Hebreux 9 - La Sainte Bible en Langue Yipunu

Muyitsa ubutamba na muyitsa ujulu

¹ Pangini jitega jimaba na migaga mimuyitsa na migaga miMbura Nsambi wandi.

² Ndagu jitsanda jimarelugu. Mu yibuku ayitega ayimanengulungu Mbura Nsambi umaba dingasa na tavula na mapa amamavagulu ombu Nsambi.

³ O nsima dumbu dumubeji umaba yibuku yindagu ayimanengulungu Mbura Ajivu Tindi Yingitsi.

⁴ Muna mumaba yinyensulu yipagu na yigara yipangini ayimaba yika lora na lora. Mu yigara yipangini mumaba yipela yilora ayimabasa na manna na nguangu jiAaron ajimabenda na mamanyi ama Moise amasona migaga.

⁵ Va julu yigara vamaba bibagunu bibiansa abimalasa bundumba abimagumbanga yidibutsu yiyigara yipangini na bidumbitsi biogu.

⁶ Guluanu nana besalili guna: bavagulitsi bapagu abesali yisalu bekotingi temu na temu mu yibuku ayitega.

⁷ Tumba yika yivunda yibavagulitsi bapagu ekoti mu yibuku ayimubeji na jandi ekoti yika temu mosi yilima na yilima. Ava ekotili ebeyi malungu mayibulu ama ewakisi mu diambu diandi na mu diambu dimasumu mabatu.

⁸ Adi Yinyunyi yiNsambi erondi utulasa adidi rie: Ava ndagu jitsanda jitega jikivu, Mbura Nsambi Ajivu Tindi Yingitsi jisakadibuga.

⁹ Dionyi dimaba yibagunu yitemu ejiji. Dilasi yiri miensili amimawakusu na pagu ajimavagulu ombu Nsambi bigorungula udugusu mutu va gusu Nsambi.

¹⁰ Diwendi rie: bingitsi bieni bibiguji na bibinuingu bivu na mangolu yika te na pangini jigona jiulabana.

¹¹ Christ amakeruyila nana yivunda yibavagulitsi bapagu yimambu amamaruga kala. Ndagu aji evagulili pagu jisamarungu na batu, diwendi rie: jisamasundu nana butamba buebubu bumasundulu.

¹² Jandi amakota temu mosi mutubu o Mbura Nsambi Ajivu Tindi Yingitsi tsiri na malungu mabinsabi na mabangombi tumba na malungu mandi, diwendi rie: amatugobula mutubu.

¹³ Malungu mabangombi na mabinsabi na mabufu mamuana ngombi bimatsatsu batu, jogu abamaba na muinsi umasumu ubaliomisa.

¹⁴ Lesa bionyi bimaba biwelimina ubaliomisa tambusa na malungu maChrist? Na mangolu maYinyunyi yimutubu, amakevagula pagu jidugu ombu Nsambi. Malungu mandi motuliomisa yiri turungula usalila Nsambi aguvu monyu.

¹⁵ La dibandu Christ avu, jandi oyikunsi pangini jigona yiri jogu abamanengulu na Nsambi bogabulu miula mimutubu ami Nsambi amavangana nogu. Diurungula uba mu mbari vamaba dufu adumajeyisa batu abamavaga masumu ava mbe bakivu o tsi pangini ajitega.

¹⁶ Dufu dulejabunu mbana mugandu ugulunu.

¹⁷ Yika muganditsi efu mugandu uvu na mangolu; ugaa na mangolu ava muganditsi akivu monyu.

¹⁸ La dibandu pangini ajitega jisamadugu te na malungu mamawitama.

¹⁹ Moise anomana utsingula maruma motsu mamigaga ombu batu amabonga malungu mabangombi na mabinsabi na mamba na amabonga tsanda jibenga na hisopa abi amatsatsila dibuku na amatsatsa batu novosa rie:

²⁰ Amama la malungu amewarisi pangini aji Nsambi amaduruma ukelisa.

²¹ Munongu mosi amatsatsa Ndagu na bisalulu biotsu bimuyitsa na malungu meni.

²² Mu migaga bebeli na bima biotsu bimaliomusu na malungu na pa malungu magewitulu vagaa dutandulu dumasumu.

Pagu jiChrist jimagusula masumu

²³ Kabogu dimaba diwelimina yiri bibagunu bimaMbura maYingitsi biuliomusu nana tumba maMbura maNsambi moliomusu na pagu ajiviolili amana ubueji.

²⁴ Christ asamakota o Mbura Nsambi ajimarungu na batu ajimaba yika yibagunu. Jandi amakota o julu agu avu namunyi uyelabana na Nsambi mu diambu dietu.

²⁵ Yivunda yibavagulitsi bapagu yibaJuif amakotanga yilima na yilima o Mbura Nsambi na malungu mayibulu. Tumba Christ asamakotanga ukewakisa temu na temu

²⁶ mbe nana mbe ubandila va dibandu amalabanga. Tumbajandi amalabana emu mosi buandi ugusula masumu na pagu andi.

²⁷ Mutu uotsu ofu mbana Nsambi omutabulila bunsonsi.

²⁸ Munongu mosi Christ amakewakisa temu mosi ugusula masumu mabatu botsu. Jandi omueruga temu ajimubeji tsiri uyigusula masumu tumba uyigobula batu abemuvivingi.