Hebreux 11 - La Sainte Bible en Langue Yipunu

Yitu

¹ Yitu la yi? Diwendi rie: Tugemuetumuna paga; tuijabi yiri tudila abi tumaletasa ne tusakabilaba.

² Mu diambu diyitu yiogu bivunda bimasingu na Nsambi.

³ Mu diambu diyitu yietu, tuisingi yiri bulongu bumasundu na Mbembu Nsambi na abi tuilabi bisamavagu na abilabini.

⁴ Mu diambu diyitu yiandi Abel amavagulila Nsambi pagu ajiviolili jiCain ubueji. Kabogu mu diambu diyitu yieni Nsambi amamulaba mutu usungama na Nsambi amasinga miensili miandi. Yitu yiAbel yiki yijabunu ne amafu.

⁵ Mu diambu diyitu yiandi Henok asamajaba dufu. Tumba amamatusu na Nsambi na asamamuelabana. Bisonu bisonugulu rie: Ne akamatusu amalasa Nsambi ubueji.

⁶ Mutu agorungula ulasa Nsambi ubueji pa agaa na yitu. Jandi aguibambini na Nsambi vengu abi na yitu yiri Nsambi avu na yiri Osaka jogu abemurondi.

⁷ Mu diambu diyitu yiandi Noe amagulu malubu maNsambi mu diambu dimambu ama mbe masakalabana. Amadedila Nsambi na amagomina dikumbi ugobula mukuta andi. Anodivaga amabelisa bulongu na amasungugu na Nsambi, dusungugu duandi dumaruyila mu diambu diyitu yiandi.

⁸ Mu diambu diyitu yiandi Abraham amadedila Nsambi ava amamunengilila; amawenda o bulongu abu Nsambi amavagana umuvega. Amasogama tsiri ujaba agunyi ewendi.

⁹ Mu diambu diyitu yiandi amaba muenyi ava amatsanina o bulongu abu Nsambi amavangana nandi. Amatsananga o mandagu mamatsanda va mosi na Isaac na Jacob abamavangunu pangini eni wandi.

¹⁰ Diwendi rie: Abraham amavivanga utola o musiengi aguvu na mandagu maboti agu Nsambi avu murungitsi.

¹¹ Mu diambu diyitu yiandi muana amaburu ombu Abraham na Sara nesi mu bununu buogu mu mbari Abraham amavayila omavangana pangini yitu.

¹² La dibandu ombu mutu umosi agumanuna kala bategula bapuela bamaburulu na bamafunanga nderi bambuelili ne yisieyi abigorungula urangu.

¹³ Ne botsu bana bamafu, bamafu na yitu yiri pangini aji Nsambi amavangana jiulabana. Bamasinga uba benyi na balinsi mu butamba buebubu.

¹⁴ Banodisinga bamalasa yiri bamaba na nsala bulongu bususu abugaa buogu.

¹⁵ Mbe bamarangimina bulongu abu bamapalila mbe bamagabuga guna.

¹⁶ Tumba bamaba na nsala abuboti, diwendi rie: abuvu o julu. La dibandu Nsambi agaa ria yisonyi unengulu Nsambi ogu mu mbari jandi amabarungila musiengi.

¹⁷ Mu diambu diyitu yiandi, Abraham amavagula Isaac pagu ava Nsambi amamuweliyila. Abraham amavangunu pangini na Nsambi ne nana asamabusa uvagula muana andi divingu nana pagu.

¹⁸ Diuleba Nsambi amavosa nandi rie: Isaac oguburila bategula.

¹⁹ Abraham amajaba rie: Nsambi erunguli urambusa bamfumbi, kabogu adi amalaba dimaba nderi Isaac amarambuyila o dufu.

²⁰ Mu diambu diyitu yiandi Isaac amagabila Jacob na Esau miula amimabawamusa o gusu.

²¹ Mu diambu diyitu yiandi Jacob anolaba yiri ufu efu amagabila baana baJoseph miula na ava amasambilila Nsambi, amawarila mu dupangu duandi.

²² Mu diambu diyitu yiandi, Joseph anolaba yiri ufu efu amavosa diambu ditemu aji baIsrael bopalila o Egypte na amavega diruma mu diambu dibivisi biandi.

²³ Mu diambu diyitu yiogu taji na nguji Moise bamamusuega tsungi yirieru. Bamalaba yiri amaba muana uboti na dionyi dimabavega bukidi ulensa diruma dikaga.

²⁴ Mu diambu diyitu yiandi Moise anobanguga amabusa urangulu mu yifumba yimuana uPharaon.

²⁵ Amasola ulaba maguga va mosi na batu baNsambi tsiri ulaba ubueji umasumu mu mua temu.

²⁶ Amalaba yiri uwarila maguga mu diambu diChrist uvu nderi busina abuiviolili busina buotsu buEgypte mu mbari amaba liyiyi ava amavivilanga yisaku.

²⁷ Mu diambu diyitu yiandi tsiri mu diambu dikabu jikaga amagusuga o Egypte na asamamuegabuga, dimaba nderi amalaba Nsambi ogelabini.

²⁸ Mu diambu diyitu yiandi jandi amakunsa Paque na amatsatsa migunda malungu yiri yiansa yidufu yigobunga tsomi tsibalsareal.

²⁹ Mu diambu diyitu yiogu batu baIsrael bamasabuga Mubu Ubenga nderi ukamuga kala tumba ava bisi Egypte bamaweliyila uvioga mamba mamabadiamisa.

³⁰ Mu diambu diyitu yibatu baIsrael, bivaga biJericho bimapansiga, diwendi rie: bamayenatsiengilanga dimbu yisambuali yibilumbu.

³¹ Mu diambu diyitu yiandi Rahab omaba yimbembu amadila baleyitsi, la dibandu asamabungulu va mosi na batu abamabusa udedila Nsambi.

³² Je nyumuevosa mu diambu dibatu basusu? Temu jigatsi uvosa diambu diGedeon na Barac na Samson na Jefte na David na Samuel na babiyitsi.

³³ Mu diambu diyitu yiogu bamabelisa malongu na bamalonsa mambu madusungugu na bamadila aji Nsambi amavangana. Bamadibiga miunu mibimbungu

³⁴ na bamawarila milutsu mimuji na bamarina dufu. Bamabeluga maali maneni na bamalasa mangolu mogu o divita na bamabinga mabadi mabavinitsi.

³⁵ Mu diambu diyitu yiogu bagetu bamalaba bamfumbi bogu bamarambuga, diwendi rie: bamamuedila baana bogu. Bamosi bamanyonyusu puela te na bamafu, diwendi rie: bamabusa ujegusu yiri bodila durambugu aduiviolili ubueji.

³⁶ Bamosi bamadesu na bamadimbu na basusu bamatungu na bapanga nokotusu o tsugu.

³⁷ Bamatindu mamanyi na bamapasu na biwasu na bamaboku na majenga. Bamaduaranga mikata mibindombu na mibinsabi na bamapatulu biotsu; bamakuanu na bamalasu maguga.

³⁸ Ka muna batu ba! Bisi bulongu buebubu basamaba dedi nogu! Bamaba ditediteli o kumu no mikongu na bamatsananga o malima nesi o bansiga.

³⁹ Ka muna bumbeji bu batu beni bamasingisila mu diambu diyitu yiogu! Ne nana basamalaba ajimavangunu nogu na Nsambi.

⁴⁰ Mu mbari Nsambi amatutasila, asamaronda yiri jogu botureyila udugu, diwendi rie: amaronda utudugusu va mosi.