Hebreux 7 - La Sainte Bible en Langue Yipunu

Melkisedec kaga na muvagulitsi upagu

¹ Melkisedec eni amaba kaga jiSalem na muvagulitsi upagu uNsambi aguvu o julu. Jandi amabengusana Abraham ava amaruyila o divita adi amabelisila bakaga na amamugabila mula.

² Abraham amamuvega yimosi mu digumi mu biotsu. Divindugulu diMelkisedec divu rie: kaga ajivu na dusungugu mbana mu mbari amaba kaga jiSalem, divindugulu divu rie: kaga ajivu na duvotsu.

³ Melkisedec agejabunu: ne taji ne nguji ne bukulu ne dibandu ne disukusulu tumba ebagunu na Muana Nsambi omaba muvagulitsi upagu umutubu.

⁴ Labatianu nana mutu eni amabila muneni! Yivunda yietu Abraham amamuvega yimosi mu digumi.

⁵ Bategula baLevi abamaba bavagulitsi bapagu bamarumu ugusula yimosi mu digumi mu biotsu bibaana bataji bogu, jogu botsu bamaba bategula baAbraham.

⁶ Tumba Melkisedec amadila yimosi mu digumi ombu Abraham nesi asamaba mutegula andi na va julu vana amagabila Abraham mula, Abraham agumavangunu pangini tsiotsu.

⁷ Kabogu togotumuna paga, oyigabili mula eviolili oyigabulu.

⁸ Mbe ka bavagulitsi bapagu abegusuli yimosi mu digumi, befuangingi tumba Melkisedec agumadila yimosi mu digumi asamafu nana Bisonu bisonugulu.

⁹ Kabogu divu nana: ava Abraham amafutila yimosi mu digumi, Levi amafuta wandi. (Bategula bandi bamagusula yimosi mu digumi.)

¹⁰ Dingensa Levi mbe asakaburu tumba mu mbari amaba mutegula uAbraham, amaba vana wandi ava Melkisedec amabengunina na Abraham.

¹¹ Mu diambu dibuvagulitsi bupagu buLevi migaga mimavegu ombu batu baIsrael. Je mbe buvagulitsi bupagu buogu bumaba budugu mbe Melkisedec amalabana? Dibandu yi asamaruyila mu mukuta uAaron?

¹² Ava buvagulitsi bupagu buvinsulu kabogu migaga miuvinsu wandi.

¹³ Fumu etu, agu mambu meni mamavosulu, amaruyila o yifumba yisusu, batu bandi basamaleba bavagulitsi bapagu.

¹⁴ Jandi amaruyila o yifumba yiJuda; Moise asamarangula yifumba yieni ava amarangulila bavagulitsi bapagu.

Muvagulitsi upagu ususu aguibagunu na Melkisedec

¹⁵ Adimaba adidi rie: Muvagulitsi upagu ususu umalabana agumaba nderi Melkisedec.

¹⁶ Buvagulitsi bupagu buandi busamaruyila migaga vo yifumba tumba abuandi bumaba mu mbari amaba na monyu umutubu.

¹⁷ Mu mbari Bisonu bisonugulu rie: Guba muvagulitsi upagu mutubu agumapalila mu mukuta uMelkisedec.

¹⁸ Diruma ditega dimatsiemuga mu mbari disamaba na mangolu na disamaba na tsongu.

¹⁹ Migaga miMoise misamarungula udugusu batu. Kabogu ditasa digona dimamivinga na dionyi ditubambisini na maboti maNsambi.

²⁰ Va julu vana vavu pesi jiNsambi. Vasamaba pesi ava basusu bamakaluyila bavagulitsi bapagu.

²¹ Tumba Jesus amavagu muvagulitsi upagu na pesi mu mbari Nsambi amavosa rie: Fumu amaleva pesi agosumuna pesi andi rie: Guba muvagulitsi upagu mutubu.

²² Kabogu Jesus avu tuga jipangini ajiviolili ubueji.

²³ Vamaba duviakusunu dususu: bavagulitsi bapagu beni basusu bamaba bapuela mu mbari bamafuanganga kabogu basamarungula umanisila bisalu biogu.

²⁴ Tumba Jesus ana monyu umutubu, kabogu yisalu yiandi yimuvagulitsi upagu yigovegu ombu mutu ususu.

²⁵ Kabogu botsu aberuyi ombu Nsambi mu diina diandi bogobulu mu mbari aji mutubu na ebalendili Nsambi.

²⁶ Kabogu Jesus avu yivunda yibavagulitsi bapagu aguvu uwelimina uwamusa jetu botsu! Aji Muana Nsambi; agaa na mbela mu mbari asakavaga di sum u; amakakusunu na bavayitsi bamasumu na amamatusu o julu majulu motsu.

²⁷ Agaa nana bavagulitsi bapagu basusu; agaa na nsala uvagulanga pagu yilumbu na yilumbu, tetega mu diambu dimasumu mandi mbana mabatu. Amavagula pagu temu mosi ava amakewakisila.

²⁸ Migaga miMoise mimagaru batu abasamaba badugu uba bavagulitsi bapagu tumba pesi jiNsambi ajimaduka migaga jimasola Muana agumabanganga udugu uba muvagulitsi upagu mutubu.