Jacques 4 - La Sainte Bible en Langue Yipunu

Dinonga na bisi butamba

¹ Manguba na mitsundu abivu nenu agunyi biruyisini? Tsiri ava nsala tsienu tsigayinini na bilema bienu?

² Duinyungili tumba dugediii; duji bikongu na duna ngusu ne nana dugediii ama duvu na nsala kabogu duitsundi na duna manguba. Dugediii ama duvu na nsala mu mbari dugemavondi Nsambi.

³ Ne nana duimuvondi dugediii mu mbari dugevondi na buranga; duirondi yika udugusu nsala tsienu.

⁴ Ka muna dimbunga di! Dinonga na bisi butamba digesoyini na Nsambi. Yiotsu ayi duinongi na bisi butamba duikevaga bavinitsi baNsambi.

⁵ Duitasi Bisonu bifuri abisonugu rie: Yinyunyi yiNsambi agumatuyegu ana diwavi?

⁶ Tumba maboti maNgambi mefuningi. La dibandu Bisonu bisonugulu rie: Nsambi ebusi bango dunangu tumba elasi mavolambombu maboti mandi.

⁷ Kabogu keveganu ombu Nsambi, busanu diabu na odurina.

⁸ Bambananu na Nsambi na obambana nenu. Bavayitsi bamasumu, liomisanu makaka menu! Bango mabeʼ mabeji, matsiemusianu!

⁹ Labanu munyongu na lilanu, dikeki dienu dikaluyi kondu na nsangu enu jikaluyi mirima mitsira.

¹⁰ Kesunsanu va gusu Fumu mbana jandi odumatisa.

Malubu mu diambu diufuengilila muana taji agu

¹¹ Baana bataji duyafuengasana. Pa mutu ofuengiila muana taji vo omutabulila bunsonsi esumuni migaga na emilensi. Kabogu pa guilensi migaga ndeʼ agugaa mukelisi migaga, gumakevaga nsonsi.

¹² Nsambi buandi eveyi migaga na avu nsonsi. Yika jandi avu na mangolu ugobula va uboka. Kabogu ndeʼ la nyi aguitabulili batu nagu bunsonsi?

Malubu mu diambu didunangu

¹³ Adidi nyivosi ombu genu aduivosi rie: Namunyi vo mugesa tuwenda o musiengi simbi, tumana yiluna yimosi usala muted na tudila mbongu tsipuela.

¹⁴ Ngensa duijabi adi dulaba mugesa? Duvu nderi dimungi adilabini mua pesu temu mbana ditsiemuyi.

¹⁵ Diviolila ubueji uvosa rie: Pa Fumu erondi na tuji buranga tuvaga didi vo dina.

¹⁶ Tumba jenu duikemtsula na duna dunangu. Dugejabi yiri dunangu duvu dibi?

¹⁷ Jandi oyijabi uvaga diboti na agedivayi evayi masumu.