Jean 15 - La Sainte Bible en Langue Yipunu

Jesus la yibibili yimuiri aguiburi mirayisan

¹ Menu la yibibili yimuiri aguiburi mirayisan na Tata ami la muvaritsi.

² Yitayi yiotsu ayivu yika bimfiamfili eyitabuli na yitayi yiotsu ayivu na magaji eyibali yiri yiubura buranga.

³ Malongi ama nyimadulonsa mamaduliomisa mirima kala.

⁴ Fubana mirima nami na nyufubana murima nenu. Yitayi yigorungula ubura milunda pa yigaa yinama mu yibibili yimuiri; munongu mosi jenu dugorungula ufunanga pa dusakafubana murima nami.

⁵ Menu la yibibili yimuiri, jenu la bitayi. Jandi omafubana murima nami orungula uAinanga mu mbari nyimafubana muiima nandi.

⁶ Nana bebuayili bitayi bigumuga o muji munongu mosi pa mutu asakafubana murima nami obuagu o muji.

⁷ Pa dumafubana mirima nami na pa mambu mami megulunu nenu wivulanu adi duvu na nsala na dionyi diuduvagulu.

⁸ Taji ami ododusu pa jenu dufunanga nobanganga badukitsi bami.

⁹ Nana Tata amatondila menu wami nyimaduronda. Jabanu durondu duami.

¹⁰ Pa jenu duikelisingi maruma mami, dujaba durondu duami; munongu mosi nyinokelisa maruma maTata ami nyimajaba durondu duandi.

¹¹ Nyimadutsingula mambu meni yiri dulaba nsangu nana nyijilabili na nsangu enu jiuba jineni.

¹² Maruma mami amama rie: Rondasananu nana nyimadurondila.

¹³ Durondu aduvu tindi durondu dulasu ava mutu oveyila monyu andi mu diambu dibambatsi bandi.

¹⁴ Jenu duji bambatsi bami pa duikelisi maruma mami.

¹⁵ Ngemuedunengila basalitsi mu mbari musalitsi agejabi adi fumu andi evayi tumba nyidunengili bambatsi mu mbari nyimadujabisa motsu ama nyimagulu ombu Tata ami.

¹⁶ Tsiri jenu adumansola tumba menu nyimadusola. Nyimadusindiga ufunanga. Diwendi rie: Ama duwivula Tata mu diina diami oduvega.

¹⁷ Kabogu nyidurumi rie: Rondasananu.

Bisi bulongu bamavina Jesus na batu bandi

¹⁸ Pa bisi bulongu beduvini, jabanu yiri bamalepina.

¹⁹ Mbe duji bisi bulongu mbe dumarondu nogu tumba nyimadusola la dibandu beduvinini.

²⁰ Rangiminanu diambu adi nyimadutsingula rie: Musalitsi agevioyi fumu andi buneni. Pa bamakuana kabogu bodukuananga wandi; mbe bamakulungu mbe bodugulungu wandi.

²¹ Tumba bodulasa uvura mu motsu mu diambu didiina diami mu mbari bagejabi omansindiga.

²² Mbe nyisamaruga uyibalonsa mbe bagaa na mbela tumba nyimaruga kabogu besaa na ndunga.

²³ Jandi oyipini evini Taji ami wandi.

²⁴ Mbe nyisamabalasa bisahi abisakasalu na batu basusu mbe bagaa na mbela tumba banondaba na bisalu biami bamatuvina, jetu na Tata.

²⁵ Tumba dionyi dimalabana yiri mbembu ajimasonugu mu mugaga ogu jiudugusu rie: Bamapina na nyisamabavaga diambu, diwendi rie: divina diogu disamaba na dibandu.

²⁶ Muwamusi oruga, jandi la Yinyunyi Yingensa agunigasana ombu Tata. Nyumusindiga mu diina diTata na jandi oposila amami.

²⁷ Onsingisila bumbeji na jenu wenu dubusingisila mu mbari duji nami ubanda va dibandu.