Jacques 2 - La Sainte Bible en Langue Yipunu

Malubu mu diambu didupasu

¹ Baana bataji bami jenu adumavayila Jesus Christ yitu, jandi aguvu kaga jibundumba, duyaba na dupasu.

² Tanguji voba mutu muneni aguvu na moru ulora na biduaru bidufunu duneni agukota o yibenguna yienu na voba yijaga na masiengi wandi.

³ Disawelimina ugengila biduaru bimutu muneni novosa nandi rie: Ndeʼ ruga yitsana va yitsiga yieyiyi yiduyitsu!

⁴ Disawelimina wandi uvosa na yijaga rie: Ndeʼ relama vana! Vo rie: Tsana va tsi! Je motsu mana tsiri dupasu?

⁵ Guluanu baana bataji bami badurondu! Nsambi amasola bijaga bibutamba buebubu uba o tsi Durumu duNsambi, diwendi rie: busina buogu la Durumu dueni adumavangunu na jogu abemurondi.

⁶ Tumba jenu duilensi bijaga! Tsiri bisina abidulasi maguga nodubega va gusu bunsonsi?

⁷ Tsiri jogu abesabuli diina adi Nsambi amaduluga?

⁸ Pa duidugusu migaga miNsambi nana Bisonu bisonugulu rie: Ronda mutu nagu nana guikerondila, duivayi buranga.

⁹ Pa duna dupasu duivayi dibi. Migaga mimaduvega mbela! Duji basumunitsi.

¹⁰ Uotsu aguikelisi migaga miotsu tumba amasumuna umosi buandi esumuni miotsu.

¹¹ Jandi omavosa rie: Guyavaga bumbembu amavosa wandi rie: Guyaboka. Kabogu pa gugevayi bumbembu tumba guiboki ndeʼ guji musumunitsi.

¹² Vosanu na vaganu motsu nana nderi dutabululu bunsonsi na migaga amijeyisi batu.

¹³ Ava Nsambi otabulila bunsonsi agolasa yingeba ombu jandi agusamalasa basusu yingeba; yingeba yiviolili bunsonsi.

Yitu na bisalu biboti

¹⁴ Baana bataji bami pa mutu ovosa yiri ana yitu tumba bisalu biandi bigaa biboti ubueji uka? Yitu yimunongu eni yiurungula umugobula?

¹⁵ Pa baana bataji bana penyi na bagaa na biguji biwelimina na pa mutu obatsingula rie:

¹⁶ Wendanu na polu, yigoranu muji na gukuruanu, diwelimina pa agebaveyi matsanda na biguji?

¹⁷ Divu munongu mosi na yitu; pa yigaa na bisalu biboti yimatsiemuga kala.

¹⁸ Tanguji mutu ovosa rie: Ndeʼguna yitu, menu nyina bisalu biboti. Kabogu nyumuwagula rie: Ndasi yitu yiagu ayigaa na bisalu biboti na nyugulasa yitu yiami ayivu na bisalu biboti.

¹⁹ Je guna yitu yiri Nsambi mosi buandi avu? Guivayi buranga. Bayisi wandi bedivayili yitu na bereyimini mu dionyi.

²⁰ Yiduka, gugejabi yiri yitu ayigaa na bisalu biboti yigaa na tsongu?

²¹ Taji etu Abraham asamasungugu ava amavagulila muana andi Isaac pagu?

²² Gugelabi yiri yitu yiandi na bisalu biandi bimasala va mosi umudugusu?

²³ Anana Bisonu bimasonugulu rie: Abraham amavayila Nsambi yitu na Nsambi amamulaba asungama. Va julu vana Nsambi amamunengila mbatsi andi.

²⁴ Diwendi rie: mutu amasungugu na bisalu biandi tsiri yika na yitu yiandi buandi.

²⁵ Dimaba munongu mosi na Rahab, yimbembu yimugetu. Amasungugu mu adi amavaga, diwendi rie: amadila baleyitsi na amabawendisa yika na nsila jisusu.

²⁶ Nana dunyuru adugaa na muvumu duvu mfumbi munongu mosi na yitu ayigaa na bisalu biboti yimatsiemuga.