Hebreux 6 - La Sainte Bible en Langue Yipunu

¹ Kabogu tudundianu ulonsa yika malongi amagaa maranga maMusamu Uboti uChrist na tubuesa ulonsa amavu mavura. Tuyamuebanda vadibandu, diwendi rie: temu ejiji tugomuelonsa mambu mabisalu nesi mayitu

² nesi mabatema nesi mausakiga miogu nesi madurambugu duabafu nesi mabunsonsi abusita.

³ Ka muna malongi ma ama tusakadulonsa!

⁴ Diurungula uba yiri abamakonda uduka Nsambi bomuekalula diela? Diwendi rie: bamalaba yijalala yiNsambi. Bamalejaba Yinyunyi yiNsambi.

⁵ Va julu vana bamawiji mambu maNsambi na mangolu amoba.

⁶ Ne nana bamakonda uduka Nsambi! Kabogu bagomuerungula ukalula diela bemuegomina Muana Nsambi va kurusu na bemulasi yisonyi.

⁷ Butamba abuikoti mamba buibendisi bivaru, diwendi rie: nderi mbura ajivu na mula uNsambi.

⁸ Tumba dukanga duibendisi yika matsiendi na matsiendi mbana batu bodunyensa, diwendi rie: nderi mbura ajimalogu na Nsambi.

⁹ Bambatsi badurondu ne pa tuivosi nana tuiduvayili yitu. Tuijabi yiri dumagabulu mula udugobutsu.

¹⁰ Nsambi agaa na biliba. Agelibini bisalu bienu nesi durondu adu dumamulasa ava dumawamusila baana bataji benu.

¹¹ Tuirondi yiri duba na yikanana te na mutubu yiri adi dumaletasila diulabana.

¹² Tugerondi ugulu yiri duji batsoritsi tumba dukanu jogu abamamuvayila yitu na abavu na pugu yiri pangini jiNsambi jiudugusu.

Pangini tsiNsambi tsivu tsingensa

¹³ Ava Nsambi amavanginina pangini na Abraham amaleva pesi. Vasamaba mutu ususu agumamuviolila buneni la dibandu amajilevila na jaʼ beni rie:

¹⁴ Menu Nsambi nyugugabila mula na nyufunisa bategula bagu.

¹⁵ Abraham anoviva na pugu amadila ajimavangunu nandi.

¹⁶ Yiotsu ayi batu belevili mapesi na diina dimutu muneni mitsundu misuki mu diambu didiina dieni.

¹⁷ Munongu mosi Nsambi amaronda ulasa badilitsi bapangini yiri jigobunsu, amajiwarisa na pesi.

¹⁸ Diwendi rie: na mambu mabeji: pangini na pesi, elasi yiri agefuri. La dibandu jetu atuimujabi tuiwarili na tuivivili ditasa adivu o gusu.

¹⁹ Ditasa dieni divu nderi tsiku ajiutuwarisa yiri tugokunga. Divu sikiri na dikoti nesi o nsima dumbu

²⁰ adu Jesus amarela ukota mu diambu dietu. Jandi amakaluga yivunda yibavagulitsi bapagu agumapalila mu mukuta uMelkisedec.