukitsi rie: Laba nguji agu! Ubanda mu temu eni mudukitsi amamubonga.

Dufu duJesus

²⁸ Amana manovioga Jesus amajaba yiri motsu mamadugusu kala. Kabogu udugusu Bisonu amavosa rie: Nyigulu puila.

²⁹ Avana vamaba yisanga yibasa na dive dinganyi. Bagora bamaputiga mutsabu muna na bamamuvakiga mu dingasa umunuisa.

³⁰ Jesus anomana unu amavosa rie: Motsu mamadugusu. Anobandama amatabuga.

Gora unonga enongi Jesus dikongu va dubansi

³¹ BaJuif bamaronda ugusula mamfumbi va bakurusu la dibandu bamawivulila Pilate musuga uteba makulu mogu. Bamaronda udivaga mu mbari yilumbu yieni yimaba vendredi na basamaronda yiri mamfumbi moba va bakurusu yilumbu yisamedi mu mbari samedi eni jimaba jiPaque.

³² Kabogu bagora bamateba bivisi bimakulu mamutu agutega mbana ususu agumagomunu na Jesus.

³³ Banotola ombu Jesus bamalaba amakefuila kabogu basamamuteba makulu.

³⁴ Tumba gora mosi amamunonga dikongu va dubansi; vana vana malungu na mamba bimapala.

³⁵ Oyisoni mambu amama amaba vana, bumbeji buandi buvu bungensa, kabogu durungula ubuvayila yitu.

³⁶ Mambu meni mamalabana udugusu Bisonu abimasonugu rie: Vagotabuga ne yivisi yimosi mu dunyuru duandi.

³⁷ Na rie: Bogengila dunyuru adumatobu.

Jesus utsigu etsigu

³⁸ Amana manovioga Joseph muisi Arimathee amawivula Pilate musuga ubonga mfumbi Jesus (Joseph amaba mudukitsi uJesus o musuega mu mbari amalaba baJuif goma). Pilate amasinga kabogu Joseph amayebonga mfumbi Jesus.

³⁹ Nicodeme omalewenda mukolu ombu Jesus amabega bebeli na magumarieru makilu tsimuyombu, diwendi rie: mira na alowe.

⁴⁰ Kabogu bamapieta mfumbi na matsanda mbana bamajigotsamuyombu nana yifu yibaJuif yimabila.

⁴¹ Mu nungi aji Jesus amagomununu mumaba ngila jigona aji mbe jisakatsigulu mfumbi.

⁴² Ngila eni jimaba bebeli; diweru didutsonsugu du? baJuif dimatola kabogu bamatsiyila Jesus muna.