Habacuc 3 - La Sainte Bible en Langue Yipunu

Dusambu duHabacuc

¹ Dusambu duHabacuc mubiyitsi adu amatatila Fumu adudu:

² Fumu, nyimagulu adi gumasamuna nyimagaangu na goma. Aa Fumu, manisila yisalu yiagu mu bilima biebibi! yilasi mu bilima biebibi! Tumba ava guinyoyili kabu agu muetulasa maboti magu wandi.

³ Nsambi eruyili o Teman, Aguneni eruyili o mikongu miParan. Bufumu buandi bukibiyi julu na bundumba buandi buibasi butamba.

⁴ Eruyi na yijalala yineni na misasi miyionyi va dikaka diandi; avana mangolu mandi mepalili.

⁵ Yivunga yivu va gusu andi na yivunga yimuduki va nsima.

⁶ Esikimi, ewetsiyi butamba na disu diandi; egengili na ereyimisi malongu; mikongu amimasundu kala mirakuyi nesi bikundubuga bikala bidesimi. Mansila makala medibuyi va gusu andi.

⁷ Nyilabi munyongu ubisi Kouchan na goma jibisi Madian.

⁸ Je Fumu amanyoyila mijamba? Je guirangisili mijamba kabu agu? Fuiri agu jilasu mubu? Guimati mamungi nderi dikalu adigubeyi o ulunga.

⁹ Pita agu jimalabana; mbansa tsiagu tsivu nderi kaka atsi gumagana. Guitimi butamba upalisa mijamba.

¹⁰ Mikongu minogulaba mimaregama, mijamba mimapubuga, mbengi jimagulusu diufi na mibiji mimamata te no julu.

¹¹ Wisi na tsungi bimasikama va mbura tsiogu. Ka muna yijalala yi yivu na mbansa tsiagu atsitindungu nesi dikongu diagu adivedimi.

¹² Na kabu agu gumatsiengila butamba na fuiri agu gumagesumuna bisi malongu.

¹³ Gumapala uwaka batu bagu kalala; ndeʼ gumatabula sefu jiyifumba yimutu mubi muru. Gumabunga tindi ubunga badukitsi ban di.

¹⁴ Na mbansa tsiagu guitobi miuru mibasefu babavinitsi abevindimi nderi mungudi uyenatubinganga, abegamuyi migamu minsangu nderi bamabunga abamakambulu o bisuemunu biogu.

¹⁵ Na bakabala bagu gumatsiarila mubu, na mubu umarongulanga mibiji.

¹⁶ Ava nyimagululu diufi dieni murima ami umabakama, bilila biami yika uregama, bivisi biami bimaganyi, makotulu mami mamaregama. Nyuba sui uviva yilumbu yidubungu, yilumbu ayi mukuanitsi otoyisila batu.

¹⁷ Mufiga ugowansa, mfuga jirayisan jigowansa muoliva ugobura milunda wandi, manungi magoba na digumba bindombu biutsiemuga va mbura aji bejangingi, bangombi bagomuebasa mbura aji besiliminingi.

¹⁸ Ne nana nyulabanga nsangu na Fumu, nyulabanga nsangu na Nsambi aguvu dugobutsu duami.

¹⁹ Fumu Nsambi avu mangolu mami; elengisi makulu mami nderi matsiesi na ekwendisi va mbura tsinanguga. Duimbu duyivunda yibawimbitsi: adumawimbulu na yisigu ayivu namikudu.