Jean 12 - La Sainte Bible en Langue Yipunu

Marie amagotsa makulu maJesus muyombu

¹ Bilumbu bisiamunu ne Paque jikatola Jesus amawenda o Bethanie o dimbu diLazare agu amarambusa o dufu amatsaninanga.

² Banomulambila biguji bitsisiga Marthe amabakelisa ava bamatsanina va tavula. Lazare amaba umosi va gari jogu abamatsana va tavula na Jesus.

³ Marie amabonga yirura yimuyombu udufunu duneni na amagotsa makulu maJesus mbana amamufienyi makulu na nanga tsiandi; ndagu jiotsu jimabasa na mbunga muyombu.

⁴ Mudukitsi umosi uJesus, Judas Iscariote, jandi agumafunda Jesus amawivula rie:

⁵ Mu mbari yi tugaasumbisila muyombu eni? Mbe tumafuta musalitsi ne digumi ditsungi.

⁶ Jandi amaba mudayitsi la dibandu amavosila nana tsiri mu mbari amarondanga bijaga. Ava amakelisilanga yisuegulu yimbongu amatsidaganga.

⁷ Jesus amavosarie: Mudundi, ayimavagu na muyombu yivu yiwelimina na dufu duami.

⁸ Bijaga bigowenda mbura tumba menu yika uweʼ nyiwendi.

Fundu ajimatungulu Lazare

⁹ BaJuif bapuela bamagulu yiri Jesus amaba o Bethanie kabogu bamawenda tsiri ulaba Jesus buandi tumba bamaronda ulaba Lazare agu Jesus amarambusa o dufu.

¹⁰ Bivunda bibavagulitsi bapagu bamaronda ubokisa Lazare wandi.

¹¹ Mu diambu diLazare baJuif bapuela bamakakana nogu na bamavayila Jesus yitu.

Jesus uwenda ewendi o Jerusalem

¹² Ava kedi batu bamaruga o feta Paque na bamagulu yiri Jesus amawenda o Jerusalem.

¹³ Bamabonga metu na bamarela o gusu noyenagamuganga rie: Diboti ombu Nsambi! Miula mibi ombu jandi oyiruyi mu diina diFumu! Miula ombu Kaga Israel!

¹⁴ Jesus amarasuna muana buru na amatsana va julu uonyi nana Bisonu bimasonugulu rie:

¹⁵ Sion, guyalaba keri; laba Kaga agu eruyi atsana va julu buru.

¹⁶ Badukitsi bandi basamaletsiyisa mambu meni tumba ava Jesus amamatusulu bamarangimina motsu amamasonu na amamalabana.

¹⁷ Botsu abamaba na Jesus o ngila Lazare bamagulu nana amamunengilila na bamalaba nana amamurambusila kabogu bamatubula ama bamalaba.

¹⁸ Abamabagulu bamaruga umulaba mu diambu diyimaga yieni.

¹⁹ Kabogu baJuif abamaba baPharisie bamavosasana rie: Labatianu tugelungi. Botsu bemuduki!

BaGrec bamosi bamaromba Jesus

²⁰ BaGrec bamosi bamawenda o Jerusalem wandi uyesambila.

²¹ Bamarasuna Philippe (muisi Bethsaida o yiari yiGalilee) na bamavosa nandi rie: Kokolu, tuirondi ulaba Jesus.

²² Philippe amawenda uyetsingula Andre; mbana Andre na Philippe bamaditsingula Jesus.

²³ Jesus amabagabusila rie: Diweru dimatola adi Muana Mutu vengu omatusulu.

²⁴ Nyidutsinguli rie: Dingensa tsangu jigofuna pa jigovaru, diwendi rie: jiulefu mbana jinofu jiburingi puela.

²⁵ Jandi oyirondi monyu andi ogutsiemusa na jandi oyivini monyu andi ogudila mutubu.

²⁶ Pa mutu erondi unsalila anduki; avana nyivu avana voba musalitsi ami wandi. Tata ami elabi ubueji na mutu oyinsalili.

Jesus ulonsa ebalonsi nana ofuila

²⁷ Namunyi nyilabi keri. Diambu yi nyuvosa? Tata kaguli mu diweru diedidi? Nesi, mu dionyi nyimaruyila.

²⁸ Tata dodisa diina diagu! Vana vana diufi dijulu dimavosa rie: Nyimadidodisa na nyumuedidodisanga.

²⁹ Batu abamaba vana bamadigulu na bamawivula rie: Ayina yidumi? Basusu bamawagula rie: Nesi, yiansa yitsivosa nandi.

³⁰ Jesus amavosa rie: Diufi dieni ditsigulunu mu diambu dienu tsiri mu diambu diami.

³¹ Temu jibunsonsi jimatola, kaga bulongu buebubu obetsu.

³² Menu ava nyugusululu va butamba nyuduta batu botsu ombu gami.

³³ (Ava amavosila nana jandi amalonsa munongu mfuitsi aji ofuila.)

³⁴ Batu botsu bamamuwivula rie: Migaga mivosi yiri Christ otsananga mutubu; kabogu tsie guivosili rie: Vengu Muana Mutu omatusu? Muana Mutu eni anyi?

³⁵ Jesus amabatsingula rie: Yijalala yikivu nenu mua pesu temu. Volanu muendu ava dukivu na yijalala yiri pisama jigodurasuna; jandi oyilingi o tsi pisama agejabi agu ewendi.

³⁶ Ava jenu dukivu na yijalala, yivayilianu yitu yiri dubanganga na yijalala. Jesus anovosa mambu meni amayesuema vala nogu.

Mirima migala mibaJuif

³⁷ Diuleba amavaga bimaga bipuela va misu mogu basamamuvayila yitu.

³⁸ Mambu ama Esaie amavosa mamadugusu rie: Fumu, anyi amavayila malongi metu yitu? Anyi amalasu mangolu maFumu?

³⁹ Bagovaga yitu nana Esaie amabiyila rie:

⁴⁰ Nsambi amadibiga misu mogu; na amagalisa mirima miogu mu mbari bakelaba na misu na baketsiyisa; bamabusa ukalula diela yiri nyubabelusa.

⁴¹ Esaie amavosa mambu meni ava amalabila bundumba buJesus na amamavosila mu diambu diandi.

⁴² Tumba nesi va gari bivunda bibaJuif, bapuela bamamuvayila yitu tumba mu diambu digoma jibaJuif abamaba baPharisie basamadivosa yiri bakepalusu mu muyitsa.

⁴³ Bamarondanga ulasa batu ubueji tsiri Nsambi.

Bunsonsi na mambu maJesus

⁴⁴ Jesus amagamuga rie: Jandi oyipayili yitu evayili omansindiga yitu wandi;

⁴⁵ na jandi oyindabi elabi jandi omansindiga.

⁴⁶ Nyimaruga o bulongu nana yijalala yiri jandi oyipayili yitu akefu o tsi pisama jimasumu.

⁴⁷ Pa mutu egulu mambu mami na agemakelisi tsiri menu oyimuveyi mbela mu mbari nyisamaruga uvega batu mbela, nyimaruga ubagobula.

⁴⁸ Jandi oyimbuayi na ebusi mambu mami ana mbela; mambu ama nyimalonsa amana momuvega mbela mu yilumbu yinsimunina.

⁴⁹ Mu mbari nyisamavosa amami tumba ama Taji omansindiga, jaʼ beni amansingula ama vengu nyulonsa.

⁵⁰ Nyijabi yiri diruma diandi diveyi monyu umutubu. Kabogu mambu ama nyivosi, nyimavosi nana Tata etumini.