Jean 14 - La Sainte Bible en Langue Yipunu

Jesus la nsila utolila ombu Tata

¹ Jesus amavosa rie: Duyalaba keri. Vayilanu Nsambi yitu na payilianu yitu wandi.

² O ndagu Tata ami uvu bibuku bipuela. Mbe ugaa nana mbe nsidutsingula. Nyiwendi udutsonsiyila mbura.

³ Nyuwenda udutsonsiyila mbura kabogu pa nyimamana udutsonsiyila mbura nyumuegabuga uyidulanda yiri tuyetsana va mosi.

⁴ Jenu duijabi o nyiwendi na nsila duijabi.

⁵ Thomas amavosa nandi rie: Fumu, tugejabi o guiwendi yika tsie tujabila nsila?

⁶ Jesus amamugabusila rie: Menu nyivu nsila na nyivu ngensa na monyu. Ne mutu akawenda ombu Tata vengu oleruga ombu gami.

⁷ Pa duinjabi dujaba Tata ami wandi. Ubanda namunyi dumamujaba na dumamulaba wandi.

⁸ Philippe amavosa rie: Fumu, tulasi Tata na tugoguwivula disusu.

⁹ Jesus amamuwivula rie: Ngensa gusakanjaba Philippe? Menu agumatsinga nenu? Jandi agumandaba amalaba Tata; tsie guivosili rie: Tulasi Tata?

¹⁰ Gugejabi yiri nyimafubana murima na Tata na Tata amafubana murima nami? Mambu ama nyidutsinguli mageruyili ombu gami. Tata agumafubana murima nami edugusu bisalu bijaʼ beni.

¹¹ Singanu yiri nyimafubana murima na Tata na Tata amafubana murima nami ne pa dugedisingi rangiminanu bisalu biandi.

¹² Nyidutsinguli rie: Dingensa jandi ogupayila yitu jandi wandi osala bisalu abi nyisali na osala ne abiviolila uroga mu mbari nyiwendi ombu Tata.

¹³ Kabogu nyuvaga diotsu adi dukwivula mu diina diami yiri Tata ododusu.

¹⁴ Pa dukwivula diambu mu diina diami, nyudivaga.

Jesus uvangana evangini usindiga Yinyunyi yiNsambi

¹⁵ Pa duitondi, kelisanu maruma mami.

¹⁶ Menu nyuwivula Tata uduvega mutu ususu uduwamusanga, jandi la Yinyunyi Yingensa agutsana nenu mutubu.

¹⁷ Bisi bulongu bagorungula umudila mu mbari bagemulabi na bagemujabi tumba jenu duimujabi mu mbari amafubana murima nenu, diwendi rie: etsani nenu.

¹⁸ Ngodusila pinsa, nyuruga ombu genu.

¹⁹ Namapapa bisi bulongu bagomuendaba tumba jenu dundabanga. Nyiji monyu kabogu jenu wenu dubanga monyu.

²⁰ Ava yilumbu yieni jenu dujaba yiri nyimafubana murima na Tata na nyimafubana murima nenu.

²¹ Jandi oyigulu mambu mami na emakelisi etondi. Taji ami emurondi mu mbari etondi; menu wami nyumuronda na nyukelasa ombu gandi.

²² Jude (tsiri Iscariote) amamuwivula rie: Fumu tsie diubila yiri ndeʼ gukelasa ombu getu na tsiri ombu bisi bulongu?

²³ Jesus amamugabusila rie: Jandi oyitondi ededili malongi mami na Tata ami omuronda. Jetu na Tata tuwenda ombu gandi na tutsana nandi.

²⁴ Jandi ogetondi agededili malongi mami. Ama duigulu nyivosi meruyili ombu Tata omansindiga tsiri ombu gami.

²⁵ Nyimaledutsingula monyi ava nyikivu nenu.

²⁶ Muwamusi oruga, jandi la Yinyunyi yiNsambi, diwendi rie: Tata omusindiga mu diina diami. Jandi odulonsanga mambu motsu na odurangimisanga motsu ama nyimadutsingulanga.

²⁷ Nyiduganini, sunsanu mirima. Ngeduganini nana bisi bulongu beganinini. Duyalaba keri vo goma.

²⁸ Dutsigulu adi nsivosa rie: Nyimawenda tumba nyumuegabuga. Pa duitondi dulaba ubueji ava nyuwendila ombu Tata; mu mbari Tata epiolili buneni.

²⁹ Namunyi nyimaledutsingula mambu meni ne makalabana yiri ava molabinina jenu dumavayila yitu.

³⁰ Ngomuevosa puela nenu mu mbari kaga bulongu buebubu uruga eruyi. Agaa na musuga ombu gami

³¹ tumba bisi bulongu bajabi yiri nyirondi Tata la dibandu nyivayi motsu ama Tata etumi. Relamanu tʼwendianu.