Hebreux 8 - La Sainte Bible en Langue Yipunu

Jesus yivunda yietu yibavagulitsi bapagu

¹ Adi tumaronda upalisa mu motsu mana adidi rie: Tuna yivunda yibavagulitsi bapagu ayitsani o julu va mabaala maNsambi aguvu na mangolu motsu.

² Aji yivunda yibavagulitsi bapagu oyisali Mbura Nsambi, diwendi rie: o ndagu jitsanda ajimarungu na Fumu tsiri na batu.

³ Yivunda yibavagulitsi bapagu yiotsu yimasolu uwakisa miensili novagula pagu kabogu jandi wandi vengu oba na pagu uvagula.

⁴ Mbe akivu vava tsi mbe agaa muvagulitsi upagu. Avava bavagulitsi bapagu bewakisi miensili nana migaga mibaJuif mirumini.

⁵ Jogu bewendisi yibenguna ayivu yibagunu yimambu amavu o julu. Ava Moise amawendila o uyerunga Ndagu Nsambi amalubusu rie: Vaga motsu na buranga nana gumalasulu yibagunu o julu mukongu.

⁶ Tumba namunyi Jesus amadila yisalu yimuvagulitsi upagu ayiviolili yisalu yiogu; munongu mosi pangini aji Nsambi amavangana na batu jimaviolila pangini ajitega.

⁷ Mbe pangini ajitega jisamaba na nsimbulu mbe ajimubeji jisamaba.

⁸ Tumba Nsambi jaʼ beni amabiga mu diambu dibatu bandi rie: Namapapa nyuvangana pangini jigona na baIsrael na baJuda.

⁹ Jigoba nana pangini aji nyimavangana na bataji bogu yana yilumbu ayi nyimabapalisila o bulongu buEgypte, pangini aji bamabunsa diuleba nyimaba Fumu ogu.

¹⁰ Pangini aji nyuvangana na baIsrael ajiji rie: Nyubalonsa migaga miami, nyumisona nesi va mirima miogu. Nyuba Nsambi ogu na jogu boba batu bami.

¹¹ Ne mutu mosi va gari ogu agomuelonsa muana taji andi rie: Jaba Fumu! Mu mbari botsu bonjaba, ubanda na bangebi te na bivunda.

¹² Nyubatandila mabi mogu na ngomuemarangimina.

¹³ Anovosa diambu dipangini jigona Nsambi amalasa yiri pangini jitega jimafu na jiutsiemuga.