Hebreux 2 - La Sainte Bible en Langue Yipunu

Dugobutsu duvu duneni

¹ La dibandu vengu tutsiyisa mambu mangensa ama tumagulu yiri tugopatulu monyi.

² Pa mambu amamavosu na biansa mamaba na tsongu na botsu abamabusa umadedila bamakilusu,

³ kabogu jetu tugokilusu pa tuibusi dugobutsu? Fumu amalesamuna dugobutsu mbana jogu abamadugulu bamatulasa nana duvu na tsongu.

⁴ Nsambi amawarisa bumbeji buogu na bilimba na bimaga bimunongu na munongu. Va julu vana amagabila pegulu tsiYinyunyi yiandi nana amarondila.

Yivunda yidugobutsu

⁵ Nsambi asamavega biansa musuga uruma butamba abu mbe asakasunda, diwendi rie: Butamba buebubu.

⁶ Vavu bibuku mu Bisonu abisonugu rie: Dibaala la nyi yiri gumurangiminanga? Muana mutu la nyi yiri ndeʼ gumamubamba?

⁷ Gumamusingisa uba o tsi biansa mua pesu temu, gumamuvega bundumba na digoba bibukaga,

⁸ gumasunsa biotsu o tsi durumu duandi. Ava bisonugulu rie: Nsambi amasunsa biotsu o tsi durumu duandi, diwendi rie: biotsu. Tumba disakalabana yiri bima biotsu bimasunsu o tsi durumu dumutu.

⁹ Tumba tumalaba Jesus! Mua pesu temu amasunsu o tsi biansa yiri maboti maNsambi molabana na dufu wandi. Mbana tumalaba bundumba na duyitsu duandi ava amalabila maguga madufu.

¹⁰ Nsambi aji dibandu na disukusulu dimotsu na ewarisi motsu wandi. Anoronda ugabila batu bundumba amalaba divu diwelimina yiri yivunda yidugobutsu, diwendi rie: Jesus awarili maguga yiri abi adugu ugobula botsu.

¹¹ Jesus oyiliomisi bavayitsi bamasumu na jogu abamaliomusu, jogu botsu bamaburu na Taji mosi. La dibandu Jesus agaa na yisonyi ubanengila baana baTaji

¹² ava amavosila rie: Nyunyavisa diduma diagu ombu bambatsi bami nyuguyitsa va gari dibuli.

¹³ Amabuela rie: Nyuvayila Nsambi yitu. Na rie: Meʼ janduʼgu, menu na baana aba Nsambi amapega

¹⁴ Baana beni aba amarangula bavu batu la dibandu Jesus jaʼ beni amakaluyila mutu yiri oba na dunyuru nana nyuru tsiogu. Amasinga dufu yiri diabu obungu, jandi agumaleba na mangolu madufu.

¹⁵ Kabogu Jesus amapalisa botsu abamabanganga baviga badufu, diwendi rie: bango goma.

¹⁶ Jandi asamaruga uwamusa biansa tumba nana Bisonu bisonugulu rie: Eruyi uwamusa bategula baAbraham.

¹⁷ Diwendi rie: vengu okaluga mutu yiri obanganga nana baana bataji bandi mu motsu. Mbe tsi nana mbe asamarungula uba yivunda yibavagulitsi bapagu yiogu ayimasala yisalu yiNsambi na yingeba na usigama yiri masumu mabatu motandu.

¹⁸ Kabogu orungula uwarisa jogu abamamangu mu mbari jaʼ beni amamangu ava amawarila maguga.