Jean 18 - La Sainte Bible en Langue Yipunu

Jesus amasikugu

¹ Jesus anomana uvosa mambu meni, jogu na badukitsi bandi bamasabuga o disimu dina diCedron. Va mbura eni vamaba nungi, Jesus na badukitsi bandi bamawendanga guna.

² Judas, omamufunda amajaba mbura eni mu mbari Jesus na badukitsi bandi bamabegunanga guna.

³ Kabogu Judas na bagora abamasindugu na bivunda bibvagulitsi bapagu na baJuif abamaba baPharisie bamawenda guna na bitogulu na balambi na bitutu.

⁴ Jesus amajaba motsu amoruga ombu gandi kabogu amakueka nobawivula rie: Anyi duirombi?

⁵ Bamamugabusila rie: Jesus muisi Nazareth. Jesus amawagula rie: Meʼ janduʼ gu. Judas omamufunda amaba nogu.

⁶ Ava Jesus amabawagulila rie: Meʼ janduʼ gujogu bamagabuga mansinsima na bamaberuga.

⁷ Jesus amamuebawivula rie: Anyi duirombi? Bamavosa rie: Jesus muisi Nazareth.

⁸ Jesus amabawagula rie: Tsia nsiledutsingula rie: Meʼ janduʼ gu. Kabogu pa duitombi dundanu abavu nami; bawendingi.

⁹ Amavosa nana yiri diambu adi amavosa diudugusu rie: Va gari aba gumapega Tata, ngaatsiemusa ne umosi.

¹⁰ Simon Pierre agumaba na dijenga, amadisomuna na amatabula musalitsi uyivunda yibavagulitsi bapagu dituji adimabaala. (Musalitsi eni diina diandi: Malchus.)

¹¹ Jesus amatsingula Pierre rie: Gabusa dijenga diagu mu yisupu. Ngonu kopa jimaguga aji Tata amapega?

Jesus va gusu Anne

¹² Bagora na jogu abamaba nogu bamagaanga Jesus na bamamutunga mikudu.

¹³ Bamalemubega ombu Anne mu mbari amaba boji buCaiphe yivunda yibavagulitsi bapagu yilima yieni.

¹⁴ Caiphe eni agumavosa ombu baJuif rie: Diviolila ubueji pa mutu mosi ofuila batu botsii.

Pierre ugala egali Jesus

¹⁵ Simon Pierre na mudukitsi ususu bamaduka Jesus. Mudukitsi eni amaba ajabunu na yivunda yibavagulitsi bapagu la dibandu amakotila na Jesus o gari yivaga o ndagu yivunda yibavagulitsi bapagu;

¹⁶ tumba Pierre amasiala o gusu kana bebeli na munu ndagu. Mudukitsi eni ususu ujabunu na yivunda yibavagulitsi bapagu amapala na amavosa ombu mukelisi umunu ndagu mbana amakotisa Pierre.

¹⁷ Mbana mugetu agumakelisanga munu ndagu amawivula Pierre rie: Ndeʼ wagu gugaa mudukitsi andi? Jandi amawagula rie: Ngaa muna.

¹⁸ Basalitsi na bagora bamabangisa muji agu bamagoranga mu diambu diyiotsi. Pierre amatsana nogu vana.

Yivunda yibavagulitsi bapagu uwivula ewivuli Jesus bivu

¹⁹ Yivunda yibavagulitsi bapagu amawivula Jesus bivu mu diambu dibadukitsi bandi na mu diambu dimalongi mandi.

²⁰ Jesus amamugabusila rie: Temu na temu nsilonsanga o Mandagu maYibenguna nesi o Ndagu Nsambi aji baJuif botsu bebenguniningi na ngaasueganga diambu.

²¹ Dibandu yi guikwivulili bivu? Wivula jogu abamakulu ava nsilonsilanga. Jogu bagejabi adi nsilonsa?

²² La dibandu gora ajimaba vana amadimbila Jesus mbata nomuwivula rie: Anana guiwagulili yivunda yibavagulitsi bapagu?

²³ Jesus amamutsingula rie: Pa nsivosa dibi, ditubuli tumba pa nyina ndunga dibandu yi guindimbili?

²⁴ Anne amamusindiga atungu ombu Caiphe yivunda yibavagulitsi bapagu.

Pierre ugala emuegala Jesus

²⁵ Yiotsu yina Simon Pierre amagoranga muji. Bamamuwivula rie: Ndeʼ wagu tsia mudukitsi andi? Tumba amagala rie: Ngaa muna.

²⁶ Musalitsi uyivunda yibavagulitsi bapagu la yiburu yimutu agu Pierre amatabula dituji amamuwivula rie: Ngaalegulaba nandi o nungi?

²⁷ Pierre amamuemugala. Vana vana koku jimavosa.

Jesus va gusu Pilate

²⁸ Kedi jineni bamasila Caiphe na bamawenda na Jesus o mulebi. Joʼ beni basamaronda ukota mu mbari bakenamu muinsi na bakekonda uji feta Paque.

²⁹ Kabogu Pilate amapala na amabawivula rie: Diambu yi duifiindisili mutu egugu?

³⁰ Bamamugabusila rie: Mbe agaa mutu mubi mbe tutsimufunda ombu gagu?

³¹ Pilate amavosa rie: Mubongianu jenu beni, mutabulilianu bunsonsi nana divu diwelimina na migaga mienu. BaJuif bamamugabusila rie: Tugaa na musuga uvega mutu mbela dufu.

³² Vana vana mbigulu jiJesus jimadugusu mu diambu dimfuitsi andi.

³³ Pilate amamuekota o mulebi, amanengila Jesus nomuwivula rie: Ndeju la kaga baJuif?

³⁴ Jesus amamuwivula rie: Basusu batsigutsingula mambu mami vo ndeʼ beni guikwivuli?

³⁵ Pilate amamuwivula rie: Menu Juif nyivu? Batu bagu na bivunda bibavagulitsi bapagu batsigufunda ombu gami. Yi gumavaga?

³⁶ Jesus amagabusilarie: Durumuduami dugaa dubulongu buebubu. Mbe duvu dubulongu mbe basalitsi bami batsitoyila yiri ngowakusu ombu baJuif. Ngensa durumu duami dugaa dubulongu buebubu.

³⁷ Pilate amamuwivula rie: Kabogu guji kaga? Jesus amamugabusila rie: Gumadivosa, nyiji kaga. La dibandu nyimaburulu na nyimaruyila o bulongu buebubu uyisingisila bumbeji bungensa. Uotsu agumavayila ngensa yitu, endedili.

³⁸ Pilate amamuwivula rie: Ngensa la yi? Banomana uvosa nana Pilate amamuepala uvosa na baJuif. Amabatsingula rie: Agaa na diambu.

Jesus amavegu mbela dufu

³⁹ Tumba feta Paque tsiotsu nyidupalisilingi mutu mosi. Duirondi yiri nyudupalisila kaga baJuif?

⁴⁰ Mbana botsu bamamuegamuganga rie: Nesi, tsiri jandi. Tuirondi Barabbas. Kabogu Barabbas amaba yikongu.