Jean 10 - La Sainte Bible en Langue Yipunu

Nongu jimubungulitsi ubindombu

¹ Guluanu nyidutsinguli rie: Dingensa jandi agugekoti o yivanga va munu ndagu tumba ekoti va diluta aji mudayitsi na yikongu.

² Tumba jandi oyikoti va munu ndagu aji mubungulitsi ubindombu.

³ Mukelisi umunu ndagu emudibulili na bindombu bigulu diufi diandi. Ebinengili na miina mogu na ebipalisi o dulombili.

⁴ Ava jandi epalisili bindombu biandi ewendi va gusu na bindombu bimuduki mu mbari bijabi diufi diandi.

⁵ Bigoduka muenyi tumba biumurina mu mbari bigejabi diufi diandi.

⁶ Jesus amababuayila nongu eni tumba basamajaba divindugulu.

Jesus la mubungulitsi ubindombu uboti

⁷ Jesus amamuebatsingula rie: Dingensa menu nyivu munu ndagu bindombu.

⁸ Botsu abamateyila baji badayitsi na bikongu tumba bindombu bisamabagulu, via!

⁹ Menu ia munu ndagu. Pa mutu ekoti muna ogobulu; okotanga na opalanga na odilanga biguji.

¹⁰ Mudayitsi edayi, eboki na ebungi; menu nyimaruga yiri batu boba na monyu aguifuningi.

¹¹ Nyiji mubungulitsi ubindombu uboti. Mubungufitsi ubindombu uboti eveyi monyu andi mu diambu dibindombu biandi.

¹² Tumba oyisali yika udila mbongu agugaa mubungulitsi ubindombu, esili bindombu mu mbari bigaa biandi; mbana ava elabili minsi uruga miruyi erini na mibimborumuni na mibipansi.

¹³ Musalitsi esili bindombu mu mbari agebilabi munyongu. Menu nyiji mubungulitsi ubindombu uboti.

¹⁴ Nyijabi bindombu biami na bionyi binjabi,

¹⁵ nana Taji enjabili menu nyimujabi na nyiveyi monyu ami mu diambu dibindombu biami.

¹⁶ Nyikivu na bindombu bisusu abigaa o yivanga yieyiyi. Nyubikotisa wandi; biugulu diufi diami na voba mugamba umosi buandi aguvu na mubungulitsi umosi.

¹⁷ Taji etondi mu mbari nyikeveyi nesi te na dufu yiri o gusu nyudila monyu.

¹⁸ Mutu agokoma tumba meʼ beni nyina nsala ukevega. Nyina musuga ukevega na nyina musuga udila monyu. Nyimadila musuga eni ombu Taji ami.

¹⁹ Vamamueba dugabu va gari baJuif mu diambu dimambu meni.

²⁰ Bapuela va gari ogu bamavosa rie: Jandi ana yinyunyi yibi! Aji dilagu! Mu mbari yi dumugululu?

²¹ Bamosi bamavosa rie: Mutu aguvu na yinyunyi yibi agevosi nana evosili. Mungo yinyunyi yibi orungula utiemusa bidunga?

BaJuif bamabusa Jesus

²² Ava mfula, feta jidubiatsu jimalilu o Jerusalem.

²³ Jesus amalinganga o Ndagu Nsambi va piasu Salomon.

²⁴ BaJuif bamamutsiengila nomuwivula rie: Temu yi gutusunsila mirima? Pa ndeju guji Christ tutsinguli dionyi na buranga.

²⁵ Jesus amabagabusila rie: Nyimaledutsingula dionyi na dugedivayili yitu. Bisalu abi nyisali mu diina diTaji ami bisingisili bumbeji buami.

²⁶ Tumba dugevayili yitu mu mbari dugaa bindombu biami.

²⁷ Bindombu biami bigulu diufi diami; nyibijabi na binduki.

²⁸ Nyibiveyi monyu umutubu na bionyi bigotsiemuga na mutu agobipatula va dikaka diami.

²⁹ Taji ami omabipega aji muneni uviolila botsu na mutu agorungula ubipatula va dikaka diTaji ami.

³⁰ Jetu na Tata tuji umosi.

³¹ Mbana baJuif bamamuebola mamanyi umutindila.

³² Jesus amabatsingula rie: Nyimadulasa bisalu biboti abimaruyila ombu Tata, mu diambu dibisalu bieni jenu duitindili mamanyi?

³³ BaJuif bamamugabusila rie: Tsiri mu diambu dibisalu biboti tuigutindili mamanyi tumba mu diambu didisabu na mu mbari ndeʼ aguvu mutu, guivayi nderi guji Nsambi.

³⁴ Jesus amabawivula rie: Digaa disonugu mu migaga mienu rie: Nyimavosa rie: Jenu duji bansambi?

³⁵ Tuijabi yiri Bisonu bivu bingensa na muna jandi enengili jogu abamalonsu malongi maNsambi, bansambi.

³⁶ Mbe ka menu, Tata amansola na amansindiga o bulongu. Kabogu dibandu yi duivosili yiri nyisabuli Nsambi ava nyivosili rie: Nyiji Muana Nsambi?

³⁷ Pa ngesali bisalu biTata kabogu duyapayila yitu.

³⁸ Tumba pa nyibisali ne pa dugopayila yitu vayilanu bisalu yitu nojaba yiri Tata amafubana murima nami na nyimafubana murima na Tata.

³⁹ Bamamueronda umugaanga tumba amabarina.

⁴⁰ Jesus amamuesabuga o disimu dina diJourdain o mbura aji Jean amalebatisilanga, amayetsana guna.

⁴¹ Puela batu bamawendanga ombu gandi na bamavosanga rie: Jean asamavaga ne yimaga yimosi tumba motsu ama Jean amavosa mu diambu dimutu egugu mavu mangensa.

⁴² Va mbura eni batu bapuela bamavayila Jesus yitu.